بۇگىن پالاتا سپيكەرى نۇرلان ءنىعماتۋليننىڭ توراعالىعىمەن وتكەن ءماجىلىستىڭ جالپى وتىرىسىندا دەپۋتاتتار «ستاندارتتاۋ تۋرالى» زاڭ جوباسىن ءبىرىنشى وقىلىمدا تالقىلادى، دەپ جازادى Qamshy.kz اقپارات اگەنتتىگى.
وندا حالىق قالاۋلىلارى زاڭ جوباسىنىڭ 14-بابىنا نازار اۋداردى. ستاندارتتاۋ جونىندەگى قۇجاتتاردى زاڭدى جانە جەكە تۇلعالاردىڭ تاراتۋى ۇلتتىق ستاندارتتاۋ ورگانىمەن كەلىسىم بولعان كەزدە جۇزەگە اسىرۋ مۇمكىندىگى ايتىلعان.
وسى رەتتە دەپۋتاتتار تاراپىنان دەلدالدار سانى ءوسىپ، ول ستاندارتقا قولجەتىمدىلىك قىزمەتىنىڭ قىمباتتاۋىنا جول اشۋى مۇمكىن دەگەن ءقاۋىپ ايتىلدى. سونداي-اق، زاڭ جوباسىندا ستاندارتتاۋ تۋرالى ۇلتتىق ورگانمەن كەلىسىم-شارت جاساسۋ ءۇشىن زاڭدى جانە جەكە تۇلعالارعا قويىلاتىن تالاپتار ناقتى كورسەتىلمەگەن.
ءماجىلىس ءتوراعاسى اتالعان باپتا قالىپتاستىرۋدى، جۇرگىزۋدى جانە سۇيەمەلدەۋدى ۇلتتىق ستاندارتتاۋ ورگانى جۇرگىزەتىن نورماتيۆتىك تەحيكالىق قۇجاتتاردىڭ ءبىرىڭعاي مەملەكەتتىك قورىنا نازار اۋدارا كەلىپ:
- اتالعان اقپاراتتىق جۇيەنى جالپىعا ورتاق قولجەتىمدى ەتۋگە نە كەدەرگى بولىپ وتىر؟ ارينە، ستاندارتتاۋ ينستيتۋتى ودان تۇسكەن قارجىمەن اقپاراتتىق جۇيەنى جۇرگىزۋ بويىنشا شىعىندارىن جاباتىنى تۇسىنىكتى. الايدا، ونى تاراتۋ ءۇشىن ارادا دەلدالدىڭ بولۋى قانداي قاجەتتىلىكتەن تۋىپ وتىر؟ ونىڭ ۇستىنە زاڭ جوباسىندا ولاردى تاڭداۋ بويىنشا، قىزمەت قۇنى بويىنشا، ءتىپتى، اقپاراتتاردىڭ شىنايىلىعىنا جاۋاپكەرشىلىك تۋراسىنان ەشقانداي ولشەم، تالاپ بەلگىلەنبەگەن،-دەدى نۇرلان نىعماتۋلين.
زاڭ جوباسىنىڭ ۇكىمەتتىك نۇسقاسىندا بۇل نورما «دەلدال ءۇشىن»، «كادىمگى پايدا تاباتىن ورىن اشاتىنىن» ايتقان ءماجىلىس ءتوراعاسى:
- جۇمىس توبى ەكىنشى وقىلىمعا دەيىن وسى باپتى قاراپ، ماڭىزدىلىعىنا قاتىستى ناقتى شەشىم قابىلداۋى كەرەك،-دەدى.
ايتا كەتەيىك، زاڭ جوباسىنىڭ نەگىزگى ماقساتى سۋبەكتىلەردىڭ جانە ولاردىڭ ستاندارتتاۋ سالاسىنداعى قىزمەتتى جۇزەگە اسىرۋ پروسەسىندەگى قاتىناستارىنىڭ جيىنتىعى رەتىندە ۇلتتىق ستاندارتتاۋ جۇيەسىن قالىپتاستىرۋ بولىپ تابىلادى، وندا ستاندارتتاۋدىڭ ماقساتتارى، قاعيداتتارى، ستاندارتتاۋ سۋبەكتىلەرىنىڭ قۇزىرەتى مەن ولاردىڭ ءوزارا ءىس-قيمىل راسىمدەرى ناقتى ايقىندالعان.
