تۇركىستان قالاسىندا «ازىرەت سۇلتان» مەملەكەتتىك تاريحي-مادەني قورىق-مۋزەيى «ەسىمحاننىڭ ەسكى جولى»، « قاسىمحاننىڭ قاسقا جولى»، «ءاز تاۋكەنىڭ جەتى جارعىسى» دۇنيەگە كەلگەن كيەلى جەردە الاشتىڭ ايبىنىن اسىرعان ابىلايدى حان كوتەرىپ، قازاقتىڭ قابىرعالى ءبيى قازىبەكتىڭ جامباسى جەرگە تيگەن كونە شاھار تۇركىستاندا اۋزى دۋالى جاقسىلار مەن جايساڭدار، باتىرلار مەن باعلاندار، حاندار مەن سۇلتاندار رۋحىنا قۇران باعىشتاۋ ماقساتىندا كوپشىلىككە اس بەردى، دەپ حابارلايدى Qamshy.kz اقپارات اگەنتتىگى.
يگىلىكتى شاراعا تۇركىستان قالالىق اقساقالدار القاسى جانە قالالىق ارداگەرلەر كەڭەسىنىڭ ءتوراعالارى مەن مۇشەلەرى، قالاداعى ۋنيۆەرسيتەت جانە كوللەدج باسشىلىعى مەن ۇستازدارى، زيالى قاۋىم وكىلدەرى جانە وبلىسقا قاراستى مۋزەيلەردىڭ قىزمەتكەرلەرى مەن ب ا ق وكىلدەرى جانە قالا تۇرعىندارى قاتىستى.
«ەل تاۋەلسىزدىگى جولىنداعى ماڭداي تەر تولى ءاربىر ەڭبەكتە- ەلىم، جەرىم دەپ وتكەن تۇلعالاردىڭ ورنى وراسان. ءاربىر تاريح تاعىلىمىنىڭ التىنداي ايبىندى بەتتەرى قاسيەتتى بابانىڭ ءىزى، ءسوزى، ىسىنە تولى. ال، ولاردىڭ ۇرپاق بالاسى باقىتىنا تىلەپ وتكەن ارمانى دا ازات، تىنىش، بەيبىت ءومىر بولسا، بۇل كۇننىڭ شۋاعى دا، قۋاتى دا وتكەندى قۇرمەت تۇتىپ، كەلەشەككە نىق قادام باسۋ، ۇلىلاردى ۇلىقتاۋ، ماقتان ەتىپ، ءبىر ساتكە ەستەن شىعارماۋ»-دەيدى، «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ باسشىسى ن.قادىر ۇلى.
جيىن بارىسىندا مۋزەي ديرەكتورى تۇركىستان قالاسىنداعى الەۋمەتتىك جاعدايى تومەن 10 وتباسىعا مەكەمە اتىنان قارجىلاي قايىرىمدىلىق كومەك كورسەتتى.
سونىمەن قاتار، تۇركىستان قالالىق ءماسليحاتىنىڭ حاتشىسى عاپپار سارسەنبايەۆ كوپشىلىكتى «تاۋەلسىزدىك كۇنى» مەرەكەسىمەن قۇتتىقتاپ، جىل كولەمىندە تورتكۇل دۇنيەگە اتى ايگىلى بولعان «تۇركىستان- تۇركى الەمىنىڭ مادەني استاناسى» جىلى اياسىندا وتكەن ءىس-شارالاردى ۇيىمداستىرۋعا ەتكەن ەڭبەگى ءۇشىن حالىقارىلىق تۇركسوي ۇيىمىنىڭ باس حاتشىسى دۇيسەن قاسەيىنوۆتىڭ ارنايى العىس حاتىمەن مۋزەي ديرەكتورى احمەتجانوۆ نۇربولات قادىرۇلىن ماراپاتتادى.
