الماتى اكىمى باۋىرجان بايبەك ۋنيۆەرسيتەتتىڭ تەحنوپاركى مەن «جاسىل تەحنولوگيا» ورتالىعىندا بولىپ، ءال-فارابي اتىنداعى قازۇۋ-دەگى يننوۆاسيالىق جوبالارمەن تانىستى. مۇنداعى جوبالاردىڭ باسىم بولىگى استانادا وتكەن «ەكسپو-2017» حالىقارالىق مامانداندىرىلعان كورمەدە العاش رەت كورسەتىلگەن بولاتىن.

بۇگىنگى كۇنى ۇلتتىق ۋنيۆەرسيتەت اۋماعىندا جەل، كۇن، گەوتەرمال، بيوگاز، سۋتەگى جانە گيدرو ەنەرگيالاردى الۋ ءۇشىن ەكسپەريمەنتالدى الاڭدار جاسالعان. سونىڭ ارقاسىندا ستۋدەنتتەر ەنەرگيانىڭ بالامالى ءتۇرىن الۋ جولدارىمەن پراكتيكا جۇزىندە تانىسۋدا.

مەگاپوليس باسشىسىنا «جاسىل تەحنولوگيا» ورتالىعىنداعى ەنەرگيا تيىمدىلىگىن جۇزەگە اسىرعان جىلىجايدا اگروتەحنيكانىڭ زاماناۋي تاسىلدەرى ارقىلى جەمىس-كوكونىستى ۆيرۋسسىز ءوسىرۋدىڭ ادىستەرى كورسەتىلدى. ءال-فارابي اتىنداعى ءقازۇۋ-نىڭ رەكتورى عالىم مۇتانوۆ جوو ماڭىنداعى كامپۋستا ەكولوگيالىق تۇراقتى جانە جايلى «جاسىل كەڭىستىكتىڭ» پايدا بولعانىن ايتتى.

«كەرەڭقۇلاق» وزەنىنىڭ جاعالاۋىن اباتتاندىرۋ جۇمىستارى اياقتالىپ قالدى ءارى مۇندا سۋ تازارتاتىن جۇيە دە بار. وزەن سۋى «اكۆاپونيكا» جاساندى ەكوجۇيەدە قولدانىلادى. بۇل ايماق ستۋدەنتتەر مەن قالا تۇرعىندارى ءۇشىن جايلى دەمالىس ورنىنا اينالادى. ياعني، اتالعان اۋماق ستۋدەنتتەر ءۇشىن پراكتيكالىق بازا بولىپ، باعالى بالىقتار مەن دەكوراتيۆتى وسىمدىكتەر وسىرىلەدى»،- دەدى ع.مۇتانوۆ.

الماتى اكىمى «ەكسپو-2017» وتكىزۋگە ىقپال ەتكەن عىلىم مەن يننوۆاسيالىق جوبالاردى دامىتۋ مەن ەنگىزۋگە مەملەكەت تاراپىنان قولداۋ كورسەتىلىپ جاتقانىن اتاپ ءوتتى. قازىرگى كەزدە الماتىدا جاس ستارتاپەرلەرگە جانە ولاردىڭ جوبالارىن كوممەرسيالاندىرۋعا ەرەكشە نازار اۋدارىلۋدا.

ۋنيۆەرسيتەتتى ارالاپ شىققان باۋىرجان بايبەك اكىمدىك ءتيىستى باسقارلامارىنا ءال - فارابي اتىنداعى قازۇۋ-دەگى قىزىق جوبالاردى زەرتتەۋدى ءارى ءتيىمدى قولدانۋدى تاپسىردى. سونىڭ ىشىندە، جىلۋ ەلەكترستانسيالارىنىڭ ەكولوگيالىق - ەكونوميكالىق كورسەتكىشىن ارتتىراتىن پلازمالى جىلۋ جۇيەسى، تقق ۋتيليزاسيالاۋ جانە قۇرىلىس پەن وندىرىستە پايدالانىلاتىن پوليەفيرلى سمول ءوندىرىسى جوبالارى ءتيىمدى ەكەنىن كورسەتتى.