ەلباسى تاپسىرماسىنان كەيىن ءال-فارابي كوشەسىنەن جوعارى تاۋ بوكتەرىندە بىردە ءبىر كوپ قاباتتى تۇرعىن ءۇي سالىنعان جوق. بۇل تۋرالى بۇگىن الماتى قالاسى وڭىرلىك كوممۋنيكاسيالار قىزمەتى الاڭىندا بوستاندىق اۋدانىنىڭ اكىمى بەكقالي تورعايەۆ ايتتى.

«2016 جىلدىڭ باسىندا بەرىلگەن ەلباسى نۇرسۇلتان نازاربايەۆتىڭ تاپسىرماسىنان كەيىن ءال-فارابي كوشەسىنەن جوعارى قاراي كوپ قاباتتى ۇيلەر سالىنعان جوق. قالالىق ءماسليحات دەپۋتاتتارى وسى تاپسىرماعا سايكەس تاۋ بوكتەرىندە سالىناتىن ۇيلەردىڭ بيىكتىگى 12 مەتردەن اسپاۋ قاجەت دەگەن شەشىم قابىلداعان بولاتىن. قالا قۇرىلىسى كەڭەسىندە وسىدان كەيىن بىردە ءبىر جوبا ورىندالعان جوق. ەلباسى تاپسىرماسىنا دەيىن شەشىم العاندارعا مونيتورينگ جۇرگىزدىك. ءبىزدىڭ اۋداندا «بازيس» كومپانياسىنىڭ 7 قاباتتى ءۇي سالۋ جوباسى بار ەدى، سونى 3 قاباتقا شەگەردىك»، – دەدى اۋدان اكىمى.

سونىمەن قاتار، اۋدان اكىمى 2017 جىلى بوستاندىق اۋدانىندا ەلباسىنىڭ «بولاشاققا باعدار: رۋحاني جاڭعىرۋ» ماقالاسىن ىسكە اسىرۋ ماقساتىندا 10-نان استام جوبالار ماقۇلدانىپ، جۇزەگە اسىرىلعانىن ايتتى.

«بيىلعى جىلى اۋدانىمىزدا 14 جاڭا بالالارعا ارنالعان سپورت الاڭدارى اشىلدى. ءبىرقاتار كوشەلەر اباتتاندىرىلدى. ءتول مادەنيەتىمىزدى دارىپتەۋ ماقساتىندا جاستار اراسىندا «جاس وركەن» فەستيۆالى ۇيىمداستىرىلدى. ءبىرقاتار كوشەلەردىڭ اتاۋى وزگەردى. وزدەرىڭىز جاقسى بىلەتىندەي ءبىزدىڭ اۋداننىڭ ماگيسترالدى، باستى كوشەلەرىنىڭ ءبىرى – بۇرىنعى فۋرمانوۆ كوشەسىنە ەلىمىزدىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ ەسىمى بەرىلدى. بۇل ءبىزدىڭ قالامىز ءۇشىن، ونىڭ ىشىندە اۋدان تۇرعىندارى ءۇشىن زور ماقتانىش، ۇلكەن ابىروي»، – دەدى ول.

بەكقالي تورعايەۆتىڭ ايتۋىنشا، 2017 جىلدىڭ قاڭتار-قازان ايلارىنا سايكەس، بوستاندىق اۋدانىندا مەملەكەتتىك كىرىستەر كولەمى 273،6 ملرد. تەڭگەنى قۇراپ وتىر. «جوسپار 74،0% ورىندالدى. ونىڭ ىشىندە رەسپۋبليكالىق – 182،2 ملرد تەڭگە (67،0%) بولسا، جەرگىلىكتى – 91،4 ملرد. تەڭگە (90%)»، – دەدى اكىم.

قازىرگى تاڭدا، بوستاندىق اۋدانىندا جالپى سانى 44 ءىرى جانە ورتا، 884 كىشى كاسىپورىندار تىركەلگەن. الماتى قالاسى بويىنشا بوستاندىق اۋدانىندا كاسىپورىن ونىمدەرىنىڭ ۇلەسى 10،4% قۇرايدى.

«اعىمداعى جىلدىڭ قاڭتار-قازان ايلارى ارالىعىندا نەگىزگى كاپيتالعا قۇيىلعان ينۆەستيسيالار كولەمى 119،9 ملرد. تەڭگەگە جەتتى. بىلتىرعى كورسەتكىشپەن سالىستىراتىن بولساق 125% ءوسىپ وتىر (95،9 ملرد. تەڭگە)»، -دەدى ب.تورعايەۆ.

اۋدان اكىمى ءوز بايانداماسىندا بوستاندىق اۋدانىندا 24 836 كاسىپورىن تىركەلگەنىن، قازىرگى تاڭدا ولاردىڭ 12 896 تۇراقتى جۇمىس ىستەپ تۇرعاندىعىن ايتتى.