قازاقستان مۇسىلماندارى YIII قۇرىلتايىندا جاڭادان سايلانعان باس ءمۇفتي سەرىكباي قاجى وراز ۇلى ءوزىنىڭ مىندەتتەرى تۋرالى ايتتى.

باس ءمۇفتي ءوزىنىڭ الدىنا قويىلعان ماقسات-مىندەتتەر تۋرالى تىلگە تيەك ەتتى.

«مەن ءۇشىن بۇل توسىن شەشىم. ءوزىمدى كومەكشى، ورىنباسار رەتىندە جاقسى سەزىنەمىن. ءبىراق تاڭداۋ وسىنداي بولعاندىقتان، بۇل ۇلكەن اماناتتى بارلىق ارىپتەستەرىممەن ابىرويمەن اتقارامىن دەپ ويلايمىن. الداعى 5 جىلدا الدىمىزعا قويىلعان بارشا باستامالاردى ودان ءارى ورىنداپ، دامىتۋ جولىندا ەڭبەك ەتەمىن. قۇراندى بۋكۆاليزم تانىمىمەن تۇسىنۋگە توسقاۋىل قويىپ، قۇران تۇسىندىرمەلەرىن پايىمدى ءتۇسىندىرۋ جولىندا قوعام مەن ءدىندارلار اراسىندا بايلانىس ارتتىرۋعا جۇمىس جاسايتىن بولامىز. ۇلكەن قىزمەتتى بار كۇش جىگەرىممەن، ارىپتەستەرىمنىڭ كومەگىمەن، قوعامداعى دۇرىس جان-جاقتى بولعان يممامدار ورتاسىن قالىپتاستىرا وتىرىپ، ءبىزدىڭ حالقىمىزدا اتا-بابا قالىپتاسقان ءداستۇرلى ءدىني تانىم مەكتەبىن جاڭعىرتىپ، العا قويعان ماقساتتى بىرگە اتقارامىز. قازاقستان مۇسىلماندارى تۇعىرناماسىندا دا جولىمىزدى ايقىنداپ العانبىز. جات پيعىلدى ورتاعا جول بەرمەيمىز. وعان قارسى تۇرا الاتىن يمۋنيتەت قازاقستان مۇسىلماندارى يسلامتانۋ ينستيتۋتىنىڭ ءرولى كۇشتى، ءبىلىم تاجىريبەلەرى جەتەرلىك دەپ ويلايمىن»، - دەدى باس ءمۇفتي.

ايتا كەتۋ كەرەك، بۇگىن الماتىدا قازاقستان مۇسىلماندارىنىڭ YIII قۇرىلتايى ءوتتى. جيىن بارىسىندا قۇرىلتايعا قاتىسۋشى 300-دەن استام دەلەگات سەرىكباي قاجى وراز ۇلىنىڭ كانديداتۋراسىن ءبىراۋىزدان قولدادى. جاڭا باس ءمۇفتي 4 جىل، ياعني 2018-2022 جىلدار ارالىعىندا قىزمەت اتقاراتىن بولادى. سونداي-اق باس ءمۇفتي ورىنباسارلارى لاۋازىمىنا ناۋرىزباي قاجى تاعان ۇلى، الاۋ ادىلبايەۆ، باۋىرجان ەسماحانوۆ سايلاندى.

بۇعان دەيىن باس ءمۇفتي قىزمەتىن اتقارىپ كەلگەن ەرجان مايامەروۆ ءوز ەركىمەن قىزمەتىنەن كەتتى.

مەشىتتەگى جاماعاتتىڭ اۋىزبىرشىلىگىن ارتتىرىپ، بىرەگەي قۇلشىلىق جاساۋ ءتارتىبىن ورناتۋ ماقساتىندا قمدب مەشىتتەرىنىڭ ەرەجەسى قابىلداندى. 2015 جىلى اقپاندا ەلىمىزدە تۇڭعىش رەت «يسلام - بەيبىتشىلىك پەن كەلىسىم ءدىنى» تاقىرىبىندا ءى رەسپۋبليكالىق يمامدار فورۋمى ءوتتى. شارا اياسىندا «قازاقستان مۇسىلماندارى ءدىني باسقارماسىنىڭ تۇعىرناماسى»، «ءدىن قىزمەتكەرىنىڭ ەتيكاسى»، «يمامنىڭ تۇلعالىق كەلبەتى»، «مۇسىلمان كەلبەتى» اتتى ماڭىزدى قۇجاتتار قابىلداندى.

«قمدب جانىنداعى عۇلامالار كەڭەسىنىڭ جاڭا قۇرامى جاساقتالدى. كەڭەستە 17 عالىم جۇمىس ىستەيدى. ونىڭ 9-ى عىلىم دوكتورى، قالعانى ماگيسترلەر. ءبىز ءدىني باسقارما قىزمەتى اياسىندا 2014-2015 جىلدى «ءدىن مەن ءداستۇر» جىلى دەپ جاريالادىق. قمدب جانىنان ءدىني ءبىلىمى تەرەڭ، تاجىريبەسى مول بىلىكتى ءدىن عالىمدارىنىڭ باسىن بىرىكتىرگەن اقپاراتتىق ناسيحات توپتارى قۇرىلدى. ولار حالىق اراسىندا ءتۇسىندىرۋ جۇمىستارىن جۇرگىزدى. جات اعىمعا كەتكەن جاستارىمىز ءداستۇرلى حانافي مازھابىن تاڭداپ، ورتامىزعا ورالۋدا. 2017 جىلى اتقارىلعان جۇمىستار ناتيجەسىندە جات اعىمنىڭ ارباۋىندا جۇرگەن 940 ازامات حانافي مازحابىن تاڭداپ، قاتارىمىزعا قوسىلدى. 2013-2017 جىلدار ارالىعىندا جالپى سانى 4967 ادام راديكالدى رايىنان قايتتى»، -دەدى ەرجان مالعاجى ۇلى.

ايتا كەتسەك، قازاقستان مۇسىلماندارى ءدىني باسقارماسىنىڭ كەڭسەسى 2014 جىلى الماتىدان استانا قالاسىنا كوشىرىلگەن بولاتىن.