الماتىدا نۇرسۇلتان نازاربايەۆ داڭعىلىندا العاشقى جول نۇسقاۋلىقتارى پايدا بولدى. جول نۇسقاۋلىقتارى فۋرمانوۆ كوشەسىن اۋىستىرعان كۇننىڭ ەرتەسىندە بىردەن قويىلىپ وتىر.
فۋرمانوۆ كوشەسى 30 قاراشا كۇنى ءماسليحات دەپۋتاتتارىنىڭ شەشىمىمەن نۇرسۇلتان نازاربايەۆ داڭعىلىنا اۋىستىرىلعان بولاتىن.
الماتى قالاسى اكىمدىگىنىڭ باسپا ءسوز قىزمەتى جۇزەگە اسىرىلىپ جاتقان «Almaty Smart City» تۇجىرىمداماسىنىڭ جاڭا نۇسقاۋلىقتارعا قالا بيۋدجەتىنەن ءبىر تەڭگە دە جۇمسالماعانىن جەتكىزدى.
ايتا كەتەيىك، تۇجىرىمداما «Billboard Video Digital Broadcast» كومپانياسىنىڭ ينتەللەكتۋالدى-اقپاراتتىق ناۆيگاسيالىق كولىك جۇيەسى جوباسىنا تيەسىلى. جوبا جوعارى ساپالى LED-ديسپلەيمەن، بورت كومپيۋتەرلەرمەن، جول اپاتىن بىلدىرەتىن، اۋا رايىن، كۋرس باعامىن حابارلايتىن ناۆيگاسيالىق حابارلاعىشتارمەن قامتىلعان جول بويىنداعى مەتتالوقۇرىلعىلاردىڭ اقپاراتتىق-تەحنيكالىق كەشەنىنەن تۇرادى.
قازىرگى ۋاقىتتا الماتىدا ءدال وسىنداي 44 مەديابورد جانە جاڭا الاڭدا ءبىر «Jumbo» مەگابوردى جۇمىس ىستەپ تۇر. سونداي-اق، مەدەۋ اۋداندىق حالىققا قىزمەت كورسەتۋ ورتالىعىندا «اقىلدى حقو» پيلوتتىق جوباسى ىسكە قوسىلدى.
كومپانيا الداعى ۋاقىتتا «اقىلدى قالا» جوباسىن استانا مەن اقتاۋ قالالارىندا، الماتىداعى جاياۋ جۇرگىنشىلەر، اۆتوتۇراق ايماقتارى مەن ساۋدا ورتالىقتارىندا جانە قازاقستاننىڭ وزگە قالالارىنداعى حقو-نىڭ In-door جۇيلەرىنە ەنگىزبەك. ايتا كەتەرلىگى، قازاقستاندىق «Smart-City» ەكو-جۇيەسىن اتالعان كومپانيا جۇڭگو، سينگاپۋر، ءباا، رەسەيگە ەنگىزۋ تۋرالى كەلىسىمشارتقا قول جەتكىزگەن.
ايتا كەتەر بولساق، قالا اكىمى باۋىرجان بايبەك ونوماستيكالىق كوميسسياعا الماتىداعى قايتالاناتىن 112 كوشەنىڭ اتتارىن وزگەرتۋ تۋرالى ۇسىنىس ەنگىزىلگەننەن كەيىن قالا تۇرعىندارى، زيالى قاۋىم مەن ۇكىمەتتىك ەمەس ۇيىمداردىڭ وكىلدەرى، اسىرەسە جاستار فۋرمانوۆ كوشەسىنە ەلباسى اتىن بەرۋدى ۇسىنعان بولاتىن.
الماتىداعى ەڭ ءىرى كوشەنىڭ بىرىنە قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆتىڭ ەسىمىن بەرۋ تۋرالى مەگاپوليستەگى كوپتەگەن تۇرعىننىڭ ۇسىنىستارى قالالىق جانە ۇكىمەت جانىنداعى رەسپۋبليكالىق ونوماستيكالىق كوميسسيا تاراپىنان قولداۋ تاپقان.
"نۇرسۇلتان نازاربايەۆ – الەمدىك دەڭگەيدە الدەقاشان مويىندالعان تۇلعا. كەشەگى الاش ارىستارىنىڭ ارمانىن جۇزەگە اسىرعان جاڭا تۇرپاتتى، تاۋەلسىز قازاق ەلىنىڭ نەگىزىن قالاعان ادام دەپ ابدەن ايتۋعا بولادى. سوندىقتان بۇل كىسىنىڭ ەڭبەگى ۇلانعايىر. مەنىڭشە، بۇل قۇرمەت ەلباسىعا عانا ەمەس، ەلىمىزگە، تاۋەلسىزدىككە كورسەتىلگەن قۇرمەت دەپ ەسەپتەيمىن"، - دەپ ايتىپ وتكەن بولاتىن قالالىق ءماسليحاتتىڭ دەپۋتاتى قالي سارسەنباي.
"تەك جاستاردان 10 مىڭنان استام ۇندەۋ كەلىپ ءتۇستى. وعان دەيىن سوڭعى بىرنەشە جىلدا 20-دان استام ۇكىمەتتىك ەمەس ۇيىمدار مەن جەكەلەگەن ازاماتتاردان ناقتى ۇسىنىستار بەرىلگەن. بار عۇمىرىن ەلىنە قىزمەت ەتۋگە ارناعان ەلباسى تۇلعاسىنا كەلگەندە بۇل – وتە زاڭدى قۇبىلىس. ءار ءداۋىردىڭ ءوز تۇلعاسى بار. ال پرەزيدەنت نۇرسۇلتان نازاربايەۆتىڭ ورنى بولەك. كوشەنىڭ اتىن ەلباسىعا بەرۋ ەلدىكتىڭ، پرەزيدەنتتىڭ ەل الدىندا اتقارعان ولشەۋسىز ەڭبەگىن قۇرمەتتەۋى"، - دەپ اتاپ ءوتتى الماتى قالاسىنىڭ اكىمى باۋىرجان بايبەك.
