"ارسەلورميتتال تەمىرتاۋ" كومپانياسىنىڭ باس ديرەكتورى پارامجيت كالون "شاحتا جۇمىسىن توقتاتىپ، جەر استىندا رۇقساتسىز وتىرۋ - ماسەلەنى شەشپەيتىنىن" ايتىپ، ەرەۋىلدەپ جاتقان كەنشىلەردى شاحتادان شىعۋعا شاقىردى دەپ ازاتتىققا سۇيەنە وتىرىپ جازادى Qamshy.kz اقپارات اگەنتتىگى. 

كومپانيا مەن قاراعاندى وبلىستىق اكىمدىگىنىڭ حابارلاۋىنشا، 13 جەلتوقساندا قازاقستان پرەمەر-مينيسترى باقىتجان ساعىنتايەۆ پەن لاكشمي ميتتال تەلەفونمەن سويلەسكەن. "جەرگىلىكتى بيلىك ورگاندارىنىڭ قاتىسۋىمەن بىرلەسە جۇمىس ىستەپ، ديالوگتى جالعاستىرۋ كەرەك. ءبىراق ول ديالوگ سىزدەر [شاحتادان - رەد] جەر بەتىنە شىققان كەزدە عانا بولادى.

وسىنشا ۋاقىت جەر استىندا وتىرۋ وتە ءقاۋىپتى جانە دەنساۋلىقتارىڭىزعا كەرى اسەر ەتەدى. سىزدەردى بىرلەسىپ، تاياۋ ۋاقىتتا وڭتايلى شەشىم تابۋعا شاقىرامىن" دەلىنگەن "ارسەلورميتتال تەمىرتاۋدىڭ" باس ديرەكتورى پارامجيت كالوننىڭ كەنشىلەرگە ۇندەۋىندە. قاراعاندى وبلىسى اكىمدىگىنىڭ مالىمەتىنشە، 11 جەلتوقساندا تۇنگى اۋىسىمنان سوڭ شاحتادان شىعۋعا باس تارتقان 600-دەن استام كەنشى ءالى جەر استىندا وتىر.

اكىمدىكتىڭ حابارلاۋىنا قاراعاندا، باستاماشىل توپ وكىلدەرىمەن كەشە وتكەن كەزدەسۋدە "ارسەلورميتتال تەمىرتاۋ" باسشىسى كومپانيا كەنشىلەر وكىلدەرىمەن شاحتالارداعى بارلىق كەنشىلەر تاياۋ ۋاقىتتا جەر بەتىنە شىققان جاعدايدا عانا كەلىسسوز باستاۋعا دايار ەكەنىن ايتتى. "بۇل تالاپ ورىندالعان جاعدايدا جۇمىس بەرۋشە قانداي دا ءبىر جازالاۋدىڭ بولمايتىنىنا كەپىلدىك بەرەدى" دەپ حابارلادى وبلىس اكىمىنىڭ باسپا ءسوز قىزمەتى. كەيبىر اقپاراتتار بويىنشا، باستاماشىل توپ وسى كەزدەسۋدەن كەيىن جەر استىنداعى كەنشىلەرمەن سويلەسۋ ءۇشىن شاحتالارعا كەتكەن. كەنشىلەردىڭ كەلىسسوز جۇرگىزۋ ءۇشىن جەر بەتىنە شىعۋعا كەلىسكەنىن، يا كەلىسپەگەنىن ءبىلۋ ازىرگە مۇمكىن بولماي تۇر. جۇزدەگەن كەنشى ءتورت تاۋلىكتەن استام ۋاقىت جەر استىندا وتىر.

كەنشىلەردىڭ مالىمەتىنشە، "ارسەلورميتتال تەمىرتاۋدىڭ" ءتورت شاحتاسىندا 700-دەن استام ادام ەرەۋىلدەپ تۇر. جەر بەتىنە شىعۋدان باس تارتقان كەنشىلەر بىرنەشە تالاپ قويىپ وتىر. ولاردىڭ ەڭ باستىلارى - جالاقىنى 100 پايىزعا كوبەيتۋ، زەينەتكەرلىككە 50 جاستان شىعارۋ، ەڭبەككە جارامسىزدىق پاراعى بويىنشا تولەمدى 100 پايىزعا دەيىن تولىق تولەۋ، 2017 جىلدىڭ "13-اي جالاقىسىن" تولەۋ. 

"ارسەلورميتتال تەمىرتاۋ" - قاراعاندى مەتاللۋرگيالىق كومبيناتى قاراعاندى كومىر باسسەينىنىڭ شاحتالارىنا يە بولات قۇيۋ جانە تاۋ-كەن قىزمەتىمەن اينالىساتىن كومپانيا. ول ءۇندىستاننان شىققان بريتاندىق بيزنەسمەن لاكشمي ميتتالعا تيەسىلى ترانسۇلتتىق "ارسەلورميتتال" مەتاللۋرگيالىق توبى قۇرامىنا كىرەدى. "ارسەلورميتتال تەمىرتاۋ" قۇرامىندا قۇرىش، كومىر، بولات قۇيۋ جانە قۇبىر دەپارتامەنتتەرى بار.