استانا قالاسى اكىمدىگىنىڭ اپاتتى ۇيلەردى ءسۇرىپ تاستاۋ بويىنشا پيلوتتىق جوباسى ءساتتى جۇزەگە اسىرىلۋدا. جىل باسىنان بەرى 98 اپاتتى ءۇيدىڭ تۇرعىندارى جاڭا ۇيلەرگە كوشتى، دەپ حابارلايدى Qamshy.kz اقپارات اگەنتتىگى استانا قالاسى اكىمدىگىنىڭ مەديا ورتالىعىنا سىلتەمە جاساپ.

استانا قالاسى تۇرعىن ءۇي باسقارماسىنىڭ اقپاراتى بويىنشا 2013-2016 جىلدار ارالىعىندا 117 اپاتتى ءۇي ءسۇرىلىپ، 1570 وتباسى جاڭا ۇيگە كوشكەن.

«وسى جىلى 111 اپاتتى ۇيدەن، 1863 وتباسىنى كوشىرۋ جوسپارلانعان، سونىمەن قاتار، قازىرگى كەزدە 98 اپاتتى ۇيدەن 1425 وتباسىنى جاڭا ۇيلەرگە كوشىرۋ اياقتالۋدا. بەرىلىپ جاتقان ۇيلەر مىنا مەكەنجايلار بويىنشا استانا قالاسى، «ەسىل» اۋدانى ە 16 كوشەسى، № 2،4،6 ۇيلەر جانە قۇتپانوۆ كوشەسى 28 ءۇي»، دەپ حابارلادى باسقارما.

قازىرگى تاڭدا قالعان 13 اپاتتى ۇيدەن 404 وتباسىنى كوشىرۋ ءۇشىن پاتەرلەردى تاپسىرۋ جۇمىستارى جۇرگىزىلىپ جاتىر. سۇرىلگەن اپاتتى ۇيلەردىڭ ورنىنا ساياباق، الاڭ، سپورتتىق الاڭدار سالۋ جوسپارلانعان.

ال، سۇرىلگەن ەسكى ۇيلەردىڭ كەي ورىندارىنا ەگەر ينجەنەرلىك كوممۋنيكاسيالار تولىق تارتىلعان بولسا «نۇرلى جەر» باعدارلاماسى اياسىندا كوپقاباتتى تۇرعىن ءۇي كەشەنىن سالۋ جوسپارلانعان (قۇتپانوۆ-التىنەمەل، شىنتاس، رەسپۋبليكا مەن ماسكەۋ).

مەكەمەنىڭ حابارلاۋىنشا، ءقازىر ءسۇرىلىپ جاتقان 228 اپاتتى ۇيدەن بولەك، قوسىمشا تاعى 82 اپاتتى جاتاق تەكتەس ۇيلەر سۇرىلۋگە جاتقىزىلدى.

ەستەرىڭىزگە سالا كەتەيىك، اپاتتى-ەسكى ۇيلەردى ءسۇرىپ تاستاۋ بويىنشا پيلوتتىق جوبا العاش رەت ەلوردادا تمد ەلدەرى اراسىندا وتكىزىلۋدە.