وڭتۇستىك قازاقستان وبلىسىندا "دەسترۋكتيۆتى اعىم مۇشەلەرى" دەپ ۇستالعان ءۇش كۇدىكتىنىڭ ءبىرى الپامىس جۇسىپبەكوۆكە ۇكىم وقىلىپ، 3 جىلعا باس بوستاندىعى شەكتەلدى. بۇل تۋرالى ازاتتىققا سارىاعاش اۋداندىق سوتىنىڭ سۋدياسى بەرىك كايۋپوۆ ايتتى، دەپ Qamshy.kz اقپارات اگەنتتىگى جازادى. 

"الپامىس جۇسىپبەكوۆ قىلمىستىق كودەكستىڭ 174-بابىنىڭ 1-بولىگى ("جاريا تۇردە نەمەسە اقپارات قۇرالدارى ارقىلى ءدىني ارازدىقتى قوزدىرۋ") بويىنشا كىنالى دەپ تانىلىپ، ءۇش جىل مەرزىمگە باس بوستاندىعىن شەكتەۋ جازاسى تاعايىندالدى" دەيدى سۋديا. سوت ۇكىمى زاڭدى كۇشىنە ءالى ەنبەگەن.

سوت ماتەريالدارى بويىنشا، جۇسىپبەكوۆ "2009 جىلدان باستاپ ءدىن ۇستانعان، 2017 جىلدىڭ 1 تامىزىندا "الىپ" ساۋدا ورتالىعىنداعى ۇيالى تەلەفوندار ساتاتىن دۇكەنىندە ۇيالى تەلەفون ساتىپ، ۇلتتىق جانە ءدىني ارازدىق تۋدىراتىن نەمەسە الاۋىزدىقتى ناسيحاتتايتىن بەينەتاسپالاردى وتكىزگەن. تەرگەۋ بارىسىندا مامىلە ءتۇزىلىپ، جۇسىپبەكوۆ كىناسىن تولىق مويىنداعان" دەيدى سۋديا.

شىمكەنتتەگى "گارانت" دۇكەندەرى اۋماعىندا "دەسترۋكتيۆتى ءدىني اعىم مۇشەسى" رەتىندە ۇستالعانداردىڭ ءبىرى باقىتجان ىزتىلەۋوۆتىڭ ايەلى ايگۇل ساتييەۆانىڭ ازاتتىققا ايتۋىنشا، باقىتجان ىزتىلەۋوۆتى قاماۋعا الۋ مەرزىمى تاعى ءبىر ايعا ۇزارتىلعان.

ال سامات بوراشيەۆتىڭ ءىسى سوتقا تۇسكەنىن ازاتتىققا ماقتارال اۋداندىق سوتىنىڭ سۋدياسى سەيىلحان مۇسابەكوۆ راستادى. ونىڭ سوزىنشە، بوراشوۆتىڭ ءىسىن قاراۋ 14 جەلتوقسانعا بەلگىلەنگەنىمەن، كۇدىكتىنىڭ سوت زالىنا جەتكىزىلمەۋىنە بايلانىستى 22 جەلتوقسانعا قالدىرىلعان.

باقىتجان ىزتىلەۋوۆ 19 قىركۇيەكتە شىمكەنتتە، الپامىس جۇسىپبەكوۆ - سارىاعاش قالاسىندا، سامات بوراشيەۆ جەتىساي قالاسىندا ۇستالعان.

20 قىركۇيەكتە ۇستالعان ۇشەۋى شىمكەنتتە "دەسترۋكتيۆتى ءدىني اعىم مۇشەلەرىنەن قۇرالعان قىلمىستىق توپ" قۇرامىندا بولدى دەگەن كۇدىكپەن 19 قاراشاعا دەيىن قاماۋعا الىنعان بولاتىن.

جۇسىپبەكوۆ پەن بوراشيەۆ قىلمىستىق كودەكستىڭ 174-بابىنىڭ 1-بولىگى بويىنشا كۇدىكتى دەپ تانىلعان. ال ىزتىلەۋوۆ 174-باپتىڭ 1 جانە 2-بولىگى ("الدىن الا ءسوز بايلاسۋ ارقىلى ءدىني الاۋىزدىقتى قوزدىرۋ")، 256-باپتىڭ 1ء-بولىمى ("تەرروريزمدi ناسيحاتتاۋ نەمەسە تەرروريزم اكتiسiن جاساۋعا جاريا تۇردە شاقىرۋ") بويىنشا كۇدىكتى دەپ تانىلعان.