قاراعاندى وبلىسىندا ەرەۋىلدەگەن بارلىق كەنشى شاحتالاردان شىقتى دەپ جازادى Qamshy.kz اقپارات اگەنتتىگى قاراعاندى اكىمدىگىنە سىلتەمە جاساي وتىرىپ.

«ارسەلورميتتال تەمىرتاۋ» اق شاحتالارىنداعى ەرەۋىل اياقتالدى. «قازاقستان» شاحتاسىنىڭ جۇمىسشىلارى وبلىس اكىمى ەرلان قوشانوۆ جانە امت اتقارۋشى ديرەكتورى ۆاديم باسينمەن كەزدەسكەن سوڭ جەر بەتىنە شىعا باستادى. كەيىن «شاحتينسك»، «تەنتەك» جانە «لەنين» اتىنداعى شاحتا كەنشىلەرى جەر استىنان كوتەرىلدى.

15 جەلتوقساندا تۇنگى ساعات بىرگە قاراي بارلىق كەنشىلەر جەر استىنان شىعا باستادى. جەر استىنان 420-داي كەنشى شىقتى.

جۇمىس بەرۋشى كەنشىلەرگە  كەلەسى شارتتاردى ۇسىنىپ وتىر: كەنشىلەردىڭ جالاقىسى وتىز پايىزعا كوتەرىلەدى. ءارى قاراي كەلىسسوز جۇرگىزۋ بارىسىندا كوميسسيا جەر ۇستىندە جۇمىس ىستەيتىن كەنشىلەردىڭ جالاقىسىن ءوسىرۋ ماسەلەسىن شەشەدى.  كومىر دەپارتامەنتىنىڭ بارلىق جۇمىسشىسىنا ءبىر جالاقى كولەمىندە ءبىر رەتتىك سىياقى تولەنەدى.

تاعى ايتا كەتەتىنى جۇمىس بەرۋشى 15 جەلتوقساندى دەمالىس كۇنى دەپ جاريالاپ، 16 جەلتوقساننان باستاپ جۇمىسقا كىرۋدى ۇسىندى.

«كەنشىلەر اراسىندا شاحتينسك قالاسىنىڭ پروكۋرورى قول قويعان حات كەنشىلەر اراسىندا تاراتىلدى.  حاتتا  كەنشىلەرگە ەرەۋىلگە شىققانى ءۇشىن قىلمىستىق قۋدالاۋعا ۇشىرامايتىنى ايتىلعان.  بۇدان بولەك، پروكۋراتۋرا ورگانى قاجەت بولعان جاعدايدا قۇقىقتىق قولداۋ كورسەتۋگە دايىن»، — دەپ حابارلادى اكىمدىك.