الماتى مەتروسىنداعى «دوستىق»،«سارىارقا» بەكەتتەرىنىڭ قۇرىلىسى ودان ءارى جالعاسادى. بۇل تۋرالى الماتى قالاسىنىڭ ءماسليحاتى بەكىتكەن 2018 جىلعى بيۋدجەتىندە ايتىلعان.

الماتىدا VI شاقىرىلىمداعى قالالىق ءماسليحاتتىڭ XXVء-شى سەسسياسى بارىسىندا قالانىڭ 2018 جىلعى بيۋدجەتى بەكىتىلدى. كەلەر جىلعى بيۋدجەتتە الماتى مەتروسىنىڭ «دوستىق»،«سارىارقا» بەكەتتەرىنىڭ قۇرىلىسىن ودان ءارى جالعاستىرۋ قاراستىرىلعان.

«جاڭا بەكەتتەر ىسكە قوسىلعاندا جولاۋشى لەگى 1،5 ەسەگە ارتىپ، جىلىنا 18 ملن جولاۋشى تاسىمالدانادى. كەلەر جىلى ينۆەستوردى  انىقتاۋ بويىنشا كونكۋرس وتەدى، سونىمەن قاتار جرك (جەڭىل رەلستى كولىك - رەد) جوباسىنىڭ اياسىندا جۇمىستار قولعا الىنادى»، دەلىنگەن حابارلامادا.

سونداي-اق كەلەر جىلى قوعامدىق كولىك پەن كولىك ينفراقۇرىلىمىن دامىتۋ باعدارلاماسى دا جالعاسىن تاپپاق.

«بۇل ەكى باعىتقا باسىمدىق بەرىلەدى. بيۋدجەتتەگى بارلىق شىعىننىڭ بەستەن ءبىر بولىگى جۇمسالادى. بيىلعى جىلى قالانىڭ اۆتوبۋس پاركى  30%-عا جاڭاردى، 180 شاقىرىمنان استام جول جوندەلدى. كەلەر جىلى جوعارى ساپالى قىزمەت كورسەتەتىن جاڭا اۆتوبۋستارعا سۋبسيديا بولىنەدى. 600 مىڭنان استام تۇرعىندى جەڭىلدەتىلگەن كەستە بويىنشا تاسىمالداۋ جالعاسادى. بۇلاردان وزگە، قالادا سىيىمدىلىعى جوعارى اۆتوبۋستاردا جولاۋشىلاردى ەكسپرەسس-تاسىمالداۋ قايتا  جاڭعىرادى. بيىلعى جىلى BRT-نىڭ العاشقى كەزەگىنىڭ 2،7 شاقىرىم جەلىسى جاسالدى، 2018 جىلى جوبانىڭ ەكىنشى كەزەڭىنىڭ جوبالىق سمەتالىق قۇجاتتاماسى جاسالادى»، دەلىنگەن حابارلامادا.

ءماسليحات دەپۋتاتتارى بەكىتكەن جوبادا قالانىڭ تاريحي ورتالىعىن قايتا جاساۋ جۇمىستارى جۇرگىزىلە بەرەتىندىگى كورسەتىلگەن.

«تولە بي كوشەسى - دوستىق داڭعىلى - اباي داڭعىلى - ەسەنتاي وزەنىنىڭ جاعالاۋى ەنگەن، ياعني تاريحي ورتالىقتىڭ 178 گەكتار جەرى قايتا جوندەۋدەن وتەدى. كەلەر جىلى 17 جاياۋ جۇرگىنشى ايماعى اباتتاندىرىلادى، حالىقارالىق ستاندارت بويىنشا جاسالىپ جاتقان رەسپۋبليكا الاڭىن قايتا قۇرۋ جۇمىستارى اياقتالادى. قالاداعى ساياباقتاردى، سكۆەرلەردى جانە جاسىل ايماقتى دامىتۋ ءۇشىن 2018 جىلدىڭ بيۋدجەتىنەن وتكەن جىلمەن سالىستىرعاندا 6،3 ەسە كوپ قارجى جۇمسالادى»، - دەلىنگەن حابارلامادا.

الماتىدا 2018 جىلى 500 اۋلانى جوندەۋ قاراستىرىلعان. وسىلايشا، اباتتاندىرىلعان اۋلالار سانى 33%-عا جەتەدى.  

ايتا كەتەرلىگى، الماتىدا سوڭعى ەكى جىل ىشىندە 732 اۋلا الاڭدارى جوندەلدى.