الماتى قالاسىنىڭ مەدەۋ اۋدانىنداعى م.گوركيي اتىنداعى ساياباقتا ورنالاسقان «سپارتاك» ستاديونىندا ءتورتىنشى تەگىن مۇز ايدىنى اشىلدى.

الاڭنىڭ اشىلۋ سالتاناتىنا مەدەۋ اۋدانىنىڭ اكىمى ەرجان جىلقىبايەۆ پەن اباي اتىنداعى قازۇپۋ رەكتورى تاكير بالىقبايەۆ  قاتىسىپ، جينالعان قاۋىمدى تاۋەلسىزدىك مەرەكە قارساڭىندا قۇتتىقتاۋلارىن جەتكىزدى.

“قۇرمەتتى، قالا تۇرعىندارى مەن قوناقتارى! بارشاڭىزدى قاستەرلى  مەرەكەمىز تاۋەلسىزدىك كۇنىمەن شىن جۇرەكتەن قۇتتىقتايمىن! قالا اكىمدىگىنىڭ قولداۋىمەن «رۋحاني جاڭعىرۋ» باعدارلاماسىنىڭ اياسىندا الىپ شاھاردا تەگىن مۇز ايدىندارى اشىلۋدا. مۇنىڭ بارلىعى – قالا تۇرعىندارىن، اسىرەسە بالالاردى سپورتقا باۋلۋ ماقساتىندا اتقارىلىپ جاتقان جۇمىس”، – دەپ اتاپ ءوتتى اۋدان اكىمى ەرجان جىلقىبايەۆ.

اشىلۋ سالتاناتى كەزىندە الماتىلىق كلۋبتىڭ جاس حوككەيشىلەرى شەبەرلىك ساباعىمەن ونەر كورسەتىپ، پەداگوگيكالىق ۋنيۆەرسيتەت ستۋدەنتتەرىمەن بىرگە جاپپاي سىرعاناۋعا قاتىستى.

“ءبىز قوناقتارعا جاقسى كوڭىل كۇي سىيلاۋعا تىرىستىق. كۇن سايىن كونكي تەبەمىن دەپ ايتا المايمىن، الايدا قالامىزدا تەگىن مۇز ايدىندارىنىڭ اشىلىپ جاتقانىنا اسا قۋانىشتىمىن. بۇل – كەرەمەت جاڭالىق. ەندى دوستارىممەن بىرگە ءجيى كەلىپ تۇرامىز”، – دەپ ءبولىستى وقۋشىلار ءۇيىنىڭ تاربيەلەنۋشىسى البينا سافاروۆا.

ايتا كەتەيىك، الاڭ كاسىبي بورتتارمەن جاساقتالعان. تەحنيكالىق ءۇزىلىس مۇز ايدىنعا بايلانىستى جاسالادى. الداعى ۋاقىتتا تاماقتانۋ ورتالىقتارى دا اشىلاتىن بولادى. اتالعان مۇز ايدىندار تەك جاپپاي سىرعاناۋعا ارنالعان. ولار قىس مەزگىلىنىڭ سوڭىنا دەيىن جۇمىس ىستەيدى. جوبا ۇيىمداستىرۋشىسى الماتى قالاسىنىڭ اكىمدىگى بولىپ تابىلادى.

ەسكە سالايىق، بۇعان دەيىن قالادا تەگىن 3 مۇز ايدىنى اشىلعان بولاتىن. ولار ابىلاي حان كوشەسىندە، قازاقستاننىڭ تۇڭعىش پرەزيدەنتى ساياباعىنىڭ الدىندا جانە «مارت» ساۋدا ورتالىعىنىڭ جانىندا ورنالاسقان.

سونداي-اق، بىرنەشە كۇننەن كەيىن تەگىن مۇز الاڭدارى اۋەزوۆ اۋدانىندا، جاندوسوۆ كوشەسىندەگى «دۋبوك» ىقشام اۋدانىندا، بوستاندىق اۋدانىندا «ۆيللا دەي فيوري» كەشەنىنىڭ ماڭىندا  جانە الاتاۋ، ناۋرىزباي اۋداندارىندا  ىسكە قوسىلادى.