26 جىل بولىپتى-اۋ ەگەمەندى
ەل بولىپ ەڭسە تىكتەپ وڭالعالى
جاسىمىزدى ءبىر سىعىپ جانارداعى
باسىمىزدان قارا بۇلت جوعالعالى...
اقىنداردىڭ جىرىنا ارقاۋ بولعان تۇعىرلى تاۋەلسىزدىگىمىز وسىنداي شۋماقتارمەن قالىن كورەرمەننىڭ كوڭىلىن تەربەپ جاتتى.
ۇستىمىزدەگى جىلدىڭ 14 جەلتوقسانىندا اقتوبە قالاسى «ونەر ورتالىعىنداعىنىڭ» كونسەرتتىك زالىندا «جىر ارقاۋى-جاڭعىرۋ» اتتى رەسپۋبليكالىق اقىندار ايتىسى ءوتتى، دەپ جازادى Qamshy.kz اقپارات اگەنتتىگى.
وسىمەن جىلدىڭ قورىتىندى دوداسى بولىپ، بايگەگە التىن دومبىرا تىگىلەتىن ايتۋلى شارا وسىمەن 6-شى مارتە وتكىزىلىپ وتىر.
قازاقستان رەسپۋبليكاسى مادەنيەت جانە سپورت مينيستىرلىگىنىڭ ۇيىمداستىرىلۋىمەن وتكەن بۇل ايتىستىڭ اقىن، ساتيريك، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى، قازاقستان رەسپۋبليكاسى پرەزيدەنتى مەن حالىقارالىق «الاش» ادەبي سىيلىقتارىنىڭ لاۋرەاتى - كوپەن امىربەك تىزگىنىن ۇستاپ، جۇرگىزۋشىلىك ەتتى.
سونداي-اق، ايتىستا قارا قىلدى قاق جارىپ قازىلىق قىلعان قازاقستاننىڭ حالىق اقىنى، قازىلار القاسىنىڭ ءتوراعاسى قونىسباي ءابىل، حالىق اقىنى، «پاراسات» وردەنىنىڭ يەگەرى – اسەلحان قالىبەكوۆا، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى، قازاقستان رەسپۋبليكاسىنىڭ ەڭبەك سىڭىرگەن قايراتكەرى – قويشىعارا سالعارا ۇلى، اقىن، جازۋشىلار وداعىنىڭ مۇشەسى، «قۇرمەت» وردەنىنىڭ يەگەرى – مەيىرحان اقداۋلەت ۇلى، اقىن، حالىقارالىق «الاش» ادەبي سىيلىعىنىڭ يەگەرى – جانات ايمۇحامبەتوۆا، ايتىسكەر اقىن، 2014-جىلعى التىن دومبىرانىڭ يەگەرى – بالعىنبەك يماش، جازۋشى، قازاقستان رەسپۋبليكاسىنىڭ ەڭبەك سىڭىرگەن قايراتكەرى، «قۇرمەت» وردەنىنىڭ يەگەرى – قاجىعالي مۇحانبەتقالي ۇلى سىندى ەلىمىزگە ەلەۋلى ەڭبەك سىڭىرگەن اعا-اپالارىمىز اقىنداردىڭ باعاسىن بەرىپ ءادىل شەشىمىن شىعاردى.
ون اقىننىڭ ەكى اينالىمداعى جىر دوداسىنان وزا شىعىپ، باس بايگەنى قانجىعاسىنا بايلاعان جەتىسۋدىڭ جۇيرىگى جانداربەك بۇلعاقوۆ وسىمەن ەكىنشى مارتە التىن دومبىرا يەگەرى اتاندى.
ءبىرىنشى ورىندى الماتى قالاسىنان كەلگەن سىرىم اۋەزحان، ەكىنشى ورىندى وڭتۇستىك قازاقستان وبلىسىنىڭ اتىنان شىققان جارقىنبەك ناۋشابەك، ءۇشىنشى ورىندى استانا قالاسىنان اينۇر تۇرسىنبايەۆا مەن سارا توقتامىسوۆا جانە جامبىل وبلىسىنان شىققان اسەت دۇيسەبايەۆ يەلەندى. سونداي-اق، ورىن الماعان بارلىق قاتىسۋشىلار دا باعالى سىيلىقتارمەن ماراپاتتالدى.
بۇل ايتىستى وتكىزۋدەگى باستى ماقسات اقىنداردىڭ ورەلى ونەرى، ورنەكتى سوزدەرى ارقىلى تاۋەلسىزدىك مۇراتتارى مەن قۇندىلىقتارىن ناسيحاتتاۋ، «رۋحاني جاڭعىرۋ» باعدارلاماسىنىڭ ماڭىزدىلىعىن كوپشىلىككە پاش ەتۋ، وسكەلەڭ ۇرپاقتى وتانسۇيگىشتىككە تاربيەلەۋ، قازاقتىڭ ءتول ونەرى، قۇدىرەتتى ءسوزى ارقىلى مەملەكەتتىك ءتىلدىڭ مەرەيىن ارتتىرۋ بولىپ تابىلادى.
ەل تاۋەلسىزدىگى كۇنىنە وراي وتكىزىلەتىن ايتىستىڭ باستى تاقىرىبى ەلىمىزدىڭ جەتىستىكتەرى مەن دامۋى، سونداي-اق، ەگەمەندى ەلىمىزدىڭ قالىپتاسۋ تاريحى.
