وسى اپتادا Bloomberg بتا بانكىنىڭ «جوعالعان اكتيۆتەرىن» ىزدەۋ، ءابليازوۆ جانە حراپۋنوۆتىڭ وتباسىنا «اتلانت مۇحيتىنىڭ ەكى جاعىنان» تاعىلعان ايىپتار جايلى ەگجەي-تەگجەيلى جازعان. باتىستىڭ وزگە باق-تارى قازاقستان ينتەرنەتتى باقىلاۋدى كۇشەيتتى جانە تەلەاۋديتوريا ءۇشىن تالاستا رەسەيدەن ۇتىلىپ وتىر دەپ جازعان. بۇل تۋرالى Qamshy.kz اقپارات اگەنتتىگى ازاتتىققا سىلتەپ جازادى.

ءابليازوۆ پەن حراپۋنوۆتىڭ حيكاياسى

امەريكانىڭ Bloomberg جاڭالىقتار اگەنتتىگى بتا بانكىنەن جوعالعان اقشانى ىزدەۋ شارالارىنا قاتىستى تەكسەرۋ مەن ونىڭ بۇرىنعى باسشىسى مۇحتار ابليازوۆكە جانە الماتىنىڭ بۇرىنعى اكىمى ۆيكتور حراپۋنوۆتىڭ وتباسىنا تاعىلعان ايىپتاردى جان-جاقتى سيپاتتاعان «قازاقستاندىق بانكتەن جىمقىرىلعان ميللياردتاردىڭ ءبىر بولىگىن جاسىرۋ ءۇشىن Trump SoHo-نى پايدالانعان با؟» دەگەن كولەمدى ماقالا جاريالادى.

«قازاقستاندىق بتا سەگىز جىلدان بەرى ءۇش قۇرلىقتا بۇرىنعى ءتوراعا مۇحتار ابليازوۆكە قارسى زاڭ تۇرعىسىنان سوعىس جۇرگىزىپ كەلەدى. بۇل - قاستاندىق قاتەرى، قازاقستان ۇكىمەتىنىڭ كومپيۋتەرلەرىن بۇزۋ جانە بانكتىڭ كەمى ءتورت ميلليارد اكتيۆى جەتپەيدى دەگەن مالىمدەمەلەر جاسالعان قاقتىعىستى قامتيدى. ءقازىر اتلانتيكانىڭ ەكى جاعىندا [مىسالى، لوندون مەن نيۋ-يوركتە] قارالىپ جاتقان سوت ىستەرى الگى اكتيۆتەردىڭ كەيبىرى دونالد دج.ترامپتىڭ بۇرىنعى قىزمەتكەرلەرى سالعان جىلجىمايتىن مۇلىكتە جاسىرىلعان جوق پا دەگەن سۇراققا جاۋاپ بەرۋى مۇمكىن» دەپ جازعان Bloomberg.

سوت قۇجاتتارىندا تىركەلگەن كەي بولجام دەرەكتەرگە سايكەس، مۇحتار ءابليازوۆ ءوزىنىڭ كۇيەۋبالاسى ءارى ۆيكتور حراپۋنوۆتىڭ اسىراندى بالاسى ءىلياس حراپۋنوۆتىڭ كومەگىمەن Trump SoHo عيماراتىنان جىلجىمايتىن مۇلىك ساتىپ العان. Bloomberg نازارىنا ىلىككەن ىسكە قاتىستى جايتتاردىڭ ءبىرى - جەنيەۆادا قۇرىلعان Swiss Development Group SA فيرماسى بريتاندىق سوتتاردىڭ اكتيۆتەردى بۇعاتتاۋ تۋرالى قاۋلىلارىن اينالىپ ءوتۋ ءۇشىن پايدالانىلدى دەگەن بولجام.

«بۇل ىستەر ترامپ پەن ونىڭ سەرىكتەرى شىعىستان ينۆەستيسيا ىزدەگەن كەيىنگى 10 جىل ىشىندە قازاقستان مەن اقش اراسىندا اقشا اعىنى قالاي ءجۇردى دەگەن سۇراقتىڭ بەتىن اشۋى مۇمكىن. ترامپتىڭ سايلاۋ شتابى مۇشەلەرى اقش-تا 2016 جىلعى پرەزيدەنت سايلاۋىنا ىقپال ەتۋ ءۇشىن رەسەيمەن ءسوز بايلاسقان دەگەن كۇدىكتى تەكسەرىپ جاتقان ارنايى پروكۋرور روبەرت ميۋللەر [اقش پرەزيدەنتى دونالد ترامپتىڭ] بۇرىنعى كەي سەرىكتەرىنىڭ زاڭسىز اقشانىڭ ءىزىن جاسىرۋ جانە وزگە دە قارجىلىق قىلمىستارىنا قاتىستى ايعاقتاردى زەرتتەۋ كەزىندە وسى كەزەڭدى دە قاراستىرىپ جاتىر» دەپ جازعان Bloomberg.

مۇحتار ءابليازوۆ پەن ۆيكتور حراپۋنوۆتىڭ وتباسى الگى ايىپتاردىڭ ساياسي استارى بار، پرەزيدەنت نۇرسۇلتان نازاربايەۆتىڭ رەجيمىن سىناعانىمىز ءۇشىن قۋدالاۋعا ۇشىرادىق دەپ ەسەپتەيدى.

Bloombergءتىڭ جازۋىنشا، ءابليازوۆتىڭ ساياسي سەبەپپەن قۋدالاۋ تۋرالى مالىمدەمەسىن بتا ديرەكتورلار كەڭەسىنىڭ قازىرگى ءتوراعاسى، بۇرىنعى پرەمەر ءارى قازاقستاننىڭ رەسەيدەگى قازىرگى ەلشىسى يمانعالي تاسماعامبەتوۆتىڭ كۇيەۋبالاسى كەڭەس راقىشيەۆ «دالباسا ءارى مەن ءۇشىن ەڭ ۇلكەن پروبلەما» دەپ اتاعان. Bloomberg راقىشيەۆتىڭ «ءبىراق مەنىڭ مىندەتىم – اكتيۆتەردى قايتارۋ. بۇل ءىستىڭ بيزنەسكە قاتىستى بولىگى تۇسىنىكتى ءارى قاراپايىم. ەگەر ءابليازوۆ اقشانى زاڭدى جولمەن تاپقانىنا سەنىمدى بولسا، مۇنى سوتقا كەلىپ دالەلدەۋى ءتيىس» دەگەن سوزدەرىن كەلتىرگەن.