16 جەلتوقساندا قىتايدىڭ چانشا قالاسىندا وتكەن ديماش قۇدايبەرگەننىڭ جەكە كونسەرتىنىڭ ۆيدەوسىن «ديماشالي» شىعارماشىلىق ورتالىعىنىڭ باسشىسى قانات ايتبايەۆ جاريالادى، دەپ Qamshy.kz اقپارات اگەنتتىگى «قازاقپاراتقا» سۇيەنىپ جازادى.
«ون مىڭ ادامدىق زال لىق تولىپ، كورەرمەندەر كوتەرىڭكى كوڭىل-كۇيمەن كونسەرتكە ۇلكەن سەرپىن بەردى. بۇل كەشتە قازاق، حانزۋ، فرانسۋز، اعىلشىن تىلدەرىندەگى اندەر شىرقالدى. ديماشتىڭ ورىنداۋىنداعى شىعارمالاردى جۇڭگو، كانادا، امەريكا، رەسەي، ۋكراينالىق مۋزىكانتتاردان قۇرالعان وركەستر سۇيەمەلدەپ، بيشىلەر بيلەرىمەن ورنەكتەدى. كەش شىمىلدىعى قانات ايتبايەۆتىڭ سوزىنە جازىلعان ديماشتىڭ ءوزىنىڭ «سالەم» انىمەن اشىلىپ، ۇلىقپان جولداسوۆتىڭ اسقار دۇيسەنبىنىڭ سوزىنە جازىلعان «جۇلدىزىم» انىمەن جالعاستى»، - دەپ جازدى قانات ايتبايەۆ ينستاگرامدا.
كەشتە، سونىمەن قاتار، ايگۇل باجانوۆانىڭ «ماحاببات بەر ماعان» ءانىنىڭ حانزۋ تىلىندەگى نۇسقاسى، ورال بايسەڭگىردىڭ سوزىنە جازىلعان ديماشتىڭ «ۇمىتىلماس كۇن» اندەرى ورىندالىپ، تىڭدارماندار بىرگە قوسىلىپ شىرقاعان.
بۇدان بولەك، بەيجىڭ قالاسىنان كەلگەن شىعارماشىلىق توپ زامانۋي ساحنالىق بەزەندىرۋدىڭ، رەجيسسەرلىك وڭتايلى شەشىمدەردىڭ شەبەرلىگىن كورسەتە بىلگەن.
«جۇڭگو ەلىندەگى قازاق فولكلورلىق تريوسى جۇڭگو حالىقتىق تريوسىمەن بىرلەسە شىعارما ورىنداپ كونسەرتكە كورىك بەردى - دوستىق اۋەندەرىن توگىلتتى. ديماش ءوزىن رويالمەن سۇيەمەلدەي وتىرىپ ەستايدىڭ «قورلانىن» ورىندادى. ينتەرناسيونالدىق وركەسترمەن بىرگە نۇرعيسانىڭ «ءالقيسساسىن»، قۇرمانعازىنىڭ «ادايىن» دومبىرامەن تارتتى. ديماشتىڭ جاقىندا جازىلعان «الەمدە سوعىس بولماسىن» اتتى ءتول تۋىندىسى جۇڭگو تىلىندە ورىندالىپ حالىقتى تەبىرەنتتى. كەش بويى كورەرمەندەردىڭ قوشەمەتى، ىقىلاسى ەرەكشە بولدى»، - دەپ جازدى ءانشىنىڭ اكەسى.
كونسەرتتە كروسسوۆەر، ەتنو، كلاسسيكا، پوپ باعىتىنداعى جالپى سانى وتىز ءبىر شىعارما ورىندالىپ، كەش شىمىلدىعى سايات ابەنوۆتىڭ سوزىنە جازىلعان ديماشتىڭ ءوزىنىڭ «ءتاتتى ەلەس» انىمەنەن جابىلدى.
