الماتىدا «سپورت مەنىڭ اۋلامدا» باعدارلاماسى اياسىندا 7-17 جاس ارالىعىنداعى بالالار مەن جاسوسپىرىمدەر اراسىندا چەمپيوندار ليگاسىنىڭ فينالى ءوتتى.
ەكى كۇنگە سوزىلعان جارىس ءال-فارابي اتىنداعى قازاق ۇلتتىق ۋنيۆەرسيتەتى سپورت كەشەنىندە ءوتىپ، وعان الماتىنىڭ ءار اۋدانىنان كەلگەن 800-گە جۋىق ادام قاتىستى. سايىستار ۇلتتىق جانە جىلجىمالى سپورت تۇرلەرىنەن، سونىمەن قاتار بىرنەشە بايقاۋلار وتكىزىلدى.
چەمپيوندار ليگاسى اياسىندا جەتكىنشەكتەر اسىق اتۋ، شاعىن فۋتبول، بۇقا تارتىس، سەكىرگىش، ارقان تارتۋ، جەڭىل اتلەتيكا، ستريتبول، تىماق ۇرۋ، قول كۇرەس سپورت تۇرلەرىنىڭ ءوزارا مىقتىنى انىقتادى. سونىمەن قاتار، وتباسىلار اراسىندا «ءبىز مىقتىمىز» ەستافەتاسى ءوتتى.
– ءبىز وتباسىمىزبەن كەلىپ، بالامىزبەن بىرگە قاتىسىپ كورەيىك دەپ شەشتىك. بىزگە ءبارى ۇنادى. سپورتتىڭ قۇمارىنا كىرىپ، ءتىپتى ءوزىم سپورتپەن شۇعىلدانعىم كەلىپ كەتتى. وتە جاقسى باعدارلاما، وسىنداي پايدالى باستامالاردى ۇنەمى قولداپ، دامىتۋ كەرەك. اكىمگە، ۇيىمداستىرۋشىلارعا العىس بىلدىرەمىن. وسىنداي جارىستارعا قاتىسپاعالى كوپ بولىپتى. ءبىز ءوزىمىز الاتاۋ اۋدانىڭدا تۇرامىز. بالام ىلعي ەسىك الدىندا دوستارىمەن وينايدى. الادعى ۋاقىتتا تاعى دا كەلەمىز دەگەن ويدامىن، – دەدى ءوز وتباسىمەن كەلىپ ەستافەتاعا قاتىسقان تيمۋر سادىقوۆ.
ايتا كەتەر جايت، بۇل چەمپيوندار ليگاسى جارىسى وسى باعدارلاما اياسىندا قاراشا ايىندا باستالعان بولاتىن. بىرنەشە كەزەڭنەن تۇراتىن سايىستىڭ فينالىنا تەك ءوز اۋداندارىنىڭ مىقتىلارى كەلىپ ونەر كورسەتتى.
جارىس قورىتىندىسى بويىنشا، جەڭىمپازدار مەن جۇلدەگەرلەر مەدالدار جانە ديپلومدار، ال فۋتبولشىلار قوسىمشا كۋبوكتارعا يە بولدى. جالپى سانى 28 كومپلەكت مەدالدار تابىستالدى. ولاردى قۇتتىقتاۋعا وسى جوبانىڭ جەتەكشىلەرى، باپكەرلەرى مەن ۇيلەستىرۋشىلەرى جانە دزيۋدودان حالىقارالىق دارەجەدەگى سپورت شەبەرى، كوپتەگەن جارىستاردىڭ جۇلدەگەرى ەۆگەنيا بودۋنوۆا كەلدى.
– مەن توعىزقۇمالاقتان ءبىرىنشى ورىن الىپ، وتە قۋانىپ تۇرمىن. ءوزىم تۇركسىب اۋدانىنان كەلدىم. ماعان وسى ويىن قاتتى ۇنايدى. مەكتەپتەگى ءمۇعالىمىم ۇيرەتكەن بولاتىن. ءقازىر 74ء-شى مەكتەپتە 8 سىنىپتا وقيمىن. بالالارمەن ىلعي جينالىپ اۋلادا فۋتبول وينايمىز. ولدا وتە قىزىق. وسىنداي جارىستار ءجيى بولىپ تۇرسا جاقسى بولار ەدى، – دەپ جەڭىمپازداردىڭ ءبىرى رامازان نازاربايەۆ ءوز ويىمەن ءبولىستى.
ايتا كەتەر بولساق، الماتىنىڭ التى اۋدانىندا سپورتتىڭ بىرنەشە تۇرلەرىنەن «سپورت مەنىڭ اۋلامدا» باعدارلاماسى اياسىنداعى چەمپيودندار ليگاسى ىرىكتەۋ جارىستارىنىڭ ءۇشىنشى كەزەڭى وتكىزىلگەن بولاتىن.
جارىستار الاتاۋ، اۋەزوۆ، جەتىسۋ، مەدەۋ، ناۋرىزباي جانە تۇركسىب اۋداندارىندا بىردەي ۇيىمداستىرىلدى. وسى باعدارلاماعا قاتىسىپ جۇرگەن بالالار مەن جاسوسپىرىمدەر اسىق اتۋ، شاعىن فۋتبول، بۇقا تارتىس، سەكىرۋ، ارقان تارتۋ، جەڭىل اتلەتيكا، ستريتبول جانە تىماق ۇرۋ سپورت تۇرلەرىنەن ب ا ق سىناستى.
جوعارىدا اتالىپ وتكەن ءار اۋداندا 100-دەن اسا جەتكىنشەك ءوزارا مىقتىنى انىقتادى. قاتىسۋشىلار اتاپ وتكەندەي، ولار بۇقا تارتىس جانە تىماق ۇرۋ سياقتى ۇلتتىق سپورت تۇرلەرىن ەندى تانىپ بىلۋگە قۇمارتا باستاعان.
