شىعىس قازاقستان وبلىسىندا بالامالى ەنەرگيانى پايدالانۋ بويىنشا ءبىرقاتار جوبالار جۇزەگە اسىرىلۋدا. وبلىس اكىمى دانيال احمەتوۆتىڭ ايتۋىنشا، بۇل جوبالار «ەكسپو-2017» حالىقارالىق كورمەسىنىڭ جەتەكشى باعىتى بولىپ تابىلاتىن جاسىل ەكونوميكانى دامىتۋ ماقساتىندا جۇزەگە اسىرىلۋدا. بيىل وبلىستا كۇن، جەل جانە سۋ ەلەكتر ستانسالارىنىڭ قۇرىلىسى اياقتالادى دەپ جوسپارلانىپ وتىر.

شىعىس قازاقستاندا جەل، كۇن جانە سۋ ەلەكتر ستانسالارىن سالۋ يدەياسى وزەكتى، ويتكەنى ءوڭىردىڭ بۇل تۇرعىدا الەۋەتى جەتكىلىكتى. 2018 جىلى «جاسىل» ستانسالار جارما، ۇلان جانە زىريان اۋداندارىندا پايدا بولادى. قازىرگى كۇنى زىريان اۋدانىنداعى تۇرعۇسىن وزەنىندە تۇرعۇسىن گەس-1 قۇرىلىسى قارقىندى ءجۇرىپ جاتىر. گەس-تە وندىرىلەتىن ورتاشا جىلدىق ەنەرگيا – 79،8 ملن. كۆت.

سونداي-اق بالامالى قۋات كوزىن پايدالانۋ باعىتىندا جارما اۋدانىندا ەكى جوبا قولعا الىنعان. ولار: شار كەنتىندە سالىنىپ جاتقان جەل ەلەكتر ستانساسىنىڭ قۇرىلىسى مەن جانعىزتوبە كەنتىندە سالىناتىن قۋاتى 25 مۆت-تان 200 مۆت-قا دەيىن جەتەتىن جەل ەلەكتر ستانساسى. سونداي-اق وسى ەلدى مەكەندە جىلىنا 30 مەگاۆاتت قۋاتتىلىعى بار كۇن ەلەكتر ستانساسىنىڭ قۇرىلىسى اياقتالۋدا. ايتا كەتسەك، بۇل جوبا ەنەرگەتيكا مينيسترلىگىنىڭ ەنەرگيا وندىرەتىن ۇيىمدار تىزىمىنە ەنگىزىلگەن.

سونداي-اق ۇلان اۋدانىنىڭ تايىنتى اۋىلىندا «تايىنتى جەس» جوباسى ىسكە اسىرىلۋدا. ونىڭ قۋاتى شامامەن 25 مۆت بولادى. مۇنداعى باستى ارتىقشىلىق – جەل قوندىرعىلارى ەكولوگيالىق جاعىنان تازا، اۋانى لاستامايدى.

- جارما، زىريان جانە ۇلان اۋداندارىنىڭ اكىمدەرى وسى جوبالاردى جۇزەگە اسىرۋ بويىنشا اي سايىن كەزدەسۋلەر وتكىزىپ، ولارعا جان-جاقتى قولداۋ كورسەتۋى كەرەك، - دەدى دانيال احمەتوۆ. - ويتكەنى، ءبىز «ەكسپو 2017» حالىقارالىق كورمەسىنىڭ جەتەكشى باعىتى بولىپ تابىلاتىن «جاسىل» ەكونوميكانى دامىتۋ اياسىندا وسى جوبالاردى ءىس جۇزىنە اسىرىپ جاتىرمىز.

جەل تۋربينالارى، كۇن قوندىرعىلارى جانە جاڭا سۋ ەلەكتر ستانسالارى بيىل ايماقتاعى ەنەرگيا تاپشىلىعىن جويىپ قانا قويماي، كورشى ايماقتاردى ارزان ەلەكتر قۋاتىمەن قامتاماسىز ەتەدى.

جالپى ايتا كەتسەك، «ەكسپو-2017» - بۇل تەك «جاسىل» ەنەرگەتيكا عانا ەمەس، سونىمەن قوسا ەكولوگيالىق تازا ءوندىرىس تەحنولوگيالارى. ەكسپو كورمەسىندە 140 جۋىق عىلىمي ونەرتابىس كورسەتىلسە، شىعىس قازاقستاننان 6 جوبا ۇسىنىلدى.

ايتا كەتەيىك، استانادا وتكەن ەكسپو كورمەسىن شىعىس قازاقستان وبلىسىنان بارلىعى 30 مىڭعا جۋىق وقۋشىلار مەن ستۋدەنتتەر تاماشالاپ قايتتى.