مۇحتار قۇل-مۇحاممەد الماتى وبلىسىندا ءبىرقاتار كاسىپورىن جۇمىسىمەن تانىستى

/uploads/thumbnail/20180110165429858_small.jpg

بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد الماتى وبلىسىنا كەلدى دەپ جازادى Qamshy.kz. مۇحتار قۇل-مۇحاممەد ەلباسىنىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى بيىلعى جولداۋىندا ايتىلعان باسىمدىقتاردى جۇزەگە اسىرۋعا باعىتتالعان كاسىپورىنداردىڭ جۇمىسىمەن تانىستى.

مەملەكەت باسشىسى ايقىنداپ بەرگەن جاڭا مىندەتتەرگە تولىق ساي كەلەتىن وڭىردەگى بىردەن ءبىر كاسىپورىن – «الماتى-ستەكلو» ج ش س. سەبەبى، مۇنداعى قوندىرعىلاردىڭ قازاقستان بويىنشا بالاماسى جوق. كاسىپورىندا بەس بىردەي تەحنولوگيالىق ماشينا جەلىسى جۇمىس ىستەيدى. سونىڭ ناتيجەسىندە بانكى، قۇتى سياقتى اينەك ىدىستاردىڭ كەز كەلگەن ءتۇرىن دايىنداۋعا مۇمكىندىك بار. ءتىپتى زاۋىتتىڭ جەكەلەي تاپسىرىستار بويىنشا دا ءونىم وندىرۋگە تولىق قاۋقارى بار. بۇل جەردە جىلىنا 120 ميلليونعا دەيىن شىنى قۇتىلار مەن بانكىلەر شىعارىلادى. كاسىپورىن باسشىلارىنىڭ ايتۋىنشا، بۇل جەردەگى ونىمدەر ساپاسى جاعىنان الەمدىك ەتالوندارعا تولىعىمەن ساي كەلەدى.

سەرىكتەستىكتىڭ ەڭبەك ۇجىمىمەن كەزدەسكەن مۇحتار قۇل-مۇحاممەد ەلباسىمىز ءوزىنىڭ جاڭا جولداۋىندا ايتقان ءتورتىنشى ونەركاسىپتىك ريەۆوليۋسيا ءداۋىرى ءوندىرىس ورىندارىنان سوڭعى ۇلگىدەگى تەحنولوگيالاردى كەڭىنەن ەنگىزۋدى تالاپ ەتەتىنىنە نازار اۋداردى. بۇل – جاھان كوشىنەن قالماي، الەمدىك وزگەرىستەرمەن قاتار دامۋعا ۇلكەن سەپتىگىن تيگىزەتىن ماڭىزدى قادام. سوندىقتان «الماتى-ستەكلو» سياقتى زاماناۋي كاسىپورىندار دا ەلباسى ايتقان جاڭعىرۋ مەن سيفرلاندىرۋدى جۇزەگە اسىرۋدا اسا بەلسەندى بولۋى ءتيىس.

– ەلباسىمىز ءوزىنىڭ بۇگىنگى جولداۋىندا ەڭ جوعارى سيفرلىق تەحنولوگيا نەگىزىندە ەل ەكونوميكاسىن دامىتۋدىڭ 10 باسىم باعىتىن ايقىنداپ بەردى. ەڭ باستىسى، وتاندىق كاسىپورىنداردىڭ شىعارعان ونىمدەرى ەكسپورت تالاپتارىنا ساي بولۋى ءتيىس. وسى تۇرعىدان كەلگەندە اۆستريا جانە يتاليا تەحنولوگيالارىنىڭ نەگىزىندە جۇمىس ىستەيتىن «الماتى-ستەكلو» زاۋىتى ءقازىردىڭ وزىندە ونىمدەرىن الەمنىڭ كوپتەگەن ەلدەرىنە ەكسپورتتاۋدا. بۇرىن الماتى وبلىسى نەگىزىنەن اگرارلىق ءوڭىر رەتىندە سانالىپ كەلسە، يندۋستريالاندىرۋدىڭ ناتيجەسىندە اگرارلى-يندۋستريالدى ايماققا اينالدى. وتكەن جىلى وبلىستىڭ وندىرىستىك ءونىم كولەمى 750 ميلليارد تەڭگەنى قۇرادى. ءقازىر ءبىز تۇرعان ءبىر عانا يندۋستريالدى ايماقتا 17 جاڭا كاسىپورىن ىسكە قوسىلدى. سوندىقتان ەلباسىمىز ەكونوميكانى جاڭعىرتىپ قانا قويماي، الدىمىزعا الەمدىك باسەكەگە قابىلەتتى ءونىم شىعاراتىن وسىنداي كاسىپورىنداردى كوپتەپ اشۋ جونىندە جاڭا مىندەتتەر قويىپ وتىر، – دەدى «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد.

سونىمەن قاتار، پارتيا ءتوراعاسىنىڭ ءبىرىنشى ورىنباسارى وبلىس اكىمى اماندىق باتالوۆپەن بىرگە كونديتەرلىك ونىمدەر شىعاراتىن «A Product» جشس-دا بولدى. ودان بولەك، «رۋحاني جاڭعىرۋ» باعدارلاماسى اياسىندا سالىنىپ، 2017 جىلدىڭ قىركۇيەك ايىندا پايدالانۋعا بەرىلگەن «باتىر بابالار» مەموريالدى كەشەنى مەن شامالعان اۋىلىندا جاڭادان اشىلعان ەلباسى، قازاقستان رەسپۋبليكاسى تۇڭعىش پرەزيدەنتىنىڭ «اتامەكەن» تاريحي-مادەني ورتالىعىندا بولدى.

ساپار سوڭىندا مۇحتار قۇل-مۇحاممەد «نۇر وتان» پارتياسىنىڭ وبلىستىق، اۋداندىق، قالالىق فيليالدارى مەن باستاۋىش پارتيا ۇيىمدارىنا ەلباسى جولداۋىنداعى بارلىق باسىم باعىتتىڭ جۇزەگە اسىرىلۋىن قاتاڭ باقىلاۋعا الۋدى جانە بۇل ماڭىزدى قۇجاتتىڭ ءمانى مەن ماعىناسىن الماتى وبلىسىنىڭ ءاربىر تۇرعىنىنا ءتۇسىندىرۋ ءجۇمىستارىن جۇيەلى تۇردە جۇرگىزۋدى تاپسىردى.

پىكىر قالدىرۋ

قاتىستى ماقالالار