«ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى پرەزيدەنت جولداۋىنىڭ يننوۆاسيا سالاسىنداعى مىندەتتەرىن قالاي جۇزەگە اسىرۋعا بولادى؟ وسى ساۋالعا قاتىستى «قازاقپارات» حاا تىلشىسىنە جولداۋدىڭ اتالعان باعىتى بويىنشا «G-Global «جاسىل ەكونوميكا» مەن دامۋ كواليسياسى» زتب باسقارما ءتوراعاسى سالتانات راحىمبەكوۆا تۇشىمدى جاۋابىن بەردى، دەپ حابارلايدى Qamshy.kz اقپارات اگەنتتىگى.

«ءتورتىنشى ونەركاسىپتىك ريەۆوليۋسيا «اقپاراتتىق قوعام»، تولىقتاي ينتەللەكتۋالدىق ءارى قالدىقسىز ءوندىرىس، سەنىمدى قاجەتتىلىك، ءابسوليۋتتى ءارى داۋىرلىك يننوۆاسيالاردى قۇرۋدى كوزدەيدى. ول جايلى ءبىزدىڭ پرەزيدەنت «ءححى عاسىرداعى جاھاندىق ەنەرگوەكولوگيالىق ستراتەگيا» كىتابىندا كەڭىنەن توقتالىپ وتكەن بولاتىن. جولداۋدا «ساپاعا جوعارى تالاپ قويا ءبىلۋ، عيماراتتاردىڭ ەكولوگياسى مەن ەنەرگيانى ۇنەمدەۋىنە» ەرەكشە ماڭىز بەرۋ كەرەكتىگى ايتىلادى. «جاسىل» قۇرىلىستىڭ قاعيداتتارى - ءتورتىنشى ونەركاسىپتىك ريەۆوليۋسيانىڭ تاعى ءبىر باسىم تۇسى» - دەيدى ول.

ونىڭ ايتۋىنا قاراعاندا، ءتورتىنشى ونەركاسىپتىك ريەۆوليۋسيانى تەرەڭ زەرتتەپ، مەكتەپ قابىرعاسىنان باستاپ بالالار مەڭگەرەتىندەي دارەجەدە وقىتۋ كەرەك. «دەمەك، جوو-لار مەن ستۋدەنتتىك قالاشىقتار، تەحنوپاركتەر، ءتورتىنشى ونەركاسىپتىك ريەۆوليۋسيا تەحنولوگيالارىن كەشەندى تۇردە يگەرۋ الاڭىنا اينالۋى ءتيىس»، - دەيدى ول.

سالتانات راحىمبەكوۆا جولداۋدا اتالىپ وتكەندەي، «بارلىق وڭىرلەردەگى وقۋشىلار سارايىندا بالالار تەحنوپاركى مەن بيزنەس-ينكۋباتورلاردى سالۋدىڭ» ماڭىزىنا توقتالدى. ونىڭ ايتۋىنشا، تەحنولوگيالىق بروكەر، اۆتوماتتاندىرىلعان جىلىجايلاردى قامتاماسىز ەتۋ سەكىلدى ماماندىقتاردى مەڭگەرۋدىڭ ماڭىزى اسا جوعارى. ءتورتىنشى ونەركاسىپتىك ريەۆوليۋسيانىڭ كوشباسشىلارى - ەكسپو-2017 اۋماعىندا سالىنىپ جاتقان حالىقارالىق ءىت-ستارتاپتار تەحنوپاركى مەن جاسىل تەحنولوگيالاردىڭ حالىقارالىق ورتالىعى بولا ءبىلۋى كەرەك.

سالتانات راحىمبەكوۆا سونىمەن بىرگە، تىڭ تەحنيكالىق نەگىزدە سيفرلى، «ۆيرتۋالدى» ەكونوميكانى دامىتۋدىڭ ماڭىزدى ەكەنىن تىلگە تيەك ەتتى. «G-Global بازاسىندا ءتورتىنشى ونەركاسىپتىك توڭكەرىستىڭ يننوۆاسيالارى مەن «جاسىل» جوبالارى ءۇشىن قاراجات جينايتىن كراۋتفاندينگتى الاڭ قۇرۋ كەرەك»، - دەپ اتاپ ءوتتى ول.