2018 جىلداعى ۇكىمەتتىڭ العاشقى وتىرىسىندا ق ر پرەمەر-مينيسترى باقىتجان ساعىنتايەۆ ەلباسىنىڭ جولداۋىنا قاتىستى ءبىرقاتار تاپسىرمالار جۇكتەدى، دەپ حابارلايدى Qamshy.kz اقپارات اگەنتتىگى.

«كەشە مەملەكەت باسشىسىنىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋى جاريالاندى. سوندىقتان، ءبىز بۇگىن جولداۋداعى تاپسىرمالاردى ورىنداۋعا جاۋاپتى مەملەكەتتىك ورگانداردى ناقتىلاپ الىپ، ماڭىزدى قۇجاتتى ىسكە اسىرۋ ءۇشىن قاجەتتى شارالاردىڭ بارلىعىن قابىلداۋىمىز قاجەت. جاڭا جولداۋ ەلباسىمىز 2017 جىلى جاريالاعان «قازاقستاننىڭ ءۇشىنشى جاڭعىرۋى» تۇعىرناماسىن ارى قاراي دامىتادى. ماقساتىمىز وزگەرىسسىز قالا بەرمەك.

ول - بۇكىل الەمنىڭ جاڭا تەحنولوگيالىق قۇرىلىسقا كوشۋى جاعدايىندا ەڭ دامىعان وتىز ەلدىڭ قاتارىنا كىرۋ.

مەملەكەت باسشىسىنىڭ تاپسىرماسى بويىنشا ۇكىمەت ەلىمىزدىڭ 2025 جىلعا دەيىنگى دامۋىنىڭ ستراتەگيالىق جوسپارىن جانە ىلگەرى باسۋىمىزعا ءبىرقاتار باعدارلامالىق قۇجاتتاردى دايىندادى. جاڭا جولداۋ اتقارۋشى بيلىكتىڭ الدىنا «ءتورتىنشى ونەركاسىپتىك ريەۆوليۋسيا» ۇسىنىپ وتىرعان جاڭا مۇمكىندىكتەر مەن ودان كەلەتىن قاۋىپ-قاتەرلەرگە ەلىمىزدىڭ ءساتتى بەيىمدەلۋى ءۇشىن وسى جىلدان قالماي شەشىلۋى ءتيىس ناقتى مىندەتتەردى قويىپ وتىر»، -دەدى ب. ساعىنتايەۆ.

وسى ورايدا ۇكىمەت باسشىسى پرەزيدەنت ءوزىنىڭ جولداۋىندا ون نەگىزگى ماقساتتى بەلگىلەگەنىن جانە ولاردىڭ بارلىعى جاقىن بولاشاقتا جۇزەگە اسىرىلۋى قاجەتتىگىن اتاپ ءوتتى.

«ءبىرىنشى باسىمدىق يندۋستريالاندىرۋ مەن جاڭا تەحنولوگيالاردى ەنگىزۋگە قاتىستى. ينۆەستيسيالار جانە دامۋ مينيسترلىگى مۇددەلى مەملەكەتتىك ورگاندارمەن، ۇيىمدارمەن بىرلەسە ءونىم ەكسپورتى مەن تەحنولوگيالار ترانسفەرتىنە ەكپىن قويا وتىرىپ، وتاندىق كاسىپورىنداردى جاڭعىرتۋ مەن سيفرلاندىرۋعا باعىتتالعان جاڭا تەتىكتەردى ازىرلەۋى قاجەت»، - دەپ اتاپ ءوتتى ۇكىمەت باسشىسى.

وسى ورايدا قاناتقاقتى جوبالاردى ايقىنداپ، ولاردى ىسكە اسىرۋعا كىرىسۋ جۇكتەلدى. بۇل باعىتتاعى جۇمىستارعا ينۆەستيسيالار جانە دامۋ ءمينيسترى جەڭىس قاسىمبەك جاۋاپتى بولادى.

اقپارات جانە كوممۋنيكاسيالار مينيسترلىگى ءتيىستى مەملەكەتتىك ورگاندارمەن بىرگە شارالار كەشەنىن دايارلاۋى ءتيىس. دامۋ بويىنشا  سيفرلىق ءارى يننوۆاسيالىق شەشىمدەردى دايارلاۋ تۇرعىسىنداعى شارالارعا نازاربايەۆ ۋنيۆەرسيتەتى، «استانا» حالىقارالىق قارجى ورتالىعى،  IT-ستارتاپتار حالىقارالىق تەحنوپاركى قامتىلماق.

سونىمەن قاتار، بۇل باعىتتا زاڭنامالىق تۇزەتۋلەردى قامتاماسىز ەتۋ تاپسىرىلدى. «الاتاۋ» يننوۆاسيالىق تەحنولوگيالار پاركىنىڭ بۇدان كەيىنگى قىزمەتى بويىنشا ينۆەستيسيالار جانە دامۋ مينيسترلىگى اقپارات جانە كوممۋنيكاسيالار مينيسترلىگىمەن، الماتى اكىمدىگىمەن ەكى اپتالىق مەرزىمدە ناقتى ۇسىنىستار ەنگىزۋى ءتيىس.

ينۆەستيسيالار جانە دامۋ مينيسترلىگىنە يندۋستريالاندىرۋدىڭ ءۇشىنشى بەس جىلدىعى مەملەكەتتىك باعدارلاماسىنىڭ جوباسىن ازىرلەۋگە كىرىسۋى قاجەت. وسى ورايدا سيفرلىق تەحنولوگيالارعا ەكپىن قويىلۋى كەرەك»، - دەدى ب. ساعىنتايەۆ.