جاڭا جىل قارساڭىندا لاتۆيا استاناسى ريگادا ق ر پرەزيدەنتى اكىمشىلىگىنىڭ ەكس-جەتەكشىسى اسلان ءمۋسيننىڭ  ۇلى اسىلبەك مۋسين ريگادا قازا تاپقان بولاتىن.

الايدا بىرنەشە جىل بۇرىن قازاقستاندىق باق-تا ەسىمى دۇركىرەپ تۇرعان ادامنىڭ قانداي جاعدايدا قازا تاپقانى بەلگىسىز. اسىلبەك ءمۋسيننىڭ ريگالىق ارىپتەستەرىنىڭ ايتۋىنشا، ءمۋسيننىڭ ءولىمىن پوليسيا وز-وزىنە قول جۇمساۋ دەپ باعالاپ وتىر. ءقازىر تەرگەۋ جۇمىستارى مەن ەكسپەرتيزا جۇرگىزىلىپ جاتىر، دەپ جازادى Qamshy.kz اقپارات اگەنتتىگى كاراۆان مالىمەتىنە سۇيەنىپ. 

ءبىر قىزىعى، اسىلبەك ءمۋسيننىڭ قازاسى جايىندا Telegram جەلىسىندە ءبىرىنشى بولىپ ساياساتتانۋشى تالعات قالييەۆ جازدى. تالعات قالييەۆ پەن اسىلبەك مۋسين اراسىندا كوپشىلىككە بەلگىلى ەشقانداي دوستىق، ارىپتەستىك، تانىستىق جوق. ال ريگالىق ب ا ق بەتتەرىندە بۇل اقپارات قالييەۆ حابارلاعاننان ءبىر كۇن كەيىن تاراعان.

لاتۆيانىڭ مالىمەتىنشە، اسىلبەك مۋسين ريگانىڭ شەت جاعىنداعى كوپقاباتتى ۇيلەردىڭ بىرىندە تۇرعان. ءمۋسيننىڭ دەنەسىن تاپقان كورشىلەرى مەن اۋلا سىپىرۋشىنىڭ ايتۋىنشا، ول تىنىش ءارى قالىپتى ءومىر سۇرگەن.

كورشىلەرىنىڭ ءمۋسيننىڭ ۇيىنە كەلگەن-كەتكەن ەشكىمدى بايقاماعان. بالالارىن مەكتەپ پەن بالاباقشاعا اسىلبەكتىڭ ءوزى ەمەس، باسقا ادامدار اپارىپ تۇرعان. ول ورتاسىنا سىيلى ادام بولعان. ال قازاقستاندىق شەنەۋنىكتىڭ بالاسى قالاي ءومىر ءسۇرىپ جاتقانى جايىندا تامىز ايىنىڭ 22ء-شى جۇلدىزىندا بەلگىلى بولدى. سول كۇنى جاتىرداعى نارەستەسىنەن ايىرىلعان اسىلبەك ءمۋسيننىڭ ايەلى 15ء-شى قاباتتان قۇلاعان.

ال ريگالىق باسىلىمداردىڭ ايتۋىنشا، اسىلبەك مۋسين ايەلىنىڭ ولىمىنەن كەيىن داۋ كوتەرمەگەن، كۇيزەلىسكە تۇسكەن. جەرگىلىكتى تىلشىلەردىڭ ايتۋىنشا، ايەلى وزىنە-وزى قول سالعان.

ال اسىلبەك ءمۋسيننىڭ سۋيسيد جاساۋىنا يتەرمەلەيتىندەي  ىشىمدىك نەمەسە ناشا پايدالانعانى جايىندا ناقتى دەرەكتەر جوق. ال ونىڭ جەكە بيزنەسپەن نەمەسە قۇراندى ناسيحاتتاۋمەن اينالىسقانى تۋرالى ارىپتەستەرى دە جاۋاپ بەرە الماي وتىر.

وتكەن جىلى اسىلبەك مۋسين 38 جاسقا تولعان. ارتىندا 3 بالاسى قالدى.

***

«2008-2013 جىلدارى «ىزگى امال» قوزعالىسى بەلسەندى تۇردە ساحناعا شىعا باستادى. جەكە ساپاشىلار ونى قازاقستان بيلىگىندەگى مۇراگەرلىك جولدى شەشۋگە قۇرىلعان ساياسي-تەحنولوگيالىق جوبا دەۋگە اسىقتى.

ءوز سوزىندە اسىلبەك ءمۋسيننىڭ اكەسى اسلان مۋسين «ىزگى امال» سەكتا ەمەس، پاتريوت ءارى قۇدايدىڭ بار ەكەنىنە سەنەتىن بارلىق ادامعا ەسىگى اشىق  ينتەللەكتۋالدى  كلۋب دەپ اتاعان بولاتىن.

الايدا جوبا سول كۇيى ىسكە اسپادى، ال اسىلبەك جاپا شەكتى. مەنىڭ ويىمشا، ەگەر اسىلبەك وزىنە قول سالدى دەسەك، ونىڭ باستى سەبەبى رەتىندە ونىڭ جاقىندارىنىڭ ساتقىندىعى، ونى وزگەلەردىڭ تۇسىنبەۋى دەپ بىلەمىن. سەبەبى، اسىلبەكتىڭ  جاقتاستارىنىڭ بويىندا جوق  قاعيدالار، قاسيەتتەر ونىڭ بويىندا بولدى» دەدى «ىزگى امال» قوزعالىسىنىڭ سايتىن جاساعان الەكساندر چۋلكوۆ.

«اسىلبەكتىڭ وزگەگە دەگەن قۇرمەتى مەن ءوزىن سىيلاۋى مەنىڭ ەسىمدە جاقسى ساقتالعان. ونىڭ بىرنەشە جىل ءوز جولىن ىزدەۋ جولىندا سيريادا دا تۇرعانىن ەكىنىڭ ءبىرى بىلە بەرمەيدى. ودان كەيىن امەريكا قۇراما شتاتتارىندا بولدى، سول جاقتان قۇرانعا دەگەن قىزىعۋشىلىعى وياندى. نەگىزىندە، اسىلبەك ءوز جولىن ىزدەگەن فيلوسوف بولاتىن. ءوزىن تولىقتاي اشپاي، ومىردەن ەرتە وتكەنى وكىنىشتى» دەپ اياقتادى ءسوزىن ا.چۋلكوۆ.