استانادا ۇلتتىق ۇلان جاۋىنگەرلەرى قۇدىققا ءتۇسىپ كەتكەن ايەلدى قۇتقاردى، دەپ حابارلايدى Qamshy.kz اقپارات اگەنتتىگى. 

 وقيعا 10 قاڭتاردا كەشكى 19.30 شاماسىندا ورىن العان. ۇلتتىق ۇلاننىڭ 5573 اسكەري ءبولىمىنىڭ ەكى اسكەري قىزمەتشىسى قىزمەتتەن كەيىن ۇيگە بارا جاتىپ توسىن جاعدايعا كۋا بولادى. قورعالجىن تاس جولىندا كەلە جاتقان ماقسات امانقۇل مەن جومارت جەكسەمبايەۆ جول بويىندا كەلە جاتقان ايەل كىسىنىڭ كەنەتتەن شۇڭقىرعا قۇلاپ كەتكەنىن بايقاپ قالادى. دەرەۋ كولىكتى توقتاتىپ، تۇسكەن بويدا كومەككە جۇگىرەدى.

شام جاعىپ قاراساق، قۇدىقتىڭ تەرەڭدىگى 3-4 مەتردەي ەكەن. جومارت دەرەۋ كولىكتەن ارقان اكەلدى. بەلىمە بايلاپ تومەنگە ءتۇستىم. ءبىزدى بايقاعان كىسىلەر دە تاعى ءبىر ءجىپ الىپ كومەككە كەلىپ جاتتى. ولاردان دەرەۋ جەدەل جاردەم شاقىرۋىن وتىندىك. ەكىنشى ارقاننىڭ كومەگىمەن اپايدى ءبىرىنشى جوعارىعا شىعارىپ جىبەردىم. ەلۋلەر شاماسىنداعى كىسى ەكەن، ءۇستى مالمانداي سۋ بولىپتى. وتباسى، باۋىرىنا دا حابارلاسىپ ايتتىق، - دەيدى ەفرەيتور ماقسات امانقۇل.

ەستەرىڭىزگە سالا كەتەيىك، سول كۇنى قازاقستان رەسپۋبليكاسى ۇلتتىق ۇلانىنىڭ قۇرىلعانىنا 26 جىل تولعان بولاتىن. كاسىبي مەرەكەدە، قىزمەتتەن تىس ۋاقىتتا قالا تۇرعىنىنا قورعان بولا بىلگەن ەكى جاۋىنگەر اتالمىش اسكەري بولىمدە ەكى جىلدان اسا ۋاقىت قىزمەت ەتىپ كەلەدى.

ءىنىسىنىڭ ايتۋى بويىنشا، اققويان تولەپبەرگەنوۆانىڭ دەنساۋلىعى دۇرىس. مەديسينالىق تەكسەرىس ناتيجەسىندە ونىڭ اۋىر جاراقات الماعانى انىقتالدى. تەك تەرەڭدىككە قۇلاعاننان دەنەسىنىڭ ءار تۇسىنا قان ۇيىپ قالعان. «تەلەفونىم سۋدان ىستەمەي قالىپتى. كومەككە كىمدى، قالاي شاقىرار ەدىم؟ قۇتقارىپ ۇلگەرۋشى مە ەدى... ونى ويلاۋدىڭ ءوزى قورقىنىشتى. ساربازدارعا كوپ راحمەت! جولدارى اشىق بولسىن دەپ باتامدى بەرەم، بار جاقسىلىقتى تىلەيمىن»، - دەيدى اققويان ولجاباي قىزى دەر كەزىندە قاجەتتى جەردەن تابىلعان ۇلاندىقتارعا العىسىن جاۋدىرىپ.