الماتى وبلىسىندا ءۇش جاسار قىزدى قورلاۋ وقيعاسىنا قاتىستى ءىس قوزعاۋعا نەگىز بولعان قىلمىستىق باپ وزگەرتىلدى دەپ حابارلايدى Qamshy.kz اقپارات اگەنتتىگى sputniknews.kz-كە سىلتەمە جاساي وتىرىپ.
پوليسيا تۇسىندىرگەندەي، قىزدىڭ اناسى تالعار اىىب-نە 2017 جىلدىڭ 25 جەلتوقسانىندا ارىز بەرگەن، سوعان سايكەس ق ر قك 107-بابى بويىنشا (ادام دەنساۋلىعىنا قاساقانا ورتاشا زيان كەلتىرۋ) قىلمىستىق ءىس قوزعالعان. الايدا 12 قاڭتاردا قىلمىستىق باپ 106-شى (ادام دەنساۋلىعىنا قاساقانا اۋىر زيان كەلتىرۋ) بولىپ وزگەرتىلگەنى بەلگىلى بولدى.
"تالعار ءاىىب قىزمەتكەرلەرى وقيعاعا بايلانىستى سوتقا دەيىنگى تەرگەۋ امالدارىن جۇرگىزىپ جاتىر. ونىڭ ۇستىنە قوعامنىڭ نازارىنا ىلىنگەندىكتەن، وبلىستىق دەپارتامەنت تە ءىستى ەرەكشە باقىلاۋىنا الدى"، — دەپ حابارلادى الماتى وبلىسى ىشكى ىستەر دەپارتامەنتى رەسمي وكىلى كوبەيحان نۇراحمەت.
پوليسيا سوت-مەديسينالىق ساراپتامانىڭ ناتيجەسىن كۇتىپ وتىر. تەرگەۋ بارىسىندا بۇرىن ۇرلىق جاساپ، ايەلدى زورلاماق بولعانى ءۇشىن سوتتالعان كۇدىكتىگە قاتىستى بۇلتارتپاۋ شاراسى رەتىندە "مىندەتتى تۇردە كەلۋ" تاڭدالدى.
ەسكە سالا كەتەيىك، وگەي اكەسى ءۇش جاسار قىزىنىڭ دەنەسىن تىستەلەپ، مۇرنىن جۇلىپ العان. بۇل تۋرالى جۋرناليست گۇلميرا ءابىقاي ءوزىنىڭ Instagram پاراقشاسىنا جازعان بولاتىن.
