وڭتۇستىك قازاقستان وبلىسىندا كومىر باعاسىن قولدان كوتەرگەن كاسىپكەرلەرگە 9 ميلليون تەڭگە كولەمىندە ايىپپۇل سالىندى. بۇل تۋرالى Qamshy.kz اقپارات اگەنتتىگى 24.kz-كە سىلتەمە بەرىپ حابارلايدى. ولار شىمكەنت پەن تۇركىستان قالالارىندا، سونداي-اق ارىس اۋدانىنداعى بازارلاردا كومىردى 20 مىڭ تەڭگەدەن ساتقان. نەگىزىنەن ونىڭ نارىقتاعى باعاسى – 10-13 مىڭ تەڭگە. بۇل زاڭبۇزۋشىلىقتاردى تابيعي مونوپوليالاردى رەتتەۋ، باسەكەلەستىكتى جانە تۇتىنۋشىلار قۇقىعىن قورعاۋ كوميتەتىنىڭ وڭىرلىك دەپارتامەنتىنىڭ ماماندارى ارنايى تەكسەرىس كەزىندە انىقتاپتى. ءىس جەرگىلىكتى مامانداندىرىلعان اكىمشىلىك سوتقا جولداندى.

تابيعي مونوپوليالاردى رەتتەۋ، باسەكەلەستىكتى جانە تۇتىنۋشىلار قۇقىعىن قورعاۋ كوميتەتى وبلىستىق دەپارتامەنتى باسشىسىنىڭ ورىنباسارى باۋىرجان تاشتانوۆ:

– بۇل جەردە ق ر كاسىپكەرلىك كودەكسىنىڭ 69-بابىنا سايكەس باعانى ۇستاپ تۇرۋ كەلىسىمدەر ءىس ارەكەتىنە قاتىستى جالپى 13 نارىق سۋبەكتىسىنە تەرگەۋ جۇرگىزىلدى. ونىڭ ىشىندە 9 نارىق سۋبەكتىسىنە مونوپولياعا قارسى زاڭناماسىن بۇزۋشىلىق بەلگىلەرى انىقتالىپ، قازىرگى تاڭدا ول بويىنشا ءىس ماتەريالدار سوتتىڭ قاراۋىنا جولدانعان بولاتىن،-دەدى.