كەزدەسۋدە ا.سمولين مەملەكەت باسشىسىنا جوعارعى سوت كەڭەسىنىڭ 2017 جىلعى قىزمەتى جانە قازاقستان سۋديالارىنىڭ VII سەزىندە بەرىلگەن تاپسىرمالاردىڭ ورىندالۋ ناتيجەلەرى جونىندە باياندادى. بۇل جونىندە Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ حابارلايدى.
نۇرسۇلتان نازاربايەۆ جوعارعى سوت كەڭەسىنىڭ سوت تورەلىگىنىڭ ساپاسىن ارتتىرۋدى قامتاماسىز ەتۋ ماقساتىمەن مامانداردى ىرىكتەۋ جونىندە اتقارىپ جاتقان جۇمىسىنا توقتالدى.
– ءبىز سوت جۇيەسىندەگى رەفورمانى زاڭ ۇستەمدىگىن قامتاماسىز ەتۋ ءۇشىن جۇرگىزۋدەمىز. سوت كادرلارىن ىرىكتەۋدى ادىلەتى جۇرگىزۋ ءۇشىن ءبىز دەربەس جوعارعى سوت كەڭەسىن قۇردىق. ول تاۋەلسىز جانە ەشكىمگە باعىنبايدى، – دەدى قازاقستان پرەزيدەنتى.
ەلباسى ۇلت جوسپارىنىڭ 17-قادامىن ىسكە اسىرۋ تۇرعىسىنان سۋديا لاۋازىمىنا ۇمىتكەرلەردى ىرىكتەۋ بارىسىندا مەريتوكراتيا قاعيداتىن باسشىلىققا الۋ قاجەتتىگىنە نازار اۋداردى.
– بۇل كادرلاردى ىرىكتەۋدىڭ ساپاسىن ارتتىرۋعا ءتيىس. تەك ءادىل شەشىم قابىلدايتىنداردى تاعايىنداۋ كەرەك. ادامدار سوندا عانا ءوز قۇقىقتارىن قورعاۋ ءۇشىن سوتقا جۇگىنەتىن بولادى، – دەدى مەملەكەت باسشىسى.
سونىمەن قاتار، اناتوليي سمولين نۇرسۇلتان نازاربايەۆقا اتقارىپ جاتقان قىزمەتىنىڭ، سونىڭ ىشىندە ەلباسىنىڭ قازاقستان حالقىنا «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىن ىسكە اسىرۋ، سونداي-اق قۇقىق قورعاۋ قىزمەتىن رەفورمالاۋ اياسىندا قۇرىلعان تەرگەۋ سوتتارىنىڭ قۇرامىن قالىپتاستىرۋ بارىسىنداعى قىزمەتىنىڭ پەرسپەكتيۆتى باعىتتارى جونىندە باياندادى.
كەزدەسۋ قورىتىندىسى بويىنشا قازاقستان پرەزيدەنتى ءبىرقاتار ناقتى تاپسىرما بەردى.
