قازاقستان بىرىككەن ۇلتتار ۇيىمى قاۋىپسىزدىك كەڭەسىنىڭ ءتوراعاسى رەتىندە ءوز جۇمىسىن اياقتادى، دەپ حابارلايدى Qamshy.kz اقپارات اگەنتتىگى ق ر ءسىم باسپا ءسوز قىزمەتىنە سىلتەمە جاساي وتىرىپ.

ۇستىمىزدەگى جىلدىڭ 1 قاڭتارىنان باستاپ قازاقستاندىق دەلەگاسيا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ «ءقاۋىپسىز، ءادىل جانە وركەندەگەن الەم قۇرۋ ءۇشىن جاھاندىق ارىپتەستىكتى نىعايتۋعا قازاقستاندىق تۇجىرىمدامالىق كوزقاراس» اتتى ساياسي ۇندەۋىن، سونداي-اق پراگماتيكالىق پرينسيپتەرگە نەگىزدەلگەن ءوز ۇلتتىق مۇددەلەرىن باسشىلىققا الىپ، بۇۇ-نىڭ نەگىزگى ورگانىنىڭ جۇمىسىنا ءتوراعالىق ەتتى.

قازاقستان بۇۇ قاۋىپسىزدىك كەڭەسىنىڭ ءتوراعاسى رەتىندە بۇۇ حاتشىلىعىنىڭ كومەگىمەن قاۋىپسىزدىك كەڭەسىنىڭ ۇزدىكسىز كۇندەلىكتى جۇمىسىن قامتاماسىز ەتتى جانە مانداتقا سايكەس جۇكتەلگەن فۋنكسيالاردى ورىندادى.

قازاقستاننىڭ ءتوراعالىعى بارىسىندا كونسۋلتاسيالار، بريفينگتەر جانە پىكىرتالاستار فورماتىندا 30-عا جۋىق وتىرىس وتكىزىلدى جانە ولاردىڭ قورىتىندىلارى بويىنشا كەڭەس ءتوراعاسىنىڭ بۇقارالىق اقپارات قۇرالدارى ءۇشىن قارارلار مەن مالىمدەمەلەر قابىلداندى.

18 قاڭتاردا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ ءتوراعالىق ەتۋىمەن وتكەن «جاپپاي قىرىپ-جويۋ قارۋىن تاراتپاۋ: سەنىم شارالارى» تاقىرىبىنداعى جوعارى دەڭگەيدەگى تاقىرىپتىق بريفينگقازاقستاننىڭ بۇۇ قاۋىپسىزدىك كەڭەسىندە ءتوراعالىق ەتۋىنىڭ باستى ءىس-شاراسى بولدى. وتىرىس سەنىمدى نىعايتۋ شارالارى، سونداي-اق پريەۆەنتيۆتى ديپلوماتيا قۇرالدارىن نىعايتۋ الەمدىك دەرجاۆالار اراسىنداعى ساياسي كونيۋنكتۋرا ناتيجەسىندە ۋاقىتىلى شەشىلمەيتىن كوپتەگەن ماڭىزدى ماسەلەلەر بويىنشا پروگرەسكە قول جەتكىزۋدىڭ نەگىزى بولا الاتىندىعىن كورسەتتى.

وتىرىس قورىتىندىسى بويىنشا بۇۇ قاۋىپسىزدىك كەڭەسىنىڭ ءتوراعاسىنىڭ № S/PRST/2018/1 مالىمدەمەسى (Presidential statement) جانجالداردىڭ الدىن الۋ كەشەندى ستراتەگياسىنا ارنالعان. اتالعان قۇجاتتا پريەۆەنتيۆتى ورىستەتۋ، الدىن-الۋ، تاتۋلاستىرۋشىلىق، بىتىمگەرشىلىك، جانجالدان كەيىنگى بەيبىتشىلىكتى جانە ەسەپ بەرۋ مىندەتتىلىگى شارالارىن نىعايتۋمەن قاتار العاش رەت جاپپاي قىرىپ-جويۋ قارۋىن تاراتپاۋ ماسەلەسى قامتىلدى. بۇل قابىلدانعان قۇجاتتىڭ بىرەگەيلىگى بولىپ تابىلادى.

قازاقستان بۇۇ قاۋىپسىزدىك كەڭەسىنە سايلانعان ورتالىق ازياداعى ءبىرىنشى مەملەكەت رەتىندە ءتوراعالىعى بارىسىندا ايماقتاعى بارلىق مەملەكەتتەرىنىڭ مۇددەلەرىن ىلگەرىلەتۋ بويىنشا بەلسەندى جۇمىسىن جالعاستىردى.

بۇۇ قاۋىپسىزدىك كەڭەسىنىڭ ق ر سىرتقى ىستەر ءمينيسترى قايرات ءابدىراحمانوۆتىڭ توراعالىعىمەن 19 قاڭتاردا وتكەن «قاۋىپسىزدىك پەن دامۋدىڭ ءوزارا تاۋەلدىلىگىنىڭ ۇلگىسى رەتىندە اۋعانستان مەن ورتالىق ازياداعى ايماقتىق سەرىكتەستىكتى قۇرۋ» تاقىرىبىندا وتكەن مينيسترلەر دەڭگەيىندەگى تاقىرىپتىق پىكىرتالاستارى نەگىزگى ءىس-شارالاردىڭ ءبىرى بولدى.

وتىرىسقا كۋۆەيت، رەسەي، پولشا، قىرعىزستان، تاجىكستان جانە وزبەكستاننىڭ سىرتقى ىستەر مينيسترلەرى، ۇلىبريتانيا، نيدەرلاند، اقش، ەكۆاتورلىق گۆينەيا جانە اۋعانستاننىڭ سىرتقى ساياسي ۆەدومستۆو باسشىلارىنىڭ ورىنباسارلارى، سونداي-اق بۇۇ قاۋىپسىزدىك كەڭەسىنىڭ جانە ەۋروپالىق وداقتىڭ مۇشە مەملەكەتتەرىنىڭ دەلەگاسيالارى قاتىستى. بايانداماشى رەتىندە بۇۇ باس حاتشىسى انتونيۋ گۋتەرريش ءسوز سويلەدى.

وتىرىس قورىتىندىسى بويىنشا بۇۇ قاۋىپسىزدىك كەڭەسىنىڭ ءتوراعاسىنىڭ № S/PRST/2018/2 مالىمدەمەسى (Presidential statement) قابىلداندى. قۇجاتتا اۋعانستان مەن ورتالىق ازياداعى ۇزاق مەرزىمدى بەيبىتشىلىكتى، تۇراقتىلىقتى جانە تۇراقتى دامۋدى قامتاماسىز ەتۋ ءۇشىن وڭىرلىك، ايماقارالىق جانە حالىقارالىق ىنتىماقتاستىقتى دامىتۋدىڭ ماڭىزدىلىعى اتاپ كورسەتىلگەن جانە ءوڭىر ەلدەرىنىڭ بەيبىتشىلىك، وركەندەۋ جانە ىنتىماقتاستىق ايماعىن كەڭەيتۋگە باعىتتالعان بىرلەسكەن كۇشتەرىنە قولداۋ بىلدىرىلگەن.

12-15 قاڭتاردا ۇيىمداستىرىلعان بۇۇ قاۋىپسىزدىك كەڭەسى دەلەگاسياسىنىڭ كابۋلعا ساپارى قازاقستان ءتوراعالىعىنىڭ ماڭىزدى ءىس-شاراسى بولدى. ءىس-شارا بارىسىندا ەل باسشىلىعى، ساياسي پارتيالار مەن ازاماتتىق قوعام وكىلدەرىمەن كەزدەسۋلەر وتكىزىلدى. ساپار اياسىندا اۋعانستان ۇكىمەتىنىڭ كەڭ اۋقىمدى ءوزارا بايلانىستى ماسەلەلەردى شەشۋ جونىندەگى كۇشتەرى قاراستىرىلدى سونداي-اق قاۋىپسىزدىك كەڭەسىنىڭ جەرگىلىكتى كۇشتەرگە قوسىمشا جاردەمدەسۋ جولدارى انىقتالدى.

كابۋلداعى دالالىق ميسسيا 2010 جىلدان بەرى قاۋىپسىزدىك كەڭەسىنىڭ اۋعانستانعا العاشقى ساپارى بولدى جانە ول ەلدەگى اعىمداعى جاعدايدى قاراستىرۋعا، سونداي-اق مەملەكەت جانە ونىڭ ازاماتتارىنىڭ مۇددەلەرى مەن باسىمدىقتارىن وبەكتيۆتى تۇسىنۋگە مۇمكىندىك بەردى.

18 قاڭتاردا قازاقستان بۇۇ اياسىندا تەرروريزمسىز الەمگە قول جەتكىزۋ جونىندەگى ارەكەت ەتۋ كودەكسىنىڭ جوباسىن جۇزەگە اسىرۋ ءۇشىن جوعارى دەڭگەيدەگى ارنايى ءىس-شارا وتكىزدى. اتالعان قۇجاتتىڭ نەگىزگى ماقساتى - 2045 جىلعا دەيىن تەرروريزمسىز الەم جانە سەرىكتەس ەلدەردىڭ حالىقارالىق كواليسياسىن قۇرۋ. بۇۇ باسشىلىعى مەن قاۋىپسىزدىك كەڭەسىنىڭ تەرروريزمگە قارسى بولىمشەلەرى، مۇشە-مەملەكەتتەردىڭ جۇزدەن استام دەلەگاسيالارىنىڭ وكىلدەرى كودەكستىڭ وزەكتىلىگى مەن ماڭىزدىلىعىن قولدادى.

ءتوراعالىق اياسىندا تاياۋ شىعىس پەن كيپر، كونگو دەموكراتيالىق رەسپۋبليكاسى، كولۋمبيا، دارفۋر (سۋدان)، باتىس افريكا جانە ساحەل، ليۆيا، مالي، سومالي جانە وڭتۇستىك سۋدانداعى جاعداي جانە بۇۇ ورتالىق ازياداعى پريەۆەنتيۆتى ديپلوماتيا جونىندەگى وڭىرلىك ورتالىعىنىڭ قىزمەتى بويىنشا جوسپارلانعان ءىس-شارالارى (بريفينگتەر مەن كونسۋلتاسيالار) سونداي-اق بۇۇ قاۋىپسىزدىك كەڭەسى مۇشەلەرىنىڭ اقش باسشىلىعىمەن كەزدەسۋ ءۇشىن ۆاشينگتونعا ساپارى وتكىزىلدى.

2 قاڭتاردا وتكىزىلگەن سالتاناتتى تۇردە بۇۇ قاۋىپسىزدىك كەڭەسى زالىنىڭ الدىندا وزدەرىنىڭ ۇلتتىق تۋلارىن ورناتقان التى مۇشە مەملەكەتتەر – كوت-د'يۆۋار، كۋۆەيت، نيدەرلاند، پەرۋ، پولشا، ەكۆاتورلىق گۆينەيا بۇۇ قاۋىپسىزدىك كەڭەسىنە رەسمي قوسىلۋ ءراسىمى قازاقستاننىڭ ءتوراعالىعىنىڭ ەرەكشىلىگى بولدى.

قازاقستان بۇۇ قاۋىپسىزدىك كەڭەسىندە پراكتيكالىق ناتيجەلەرگە قول جەتكىزۋگە جانە كۇن تارتىبىندە قاراستىرىلعان بارلىق ماسەلەلەر بويىنشا كەڭەستىڭ جۇمىسىنا كونسترۋكتيۆتى ۇلەس قوسۋعا ۇمتىلا وتىرىپ، بەيتاراپ، اشىق جانە ترانسپارەنتتى ءتوراعالىق ەتتى.

كوپتەگەن جاھاندىق جانە وڭىرلىك پروسەستەرگە قاتىسۋىن، مەدياسيا مەن سەنىمدىلىكتى نىعايتۋداعى بەلسەندى ۇستانىمىن ەسكەرە وتىرىپ، قازاقستان كوپجاقتى ديپلوماتيا اياسىندا بارلىق حالىقارالىق ۇيىمدار مەن مەملەكەتتەرگە بەيتاراپتىلىعى مەن ءتيىمدى تەڭدەستىرىلگەن تاسىلىمەن بەلگىلى ادال كەلىستىرۋشى رەتىندە ارەكەت ەتۋدى جالعاستىرادى.

قازاقستان رەسپۋبليكاسى مەن پرەزيدەنتىمىزدىڭ بەدەلىنىڭ جوعارى بولۋىنا بايلانىستى قازاقستاندىق دەلەگاسيا باستاماشىلىق ەتكەن ءىس-شارالاردىڭ تابىستى وتكىزىلۋى جانە ولاردىڭ ناتيجەلەرى بويىنشا قورىتىندى قۇجاتتاردىڭ قابىلدانۋى ەلىمىزدىڭ كەلىسىمشارتتىق الەۋەتى مەن بىتىمگەرلىك الەۋەتىنىڭ وزەكتىلىگىن، سونداي-اق قازىرگى زامانعى الەمنىڭ ەڭ وزەكتى ماسەلەلەرىن شەشۋگە قاتىستى ءتيىمدى تاسىلدەرىن كورسەتتى.