سوڭعى ۋاقىتتا وزگە ۇلت وكىلىمەن بىرگە جۇرگەن قازاق قىزدارىنا ءتيىسىپ، ۆيدەوعا ءتۇسىرىپ، الەۋمەتتىك جەلىگە جاريالاۋ ءجيى ورىن الۋدا دەپ جازادى Qamshy.kz اقپارات اگەنتتىگى. شەتەلدىك جىگىتكە تۇرمىسقا شىققان بويجەتكەندەردى سىنعا الىپ، ايىپتاعانداردىڭ ءبىرى جانىبەك يمانمازىرگە جۋرناليست ءارى بلوگەر ارايلىم ءالىمحان حات جازدى.
«قۇرمەتتى جانىبەك مىرزا، ءسىزدىڭ ۇلت ءۇشىن، "قازاق xالقى" دەپ ءار جەردەن پاتريوتتىق سەزىمىڭىزدى ءبىلدىرىپ جۇرگەنىڭىز قۇپتارلىق ءىس ەكەن. الايدا، سوناۋ ۇلكەن باسىڭىزبەن ءار قازاقتىڭ قىزىن شەتەلدىككە بەرمەيمىن، وزگە ۇلت وكىلىن تاڭداعان ءار قازاق قىزى ارسىز دەگەن سوزدەرىڭىزگە كەلىسپەيمىن. شەت ەلدىك جىگىتتىڭ سوڭىنان ەرگەن قازاق قىزدارىنىڭ ءبىرى مەن بولامىن جانە ءوزىمنىڭ بولاشاق جارىمدى ماقتان تۇتامىن. ءسىزدىڭ جاسىڭىزدا جامان ۇلت بولمايتىنىن، جامان ادام بولاتىنىن تۇسىنەتىن ۋاقىت كەلدى ەمەس پە؟
جارايدى، مۇنى تۇسىنبەيدى دەلىك. ال ەندى زاڭ الدىڭدا بۇل دا ۇلكەن قاتەلىك ەكەنىن بىلمەپ پە ەدىڭىز؟ ءبىز كوپۇلتتى ءارى كوپ ءدىندى بەيبىت جانە زايىرلى مەملەكەتتە تۇرامىز. ءسىزدىڭ مىنا قىلىقتارىڭىز ۇلتارالىق ارازداستىققا جاتادى جانە اشۋى كەلگەن ادام ءسىزدىڭ ۇستىڭىزدەن ارىز جازسا ەرتەڭ ءبىر ەمەس بىرنەشە باپپەن سوتتالىپ كەتۋىڭىز مۇمكىن.
ءجا، بۇعان دا قوش دەلىك. كۇيەۋگە تيە الماي جۇرگەن بارلىق قىز-كەلىنشەكتى جيناپ الىپ قايتپەكسىز؟ بىزدە زاڭ بويىنشا توقال الۋعا بولمايدى، ياعني كوپايەلالۋ دەگەنىمىز كوڭىلدەستىڭ سانىن ارتتىرۋ. ەگەر سونشالىقتى "نامىسشىل باتىر" بولساڭىز، قازاقتىڭ قانىن قۇرتتىڭدار دەگەن جانايقايىڭىزدى ەسىتىسىن دەسەڭىز، باسقا ۇلتقا ۇيلەنەتىن جىگىتتەردەن باستاڭىز. نەگە جات جۇرتتىق قىزعا تيىسەسىز دە، باسقا ەركەككە ءسوز ايتا المايسىز؟
جەسىر، اجىراسقان نە بالالى كەلىنشەكتەر شەتەلدىككە تيسە ونىڭ نەسى ايىپ؟ بىرەۋدىڭ جەكە ومىرىنە قول سۇعىپ، كەيبىر ۆيدەودا بەت جىرتىسۋداسىز؟ بۇل ءبىزدىڭ اتا زاڭىمىزعا قايشى ەمەس پە؟
كەرەمەت قازاق جىگىتى، نامىسشىل بولساڭىز ۇلگىلى ازامات رەتىندە ءوزىڭىزدى كورسەتپەيسىز بە؟ دىكەن-دىكەن ەتىپ، بەيتانىس قىزدى قولىڭىزبەن تۇرتكەنىڭىز نە سۇمدىق؟ مۇسىلمان بولساڭىز اۋىزىڭىزدى نەگە باعىپ سويلەمەسكە؟
مەن اۋىزىنان شولمەگىن تۇسىرمەيتىن، قاتىن مەن بالا-شاعاسىن ۇراتىن، قازاقتىڭ جاپ-جاس قىزدارىن قورلاپ زورلايتىن يمانسىز كەيبىر قازاقتىڭ جىگىتىن ەمەس، جۇرەگىندە يمانى بار شەتەلدىك جىگىتتى تاڭدادىم. بارلىق قازاق جامان دەمەيمىن. سول از عانا قازاقتى بىرىنە-بىرىن قارسى قويىپ وتىرعان ءسىزدى جامان دەيمىن.
سىزدەي زاڭ مەن تاريxتان ەش xابارى جوق ادامدار ەلىمدى ارتقا تارتىپ، مەملەكەتىمىزدىڭ وسۋىنە ءوزىنىڭ كەرى اسەرىن تيگىزەرى ءسوزسىز. توقەتەرىم، ەشقانداي xالىق "تازا" ءبىر ۇلتتان تۇرمايدى، قان ءاردايىم الماسىپ وتىرعان”، – دەپ ءسوزىن اياقتادى ارايلىم ءالىمحان.
