تەگەران پوليسياسى حيدجاب كيۋگە قاتىستى زاڭعا قارسىلىق ءبىلدىرىپ ەرەۋىلگە شىققان 29 ايەلدى تۇتقىندادى، دەپ حابارلايدى Qamshy.kz اقپارات اگەنتتىگى euronews.com سايتىنا سىلتەمە جاساپ.

پوليسيا بولىمشەسىندە ولاردى قوعامدىق ءتارتىپتى بۇزعانى ءۇشىن قاماۋعا الىندى دەپ مالىمدەدى.

ەستەرىڭىزگە سالا كەتسەك، الەۋمەتتىك جەلىدە يراندىق ايەلدەردىڭ ورامالدارىن شەشىپ، تۋ ۇستاپ تۇرعان سۋرەتتەرى پايدا بولعان ەدى. قۇقىق قورعا ورگاندارى، تۇتقىنعا الىنعان ايەلدەر شەتەلدىك پروپاگانداشىلاردىڭ ىقپالىنا ۇشىراعان دەپ ايتتى.

مىندەتتى حيدجاپ كيۋگە قاتىستى زاڭعا مەملەكەتتىڭ ەكس-پرەزيدەنتىنىڭ قىزى فاەزە حاشەمي رافساندجاني دا قارسى شىققان.

«حيدجابتى مىندەتتى تۇردە كيۋ كەرەك دەگەن زاڭعا قارسىمىن. كەز كەلگەن ادامنىڭ تاڭداۋ قۇقىعى بولۋى قاجەت. مەن ءوزىمدى مۇسىلمان فەمينيستەرىنىڭ قاتارىنا جاتقىزامىن. ايەلدەر مەن ەرلەردىڭ قۇقىعى تەڭ بولۋى كەرەك»، - دەيدى ول.

ايتا كەتەر بولساق، يراندىق ايەلدەر مەن وزگە ۇلت وكىلدەرىنە قوعامدىق جەرلەردە ورامالسىز جۇرۋگە قاتاڭ تىيىم سالىنعان زاڭ 1979 جىلى قابىلدانعان. سوڭعى جىلدارى مۇنداي تالاپتىڭ ورىندالۋىنا باسا نازار اۋدارۋدا.