قازاقستان-گرەكيا ەكونوميكالىق جانە تەحنولوگيالىق ىنتىماقاستىق جونىندەگى ۇكىمەتارالىق كوميسسياسىنىڭ ءتوراعالارى، قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى رومان ۆاسيلەنكو جانە استاناعا جۇمىس ساپارمەن كەلگەن گرەك رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى گەورگيوس كاترۋگالوس ەكىجاقتى ساياسي جانە ساۋدا-ەكونوميكالىق ىنتىماقتاستىقتىڭ وزەكتى اسپەكتىلەرىن تالقىلادى. گرەك دەلەگاسياسىنىڭ قۇرامىنا ىسكەر توپتاردىڭ وكىلدەرى كىردى، دەپ جازادى Qamshy.kz اقپارات اگەنتتىگى ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ. 

كەلىسسوزدەر استانا مەن افينا اراسىندا ەكىجاقتى ىنتىماقتاستىقتىڭ بارلىق كەشەنى بويىنشا ءوزارا تۇسىنىستىكتى راستادى. بىرلەسكەن جۇمىستىڭ پەرسپەكتيۆالىق باعىتتارى انىقتالىپ، ەكونوميكالىق جانە ينۆەستيسيالىق ءوزارا ارەكەتتەستىكتى تەرەڭدەتۋ جوبالارى قاراستىرىلدى.

ەۋروپالىق وداقتىڭ قازاقستان ازاماتتارى ءۇشىن ۆيزالىق ءتارتىپتى جەڭىلدەتۋ ماسەلەسىنە دە نازار اۋدارىلدى. تاراپتار ۆيزالىق راسىمدەردى وڭايلاتۋ ەۋرووداق پەن قازاقستان اراسىندا ىسكەرلىك، ءبىلىم، مادەني جانە تۋريستىك بايلانىستاردى كەڭەيتۋدە ءوزارا مۇددەلەرگە ساي كەلەتىنىن ءبىراۋىزدان بەلگىلەدى.

حالىقارالىق كۇن ءتارتىبىنىڭ وزەكتى ماسەلەلەرى بويىنشا كەڭىنەن پىكىر الماسىلدى، سونىڭ ىشىندە قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى قىزمەتى، سيرياداعى جاعدايدى رەتتەۋ جونىندەگى استانا پروسەسى، ەو مەن ەۋرازيالىق ەكونوميكالىق وداق اراسىنداعى ءوزارا ارەكەتتەستىكتىڭ پەرسپەكتيۆالارى جانە ت.ب. باعىتتار.

ساپار شەڭبەرىندە ق ر ينۆەستيسيالار جانە دامۋ ۆيسە-مينيسترى ارىستان قابىكەنوۆ پەن گ.كاترۋگالوستىڭ قاتىسۋىمەن ەكى ەلدىڭ 100-گە جۋىق كاسىپكەرلەرىن بىرىكتىرگەن قازاقستان-گرەك بيزنەس-فورۋمى وتكىزىلدى. ءىس-شارا بارىسىندا قازاقستاننىڭ سىرتقى ساۋدا پالاتاسى جانە «SEV» گرەك كاسىپورىندارى فەدەراسياسى ىنتىماقتاستىق تۋرالى كەلىسىمگە قول قويدى.

سونىمەن قاتار، گ.كاترۋگالوستىڭ ق ر اۋىل شارۋاشىلىعى ۆيسە-مينيسترى گۇلميرا يسايەۆامەن جانە «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆپەن كەزدەسۋلەرى ءوتتى.

گ.كاترۋگالوس قازاقستاننىڭ ميتروپوليتتىك ايماعىنىڭ اكىمشىلىك ورتالىعى مەن ۋسپەنسكيي كافەدرالى سوبورىنا باردى. ولاردى ارالاۋ بارىسىندا گرەك قوناعى مەملەكەت باسشىسى نۇرسۇلتان نازاربايەۆتىڭ قولداۋىمەن سالىنعان قۇرىلىستىڭ تاريحىمەن تانىستى. گرەكيا سىرتقى ىستەر ءمينيسترىنىڭ ءبىرىنشى ورىنباسارى ەلىمىزدىڭ ۇلتارالىق بەيبىتشىلىك پەن ءدىنارالىق كەلىسىمدى نىعايتۋ بويىنشا جەتىستىكتەرىن جوعارى باعالادى.