قاراعاندىدا دايش حالىقارالىق لاڭكەستىك ۇيىمىنا (قازاقستاندا جانە ءبىرقاتار وزگە ەلدەردە تىيىم سالىنعان) قاتىسقانى ءۇشىن 30 جاستاعى ايەل 9 جىلعا سوتتالدى، دەپ حابارلايدى Qamshy.kz اقپارات اگەنتتىگى inform.kz سايتىنا سىلتەمە جاساي وتىرىپ.

«تاڭاتاروۆا جانسايا تولەندى قىزى ق ر قك-نىڭ 259-بابى 2-بولىگىنە («تەرروريستiك نە ەكسترەميستiك ارەكەتتى ۇيىمداستىرۋ ماقساتىندا ادامداردى ازعىرىپ كوندىرۋ نەمەسە دايارلاۋ نە قارۋلاندىرۋ»)، 257-24 بابى 3-بولىگىنە («تەرروريستiك توپ قۇرۋ، وعان باسشىلىق ەتۋ جانە ونىڭ ارەكەتىنە قاتىسۋ») سايكەس ايىپتى دەپ تانىلسىن جانە جازانى قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەۋمەن 9 جىلعا باس بوستاندىعىنان ايىرىلسىن»، - دەپ ۇكىمدى وقىدى قاراعاندى وبلىسى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى قايرات قاسىموۆ.

جانسايا تاڭاتاروۆا العاشقى مەديسينالىق كومەك كورسەتۋ داعدىلارىن مەڭگەرگەن. ول سيريادا جاراقات العان سودىرلاردى ەمدەۋدى جوسپارلاعان.

ەسكە سالايىق، قاراعاندىلىق ايەل كامەلەتكە تولماعان تۋىسقان ءىنىسىن سيرياعا الىپ كەتپەك بولعان. ونى ۇلتتىق قاۋىپسىزدىك كوميتەتى قاراعاندى وبلىسى بويىنشا دەپارتامەنتىنىڭ قىزمەتكەرلەرى قاراعاندىدان سيرياعا كەتپەك بولعان جەرىنەن ۇستادى.

ايەل 2017 جىلدىڭ قىركۇيەك ايىندا قاراعاندىدان شىعار جولداعى «سوكۋر» بەكەتىندە قۇرىقتالدى. تەرگەۋ نۇسقاسى بويىنشا، ايەل 2017 جىلدىڭ تامىزىندا قارۋلى قاقتىعىستار بولىپ جاتقان جەرگە بارماق بولعان. لاڭكەستەرمەن بايلانىسىپ، ءوزىن قاتارعا قوسۋىن وتىنگەن. ولار بۇعان سيرياعا جەتۋ جولىن جازىپ كورسەتكەن. ايەل وزىمەن بىرگە 18-گە تولماعان قاينىسىن دا اكەتپەك بولادى. ءبىراق وعان اناسى رۇقسات بەرمەگەندىكتەن، كەيىن اكەتۋگە ۋادە بەرەدى.