بۇل ۇسىنىس قوعامدىق كەڭەستىڭ العاشقى وتىرىسىندا ايتىلدى. استانا قالاسىنىڭ جۇمىسپەن قامتۋ، ەڭبەك جانە الەۋمەتتىك قورعاۋ باسقارماسى باسشىسىنىڭ ورىنباسارى ارتەم ءابىلدينوۆ قوعامدىق كولىكتە مۇمكىندىگى شەكتەۋلى بالالاردى الىپ ءجۇرۋشىنى دە جولاقىسىن تولەۋدەن بوساتۋدى ۇسىندى، دەپ حابارلايدى Qamshy.kz اقپارات اگەنتتىگى ەلوردا اكىمدىگىنىڭ رەسمي سايتىنا سىلتەمە جاساپ.
«استانا ءماسليحاتىنىڭ تۇراقتى كوميسسياسىنىڭ قاۋلىسىنا سايكەس، استانا قالاسىنىڭ جۇمىسپەن قامتۋ، ەڭبەك جانە الەۋمەتتىك قورعاۋ باسقارماسىنىڭ الەۋمەتتىك-مادەني دامۋ ماسەلەسى بويىنشا مۇمكىندىگى شەكتەۋلى بالالاردى الىپ جۇرەتىن ادامدارعا دا جەڭىلدىك جاسايتىن جولاقى ۇسىنۋ مۇمكىندىگىن زەرتتەۋدى ۇسىندى. وسىعان بايلانىستى، مۇگەدەك بالانىڭ اتا-اناسىنىڭ بىرەۋىنە تەگىن جول ءجۇرۋ قۇقىعىن بەرۋ قاراستىرىلۋدا»، – دەپ مالىمدەدى ارتەم ءابىلدينوۆ.
قوعامدىق كەڭەستىڭ قاتىسۋشىلارى جوبانى ءبىراۋىزدان قولداپ، ماقۇلدادى.
ەستەرىڭىزگە سالا كەتەيىك، ارناۋلى الەۋمەتتىك كومەكتىڭ جاڭا فورماتىنىڭ ەنگىزىلۋىنە بايلانىستى، الىنىپ تاستالعان ارنايى مەملەكەتتىك جاردەماقىلاردى الاتىن كوپبالالى وتباسىلار، كوپبالالى انالار دا وسى تەگىن جول جۇرۋمەن قامتاماسىز ەتىلەدى.
