ءبىلىم مەن عىلىمنىڭ قاستەرلى مەكەنى سانالاتىن ءال-فارابي اتىنداعى قازاق ۇلتتىق ۋنيۆەرسيتەتىنىڭ ارحەولوگيا، ەتنولوگيا جانە مۋزەولوگيا كافەدراسىندا ارحەولوگيا جانە ەتنولوگيا ماماندىعى بويىنشا تاريح باستاۋلارىنا شولۋ جاسايتىن بولاشاق ماماندار دايارلانادى.

فاكۋلتەتتەگى ارحەولوگيا،ەتنولوگيا جانە مۋزەولوگيا كافەدراسى 1971 جىلى س. م. كيروۆ اتىنداعى قازاق مەملەكەتتىك ۋنيۆەرسيتەتىنىڭ رەكتورى ۋ. ا. جولداسبەكوۆتىڭ ۇسىنىسى بويىنشا ەڭ العاش قازاقستاندا تاريح فاكۋلتەتىندە اشىلدى. قازىرگى تاڭداعى رەسپۋبليكادا جانە ونىڭ سىرتقى اۋماقتارىندا جوعارى ماماندانعان كادرلار دايىنداۋ ورتالىعى – ارحەولوگيا، ەتنولوگيا جانە مۋزەولوگيا كافەدراسى  بولىپ تابىلادى. سول كەزدە كافەدرا مەڭگەرۋشىسى بولىپ قازاقستاندا تانىمال ارحەولوگ ا. م. ورازبايەۆ شاقىرىلدى. بۇل ماماندانعان كافەدرانىڭ اشىلۋىنا قازاقستانداعى ارحەولوگيالىق – ەتنولوگيالىق عىلىمنىڭ ينتەنسيۆتى دامۋى اسەر ەتتى. اسىرەسە حح ع. ەكىنشى جارتىسىندا ماماندانعان ارحەولوگتار مەن ەتنوگروفتار تاريح سالاسى ءۇشىن وتە قاجەت بولدى. وسى كافەدرادا ۋنيۆەرسيتەتتەگى تاريح فاكۋلتەتىنىڭ ارحەولوگيالىق جانە ەتنوگرافيالىق مۇراجايىنا نەگىز بولعان ارحەولوگيا جانە ەتنوگرافيا كابينەتى قۇرىلدى. كافەدرانىڭ قۇرىلعان كۇنىننەن باستاپ، ونى قازاقستانداعى ايگىلى عالىمدار باسقاردى. 1971 جىلدان باستاپ 1974 جىلعا دەيىن - ت.ع.ك.، دوسەنت ا. م. ورازبايەۆ، 1974 جىلدان باستاپ 1988 جىلدار ارالىعىندا - ت.ع.د.، پروفەسسور ۋ. ح. شالەكەنوۆ جانە 1989 جىلدان باستاپ 2011 جىلدار ارالىعىندا - ت.ع.د.، پروفەسسور ا.ت. تولەۋبايەۆ، 2011 جىلدان 2016 جىلدار ارالىعىندا -ت.ع.د.، پروفەسسور ا.ب. قالىش، 2016 جىلدان بۇگىنگى كۇنگە دەيىن -ت.ع.ك. ع.ق.وماروۆ باسقارىپ وتىر.

تاريحتى زەرتتەۋ ءۇشىن ەڭ الدىمەن ونىڭ ءتۇپ-تامىرىن زەردەلەيتىن عىلىمدارعا ءۇڭىلۋىمىز كەرەك. سولاردىڭ ءبىرى كەلەلى بولاشاعى بار ەتنولوگيا عىلىمى. ەتنولوگيا عىلىمى – حالىقتىڭ ءسالت-داستۇرىن جاڭا زامانمەن قابىستىرا زەرتتەيتىن جانە حالىقتاردىڭ تۇرمىس-تىرشىلىگىن، ماتەريالدىق جانە رۋحاني مادەنيەتتەرىن، حالىقتىڭ ەتنيكالىق تاريحى مەن ەتنولوگيالىق ۇدەرىستەردى سارالايتىن عىلىم سالاسى. ەتنوگرافيالىق ەكسپەديسيا بارىسىندا عىلىمعا ءالى بەلگىسىز تىڭ دۇنيەلەر اشىلىپ، تانىس دۇنيەلەر تولتىرىلىپ ودان ارمەن زەرتتەلە تۇسەدى. ەتنولوگيا عىلىمىنداعى بىلگىر، ەلگە سىيلى ادامداردان اقپارات الۋ، ولارمەن اڭگىمە دۇكەن قۇرۋ ەتنولوگ عالىمدار ءۇشىن ەڭ ءبىر قىزىعۋشىلىق تۋدىراتىن ءسات. قىزىعى مەن شىجىعى قاتار جۇرەتىن بۇل باعىت بولاشاعىنان مول ءۇمىت كۇتتىرەتىن، كەلەشەگى بار سالا.

عىلىمعا تەرەڭ بويلاپ، سالت-داستۇرلەردەگى تىڭ دۇنيەلەردى جاڭعىرتامىن دەگەن بارلىق جاس تۇلەكتەردى ءبىلىم نارىمەن سۋسىنداۋعا شاقىرامىز، ارحەولوگيا جانە ەتنولوگيا ماماندىعى سىزدەردى اسىعا كۇتەدى!

ماقالا جەتەكشىسى: م.ق.ەگىزبايەۆا – ءال-فارابي اتىنداعى

قازۇۋ ارحەولوگيا، ەتنولوگيا جانە

مۋزەولوگيا كافەدراسىنىڭ  دوسەنتى، ت.ع.ك.

بەجە مەيىرحان

تاريح، ارحەولوگيا جانە

ەتنولوگيا فاكۋلتەتى «5ۆ020800 - ارحەولوگيا جانە ەتنولوگيا»

 ماماندىعىنىڭ  3-كۋرس ستۋدەنتى