بۇگىن ستارتاپ-جوبالاردى ينكۋباسيالاۋعا ارنالعان «Garage» تەگىن باعدارلاماسى ىسكە قوسىلدى. وسى باعدارلاما كومەگىمەن ساراپشىلار ءىسىن جاڭادان باستاپ جاتقان كاسىپكەرلەرگە تۇراقتى بيزنەس-مودەلدەردى قۇرىپ، ولاردى دامىتۋعا كومەكتەسەتىن بولادى. 3 ايعا سوزىلاتىن بۇل جوبا قاتىسۋشىلاردى 2018 جىلدىڭ قىركۇيەگىندە باستالاتىن اكسەلەراسيالىق باعارلامانىڭ كەلەسى كەزەڭىنە دايىنداماق. بايقاۋعا قاتىسۋ ءۇشىن 150-دەن اسا ءوتىنىم كەلىپ ءتۇسىپ، ولاردىڭ ىشىنەن ەڭ ۇزدىك جوبالار ىرىكتەلىپ الىندى.

ءىس-شارانىڭ اشىلۋىنا ق ر اقپارات جانە كوممۋنيكاسيا ءمينيسترى داۋرەن ابايەۆ قاتىستى. ول Astana Hub حالىقارالىق IT-ستارتاپتار تەحنوپاركىن قۇرۋ يدەياسى «سيفرلىك قازاقستان» مەملەكەتتىك باعدارلاماسى اياسىندا قامتىلعانىن، سونداي-اق، جوبا تۇجىرىمداماسى حالىقارالىق تاجىريبەنى زەرتتەۋ نەگىزىندە دايىندالعانىن اتاپ ءوتتى.

Astana Hub حالىقارالىق IT-ستارتاپتار تەحنوپاركىنىڭ باسشىسى ماعجان مادييەۆ «Garage» جانە «C-Lab» ستارتاپ-باعدارلامالارىنىڭ قازىرگى ناتيجەلەرىمەن ءبولىستى. «اتالعان باعدارلامالار اياسىندا ءبىز يدەيا جانە پروتوتيپ كەزەڭىندە تۇرعان ستارتاپ-كوماندالارمەن جۇمىس جۇرگىزەمىز. «Garage» پرەاكسەلەراسيالىق باعدارلاماسىنا بىزگە 151 ءوتىنىم كەلىپ ءتۇستى، ولاردىڭ ىشىندەگى 43 جوبا Demo Day-گە وتكىزىلدى. ەڭ باستى تالاپ جوبانىڭ اۋقىمىن كەڭەيتۋگە بولاتىندىعىمەن بايلانىستى. «C-lab» باعدارلاماسىنا 100-دەن اسا ءوتىنىم جىبەرىلدى. بۇگىن قاتىسۋشىلار العاش رەت كورپوراسيالارمەن كەزدەسىپ وتىر، ارى قاراي كوماندالارمەن ەتەنە جۇمىس جۇرگىزىلىپ، اقپاراتتىق سەسسيالار، جەكە كەڭەس بەرۋلەر وتكىزىلەدى، يدەيانى دامىتىپ، ونىڭ ءپروتوتيپىن جاسايتىن بولامىز. جازدا جوبالاردى تەستىلەپ، كومپانيالاردىڭ بازاسىندا ىسكە قوسقالى وتىرمىز»، - دەپ اتاپ ءوتتى مادييەۆ مىرزا.

«Garage» باعدارلاماسى اياسىندا كوماندالار ءوز ستارتابىنىڭ يدەياسىن تەستىلەپ، ەڭ كەم دەگەندە جۇمىسقا جارايتىن ءونىمدى (MVP) جاساپ شىعارۋعا، العاشقى كليەنتتەردى تارتىپ، ءوز جوبالارىن ينۆەستورلارعا تانىستىرۋعا مۇمكىندىك الماق. ينكۋباتوردىڭ ەرەكشەلىگى – ونى كاسىپكەرلەردىڭ ءوزى باسقا كاسىپكەرلەرگە ارناپ قۇرىپ وتىرعاندىعىندا.

باعدارلاما ستيۆ بلانكتىڭ «lean startup» - ۇنەمشىل ستارتاپ دەپ اتالاتىن ءادىسناماسىنا نەگىزدەلگەن. قاتىسۋشىلار كوماندالارعا ءبولىنىپ، ولاردىڭ ءارقايسىسى ءوز يدەياسىن تانىستىرادى. تالىمگەرلەر رەتىندە قاتىساتىن بيزنەسمەندەر ءوز قول استىنا الاتىن كوماندانى تاڭداپ الادى. ەگەر بىرنەشە تالىمگەر ءبىر كوماندانى تاڭدايتىن بولسا، شەشىمدى كوماندىڭ ءوزى جاساماق.

بۇگىن ءاربىر كوماندا ءوز بيزنەس-جوباسىن تانىستىرادى، ال كەشكە ولاردىڭ ىشىندەگى ۇزدىكتەرى «Garage» ستارتاپ-ينكۋباتورىنا قاتىسۋ ءۇشىن تاڭداپ الىنادى. وسىلايشا ءىسىن جاڭادان باستاعان كاسىپكەرلەر تاجىريبەلى تالىمگەرلەردىڭ قول استىندا جوبانى باسقارۋ، ءونىم جاساۋ جانە ماركەتينگ جونىندە تەگىن بىلىمدەرگى يگەرۋگە مۇمكىندىك الادى.

سونداي-اق، قاتىسۋشىلار جوبا اياسىندا باعدارلاما جاساۋشىلار، ديزاينەرلەر، ماركەتولوگتار سىندى مامانداردىڭ قىزمەتتەرىنە قول جەتكىزەدى، سونداي-اق، ولار شاپشاڭ ينتەرنەت، جارناما جاساۋ ءۇشىن سەرىكتەستەردىڭ بەرگەن كۋپوندارى (Google Adwords، Facebook ads)، بۇلتتىق سەرۆيستەر (Amazon web services، Microsoft، Adobe) سىندى بارلىق قاجەتتى قۇرالدارمەن قامتاماسىز ەتىلگەن EXPO اۋماعىنداعى كەڭسەنى پايدالانا الادى.

ستارتاپ-جوبالاردى تانىستىرۋمەن قاتار، اشىلۋ سالتاناتى اياسىندا جاستار اراسىندا كاسىپكەرلىك مادەنيەتتى دامىتۋ جانە وتاندىق بيزنەستى حالىقارالىق نارىققا شىعارۋ تاقىرىبىنا ارنالعان ەكى پانەلدىك سەسسيا ءوتتى.

سەسسيالار كەزىندە سپيكەرلەر رەتىندە كەلەسى تۇلعالار ءسوز سويلەدى:

• ساياسات نۇربەك – تاۋەلسىز ساراپشى
• ەلدار جۇماعازييەۆ – “اتامەكەن” ۇكپ باسقارما ءتوراعاسىنىڭ ورىنباسارى
• قانات قوجاحمەت – س. دەميرەل اتىنداعى ۋنيۆەرسيتەت رەكتورى
• قانات بايعارين – Nazarbayev University ۆيسە-پرەزيدەنتى
• الماس كەبەكبايەۆ - top.kz نەگىزىن قالاۋشى جانە سەو-سى
• الەكساندر دوروشەنكو - Wooppay نەگىزىن قالاۋشى جانە سەو-سى.

Unilever زەرتتەۋىنە سايكەس 2025 جىلعا قاراي كورپوراسيالار مەن ستارتاپتار قويان-قولتىن جۇمىس جۇرگىزبەك. سوندىقتان «Garage» جوباسىنا قوسا، «C-lab زەرتحاناسى» دەپ اتالاتىن تاعى ءبىر ستارتاپ-جوبا ىسكە قوسىلدى. بۇل زەرتحانادا ستارتاپتار كورپوراسيالارمەن ەتەنە جۇمىس جاساپ، ناقتى مىندەتتەردى شەشۋگە جانە ۇزاق مەرزىم بويى جۇمىس جۇرگىزۋگە مۇمكىندىك الادى. Astana Hub جوبانى MOST بيزنەس-ينكۋباتورىمەن بىرلەسە جۇزەگە اسىرىپ جاتىر.

MOST بيزنەس-ينكۋباتورىنىڭ باس ديرەكتورى اليم حاميتوۆ جوبا جونىندە بىلاي دەپ اتاپ ءوتتى: «بۇگىنگى كۇنى «سەنتراس» كومپانيالار توبى، «سبەربانك» اق، UNICEF Kazakhstan، «قازپوشتا» اق، «Astana Innovations» اق سىندى كومپانيالار ءبىزدىڭ سەرىكتەستەرىمىز بولىپ تابىلادى. اتالعان كومپانيالار جوباعا قىزىعۋشىلىقتارىن ءبىلدىرىپ، ستارتاپتار الدىنا مىندەتتەر قويىپ، ولارمەن بىرلەسە ونىمدەردى دامىتۋعا دايىن. باعدارلاما اياسىندا شەشىمدەردىڭ ءپروتوتيپى جاسالادى. 10-عا تارتا «پيلوتتىق جوبا»، سونداي-اق، كورپوراسيالار مەن ستارتاپتاردىڭ 2-3 كوممەرسيالىق ءونىمى ىسكە قوسىلادى دەپ كۇتىپ وتىرمىز».

 «C-lab زەرتحاناسى» - كورپوراتيۆتىك سەكتور مەن ستارتاپتار اراسىن جالعايتىن الاڭ. باعدارلامانىڭ ماقساتى – جاڭا يدەيالار مەن سەرۆيستەردى ىزدەۋ جانە كورپوراتيۆتىك سەكتوردىڭ ستارتاپتارمەن بايلانىسىن دامىتۋ. 5 اقپان كۇنى Astana Hub بازاسىندا وسى باعدارلاماعا قاتىساتىن جوبالار ىرىكتەلىپ الىندى. الداعى ءۇش ايدا «C-lab» زەرتحاناسى كومپانيالارمەن بىرلەسە وتىرىپ، كوماندالارعا يدەيالاردى جاساپ شىعارۋعا كومەكتەسىپ، اقپاراتتىق سەسسيالاردى وتكىزىپ، كوماندالارعا جەكە كەڭەس بەرۋمەن اينالىسىپ، پروتوتيپتەردى جاساپ شىعارادى. ەڭ ۇزدىك جوبالار تەستىلەۋ ساتىسىنا وتكىزىلىپ، جۇزەگە اسىرۋ جونىندە شارت جاساسۋعا مۇمكىندىك الماق.