بۇگىن استانا اكىمدىگىندە دەنساۋلىق ساقتاۋدى سيفرلاندىرۋ بويىنشا باسپا ءسوز جيىنى ءوتتى. سيفرلاندىرۋدىڭ باستى ماقساتتارىنىڭ ءبىرى – دەنساۋلىق ساقتاۋ اقپاراتتىق جۇيەلەرىنىڭ ينتەگراسياسى، مەديسينالىق جۇيەلەردىڭ بىر-بىرىمەن جانە سىرتقى جۇيەمەن اەركەتتەسۋى جانە ءاربىر ازامات ءۇشىن ەلەكتروندىق دەنساۋلىق ساقتاۋ پاسپورتىنىڭ قۇرىلۋى. ەلىمىزدىڭ باس قالاسىنىڭ تۇرعىندارى 2019 جىلدان باستاپ ەلەكتروندىق دەنساۋلىق ساقتاۋ پاسپورتىن يەلەنەتىن بولادى، دەپ حابارلايدى Qamshy.kz اقپارات اگەنتتىگى استانا قالاسى اكىمدىگىنىڭ رەسمي سايتىنا سىلتەمە جاساي وتىرىپ.

ياعني 2019 جىلدان باستاپ ناۋقاس وزىمەن بىرگە دەنساۋلىق كارتاسىن تاسىپ جۇرمەيتىن بولادى. ناۋقاس ادام اۋرۋحاناعا نەمەسە ەمحاناعا قارالاتىن بولسا ول سول كۇنگە دەيىن قانداي سىرقاتقا شالدىققانى، دياگنوزى، اناليزدەرى جانە قانداي ەم-دوم العانى تۋرالى بار اقپارات ەلەكتروندىق پاسپورت ارقىلى دارىگەردىڭ قولىندا بولادى. ءسىزدىڭ تۋعاننان باستاپ دارىگەرگە ءار قارالعانىڭىز ەلەكتروندىق پاسپورتقا ايدان انىق جازىلىپ تۇرادى.

پاسيەنتتە وزىنە تيەسىلى لوگين، پارول ارقىلى ەلەكتروندىق دەنساۋلىق ساقتاۋ پاسپورتىنا كىرىپ سىرقاتى تۋرالى بار اقپاراتتى بىلە الاتىن بولادى. 2018 جىلدان باستاپ ق ر اۋماعىندا ەلەكتروندىق دەنساۋلىق پاسپورتىن كەزەڭ-كەزەڭمەن ەنگىزۋ جوسپارلانعان. بولاشاقتا مۇنداي جۇيە ەلىمىز بويىنشا تولىقتاي قولدانىسقا ەنەدى.

«پايدالانۋشىلاردىڭ ەلەكتروندىق دەنساۋلىق پاسپورتىنداعى دەربەس دەرەكتەرىنە قولجەتىمدىلىك ەلەكتروندىق ۇكىمەتتىڭ سايتىندا پاسيەنتتىڭ جەكە كابينەتى ارقىلى ۇيىمداستىرىلادى. مەديسينالىق اقپاراتتىڭ ورتالىق حابارى رولىندە ەنگىزىلگەن ەلەكتروندىق دەنساۋلىق ساقتاۋ پاسپورتى پاسيەنتتەر مەن مەديسينالىق قىزمەتشىلەردى زاماناۋي جانە سەنىمدى اقپاراتپەن قامتيتىن بولادى. پورتال قازىرگى كۇنى ءوزىن تولىق تۇردە اقتاپ وتىر. پورتال ارقىلى تىركەلگەن پاسيەنت تولىق تۇردە تەگىن ەم الۋدا»، – دەيدى رەسپۋبليكالىق ەلەكتروندىق دەنساۋلىق ساقتاۋ ورتالىعىنىڭ استانا قالالىق فيليالىنىڭ مەديسينالىق اقپاراتتى وندەۋ سەكتورىنىڭ مەڭگەرۋشىسى شاۋزا ساتىبالدينا.