استانا اكىمى تاسقىن سۋعا قارسى كەشەندى ءىس-شارالاردىڭ جوسپارىن بەكىتتى، دەپ حابارلايدى Qamshy.kz اقپارات اگەنتتىگى استانا قالاسى اكىمىنىڭ باسپا ءسوز قىزمەتىنە سىلتەمە جاساپ. 

جوسپار 202 تارماقتان تۇرادى، وعان جاۋاپتى اتقارۋشى رەتىندە قالا اكىمدىگىنىڭ 22 قۇرىلىمدىق بولىمشەلەرى، 8 اۋماقتىق مينيسترلىك ورگانى مەن بولىمشەلەرى، 2 كوممۋنالدىق كاسىپورىن كىرەدى.

ت.زاكاريانوۆ بايانداماسىندا جوسپاردىڭ ەڭ نەگىزگىلەرىن ايتا كەلە، تاسقىن كەزىندە توتەنشە جاعدايدىڭ بولۋ ىقتيمالدىعىن جويۋدى، اسىرەسە «كوكتال» تۇرعىن الابىنداعى جاياۋ جۇرگىنشىلەر جۇرەتىن اسپالى كوپىرگە ەرەكشە توقتالا كەتتى.

«ءسىزدىڭ تاپسىرماڭىز بويىنشا وسى جىلى اسپالى كوپىردىڭ جوبالاۋ-سمەتالىق قۇجاتىن دايىندادىق، ول 15 ناۋرىزعا دەيىن جوندەۋدەن وتەتىن بولادى»، – دەدى ت.زاكاريانوۆ.

ونىڭ ايتۋىنشا، كوكتەمگى جاۋىن-شاشىننىڭ كولەمىنە بولجام جاساۋ ءۇشىن «كازگيدرومەت» رمك بىرلەسىپ مويىلدى وزەنىنىڭ باسسەينى مەن ەسىلدىڭ جوعارى جاعىنا زەرتتەۋ جۇرگىزەتىن مارشرۋتتىق كارتا جاسالىندى. قاڭتاردا مونيتورينگ پەن تالداۋ جاساۋ ءۇشىن قاردىڭ قورى تۋرالى مالىمەت الىنعان بولاتىن.

وسىعان وراي، قالا اكىمدىگى قاردى شىعارۋ جۇمىستارىن ۇيىمداستىرۋعا كىرىسىپ كەتتى. قىس باستالعالى سىرتقا شىعارىلعان قاردىڭ كولەمى 1،8 ملن كۋب م جەتتى، ال بىلتىر وسى ۋاقىتتا شىعارىلعان قار – 3،3 ملن كۋبومەتر بولعان.

وسىعان قاراماستان استانا اكىمى اسەت يسەكەشيەۆ مسقب باسقارماسىنا، قۇرىلىس، ءبىلىم، دەنساۋلىق ساقتاۋ، الەۋمەتتىك قامتۋ جانە اۋدان اكىمدىكتەرىنە الەۋمەتتىك ماڭىزى بار نىسانداردىڭ (بالاباقشا، مەكتەپ، ورتا ارناۋلى وقۋ ورىندارى، جوو) اۋماعىن، قۇرىلىس الاڭدارىن قاردان تازارتۋىن قامتاماسىز ەتۋدى تاپسىردى.

جيىن سوڭىندا قالا اكىمى ءتيىستى ءىس-شارالاردى جۇيەلى ءارى كەشەندى تۇردە جۇزەگە اسىرۋدا تاسقىن سۋعا قاتىستى قاتەلىكتەر جىبەرمەۋىن تاپسىردى.