نۇرسۇلتان نازاربايەۆ ۇكىمەتتىڭ كەڭەيتىلگەن وتىرىسىندا قارجى ءمينيسترى باقىت سۇلتانوۆقا ەكى ەسكەرتۋ جاساپ، ءۇشىنشىسى سوڭعى بولۋى مۇمكىن ەكەنىن ايتتى، دەپ حابارلايدى Qamshy.kz اقپارات اگەنتتىگى.

قارجى ءمينيسترى باقىت سۇلتانوۆتىڭ سوزىنە قاراعاندا، ۆەدومستۆو تاراپىنان كەدەندىك تەكسەرۋلەردى 37،5 پايىزعا قىسقارتۋ جوسپارلانعان. دەگەنمەن، بۇل جوسپار ارتىعىمەن ورىندالىپ، سالىقتىق ءارى كەدەندىك تەكسەرۋلەر 45 پايىزعا ازايدى.

«جالپى بۇل تەكسەرۋشىلەر باسقا باعىتقا اۋىستىرىلدى. سەبەبى قازىرگى كەزدە قازاقستان مەن وزبەكستان شەكاراسىندا اۋقىمدى جۇمىستار باستالدى. بۇل جەردەگى كەيبىر بەكەتتەر بويىنشا تاۋلىك بويى باقىلاۋعا كوشتىك. سوندىقتان ادامداردىڭ ءبىر بولىگىن وسىندا كوشىردىك. بۇدان بولەك، تەكسەرۋشىلەردىڭ نەگىزگى بولىگىن ەكسپورتتىق باقىلاۋ بويىنشا ماقساتتاردى شەشۋگە اۋىستىرۋدامىز. بۇل مىندەتتى ينستيتۋسيونالدى تۇردە بەكىتىپ، جاقىن ارادا قايتا قۇرىلىمداۋىمىز كەرەك. تەكسەرۋشىلەر سانىن 600 ادامعا ازايتىپ، ولاردى اتالعان باعىتتارعا اۋىستىرامىز»، - دەدى باقىت سۇلتانوۆ.

«تەكسەرۋشىلەر سانىن قىسقارتۋدى ەسكەرە وتىرىپ، قاداعالاۋ-تەكسەرۋ قىزمەتتەرىنە اۋقىمدى ريەۆيزيا جۇرگىزۋدى تاپسىرعان بولاتىنمىن. سالىق ورگاندارىن وڭتايلاندىرىپ، قىزمەتكەرلەر سانىن قىسقارتۋى كەرەك ەدى. ناقتىراق ايتقاندا، قارجى مينيسترلىگى 600 ادام تۋرالى ايتتى. ەندى سىزدەر قىسقارتۋدىڭ ورنىنا، ولاردى باسقا باعىتتارعا اۋىستىراتىندارىڭدى ايتىپ جاتسىزدار. بۇل قانشالىقتى ءوزىن اقتايدى»، - دەپ سۇرادى پرەزيدەنت قارجى ءمينيسترى باقىت سۇلتانوۆتان.

«مەن ساعان ەكىنشى ەسكەرتۋ جاساپ وتىرىمىن. ءۇشىنشىسى سوڭعى بولۋى مۇمكىن. جۇمىسىڭدى اتقار. بارلىعىن تارتىپكە كەلتىرۋ كەرەك، بارشا ۇكىمەت وسىمەن اينالىسۋى ءتيىس»، - دەدى ق ر پرەزيدەنتى نۇرسۇلتان نازاربايەۆ.