نۇرسۇلتان نازاربايەۆ ۇكىمەت ۇيىندەگى وتىرىستا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆقا قاتىستى پىكىر ءبىلدىردى، دەپ جازادى Qamshy.kz اقپارات اگەنتتىگى. 

«جەمقورلىققا قارسى كۇرەستى جالعاستىرا بەرەمىز. سوڭعى ەكى جىلدا جالپى سانى 2200 شەندى-شەنەۋنىك جاۋاپقا تارتىلعان ەكەن. ارالارىندا مينيسترلەر، اكىم-قارالار دا بارشىلىق»، — دەدى نازاربايەۆ. 

سونىمەن قاتار ەكس-مينيستر قۋاندىق بيشىمبايەۆقا ارتقان ءۇمىتتىڭ اياققا تاپتالعانىن ايتىپ، وكىنىشىن جەتكىزدى.

«قۋاندىققا جانىم اشيدى. «بولاشاقپەن» وقىتتىق،  ۇلكەن ءۇمىت كۇتتىك. ارتى وسىلاي بولدى. بۇلاردى ۇلكەن قىزمەتكە دايارلاۋعا قانشاما ۋاقىت، قىرۋار قارجى جۇمسادىق. ارينە، وكىنەسىڭ»، — دەدى پرەزيدەنت.

ايتا كەتەيىك، بيشىمبايەۆتىڭ سوتى بىلتىر قاراشادا باستالعان.  ەكس-مينيستر «بايتەرەك Development» ءىسى بويىنشا تەرگەلىپ جاتىر. بيشىمبايەۆ مەملەكەت قارجىسىن قىمقىردى جانە اسا ءىرى كولەمدە پارا الدى دەپ ايىپتالىپ وتىر، الايدا ول وزىنە تاعىلعان ايىپتى مويىنداعان جوق.

سوت بارىسىندا نازاربايەۆتان جانە حالقىنان كەشىرىم سۇرادى. سەبەبى، ءوزىنىڭ ايتۋىنشا، قول استىنداعى قىزمەتكەرلەرگە كوزسىز سەنىپ قالعان.