بۇگىن الماتى وبلىسى تەكەلى قالاسىندا جاڭا سوت عيماراتىنىڭ تۇساۋى كەسىلدى دەپ حابارلايدى Qamshy.kz اقپارات اگەنتتىگى.
جاڭا عيماراتتىڭ اشىلۋ راسىمىنە جوعارعى سوت، وبلىستىق اكىمدىك جانە سوت وكىلدەرى، قالاداعى مەكەمە، كاسىپورىن باسشىلارى، قۇقىققورعاۋ ورگاندارى، ارداگەرلەر، قالا تۇرعىندارى قاتىستى. عيماراتتىڭ سالىنۋىنا رەسپۋبليكالىق بيۋدجەتتەن بارلىعى 231 ملن تەڭگە بولىنگەن. جاڭا عيماراتتا ازاماتتىق جانە قىلمىستىق ىستەردى قارايتىن ەكى سوت زالى، سۋديالار كابينەتى مەن وقۋ بولمەسى بار. بۇدان بولەك، پروكۋراتۋرا، قورعاۋشى جانە وبلىستىق سوتپەن ونلاين رەجيمىندە كونفەرەنسيا وتكىزۋگە ارنالعان ارنايى بولمەلەرى دە بار.
الماتى وبلىستىق سوتىنىڭ ءتوراعاسى مەيرامبەك تايمەردەنوۆ تەكەلى قالالىق سوتىنىڭ قىزمەتكەرلەرىن ساپالى، زاماناۋي تەحنولوگياعا ارقا سۇيەي، رەسپۋبليكالىق بيۋدجەت ەسەبىنەن سالىنعان جاڭا عيماراتقا كوشۋلەرىمەن قۇتتىقتاپ، تاۋەلسىزدىك جىلدارىندا ەلىمىز قول جەتكىزگەن تولاعاي تابىستار سوت جۇيەسىنە دە وڭ اسەرىن تيگىزگەنىن، جوعارعى سوت بەكىتكەن تيپتىك جوبا بويىنشا سالىنعان بۇل عيماراتتا سوتتىق داۋلار قارالاتىن نىسان ساناتتارىنىڭ بارلىق تالاپتارىنا ساي ەكەنىن اتاپ ءوتتى.
