سوڭعى ءاۋىس-تۇيىستىڭ بارىسىندا، الاش بالاسىن قۋانتقان جاڭالىق، كوشى قون كوميتەتىنىڭ قايتادان قۇرىلىپ، ەڭبەك جانە حالىقتى الەۋمەتتىك قورعاۋ مينيسترلىگىنىڭ قۇرامىنا ەنگەنى بولدى. بۇعان دەيىن دە كوميتەت بولىپ، اگەنتتىك بولىپ ءومىر سۇرگەن كوشى-قون 2011 جىلى ىشكى ىستەر مينيسترلىگىنىڭ قۇزىرىنا بەرىلىپ، ابدەن تۇرالاعان ەدى. بۇلاي دەۋىمىزگە سەبەپ: 2012 جىلى ۇكىمەت كوشى قونعا بولىنەتىن كۆوتانى مۇلدەم توقتاتىپ تاستادى. ءسويتىپ، 2011-2014 جىلدار ارالىعىندا جىل سايىن 10 مىڭ وتباسىعا كۆوتا ءبولىپ بەرۋدى قاراستىرعان ۇكىمەت ءوز قاۋلىسىنا ءوزى قارسى شىعىپ كوشتىڭ بەتىن كەرى قايتارىپ تاستادى. ال، ىشكى ىستەر مينيسترلىگى قازاق كوشىن جالدامالى ەڭبەك كۇشىنىڭ دەڭگەيىنە دەيىن ءتۇسىرىپ جىبەردى. 1991 جىلدان باستالعان كوش، كەيبىر مالىمەتتەرگە سۇيەنسەك، 1 جارىم ميلليون قازاقتىڭ ەلگە قوسىلۋىنا مۇرىندىق بولعان كورىنەدى. ءيا، ءوز جۇرتىندا قازاق قارا ورمانداي قالىڭ ەلگە اينالىپ ۇلگەرىپتى. مىنە، وسى جايت الدەكىمدەرگە ۇنامايتىن بولسا كەرەك، سوڭعى بىرەر جىلدىڭ شيرەگىندە قازاق كوشىنە قارسى جۇمىس قارقىن الدى. قاندايدا ءبىر كەلەڭسىز جايتقا اتاجۇرتىنا ورالعان قازاقتى ايىپتى سانايتىن پىكىرلەر كوبەيدى. سول كوپ پىكىردىڭ ءبىرى جاڭاوزەن وقيعاسى كەزىندە رەسمي تۇلعالاردىڭ اۋزىنان دا شىعىپ كەتتى. جەتى اي بويى الەۋمەتتىك ادىلدىكتى تالاپ ەتكەن مۇنايشىلاردىڭ مۇڭىن تۇسىنە الماعان ۇكىمەت «وسىنىڭ ءبارىن ۇيىمداستىرىپ، پالەنى باستاپ جۇرگەن ورالماندار» دەپ سوقتى. بۇل، انىعىندا قازاق ۇكىمەتىنىڭ قازاق ماسەلەسىنە، ۇلتتىق مۇددەگە قارسى ارەكەتىن اشكەرەلەگەن ۇستانىمى ەدى. الايدا، جاڭاوزەندەگى جاپپاي تارتىپسىزدىكتىڭ سالدارىنان ءىستى بولعان ادامدار قاتارىنان ورالمان مارتەبەسى بار ءبىر پەندە تابىلمادى. ءقازىر قىتايدا قازاق مەكتەپتەرى دەرلىك جابىلدى. وزبەكستانداعى 565-تەن اسا قازاق مەكتەبىنىڭ 40-50ء-ى عانا قالدى. ءبىزدىڭ «ماڭگىلىك دوسىمىز» رەسەيدە قازاق مەكتەبى تۋرالى ءتىپتى ايتۋعا دا بولمايدى. قىسقاسى، ءبىز الداعى از جىلداردا سىرتتاعى بار قازاعىمىزدان ايرىلىپ قالۋىمىز مۇمكىن. نەگە؟ سەبەبى، تەگى قازاق بولعانىمەن ءتىلى قىتايلانعان، وزبەكتەنگەن، ورىستانعان، پارسىلانعان قازاق قازاق بولمايدى. كوشى قون ساياساتى - ۇلى ساياسات. وسىنى سەرىك احمەتوۆ ۇكىمەتى بەك ءتۇسىنىپ ارەكەت ەتسە ءجون بولار ەدى...
«31» ارنا
پىكىر قالدىرۋ