الماتىدا كولىك رەفورماسىن جانە قوعامدىق كولىك جۇيەسىن تۇراقتاندىرۋ اياسىندا جىلجىمالى سوستاۆتى جاڭالاۋ جانە باعىتتار جەلىسىن ۇلعايتۋ جۇمىستارى جالعاسۋدا. الماتى اكىمى باۋىرجان بايبەك جۇمىس ساپارى بارىسىندا №137 باعىت بويىنشا جولعا شىققان ەۆرو-5 ەكولوگيالىق سىنىپتاعى جاڭا اۆتوبۋستاردى كوردى. بۇل تۋرالى Qamshy.kz اقپارات اگەنتتىگى الماتى قالاسى اكىمدىگىنىڭ باسپا ءسوز قىزمەتىنە سىلتەمە جاساپ حابارلايدى. 

بۇرىندارى بۇل باعىت بويىنشا جوسپارلانعان 20 كولىكتىڭ نەبارى 6 عانا جولعا شىعاتىن، سونىڭ سالدارىنان قوزعالىس ينتەرۆالى 50 مينۋت بولدى. بۇل باعىت تۇرعىندارعا وتە قاجەت، كولىك «قايرات» ەلدى مەكەنىن، الماتى-1 تەمىرجول ۆوكزالىن، ۋنيۆەرسالدى بازاردى، سايران اۆتوبەكەتىن، قالقامان ەلدى مەكەنىن، №7 قالالىق ەمحانانى، ناۋرىزباي اۋدانىنىڭ اكىمشىلىك ورتالىعىن قامتيدى. وسىعان وراي، بۇل باعىت بويىنشا سىيىمدىلىعى ۇلكەن تومەن ەدەندى 20 اۆتوبۋسى بار «الماتىەلەكتروترانس» ج ش س قىزمەت كورسەتۋى ءتيىس دەگەن شەشىم قابىلداندى. سونىڭ ارقاسىندا باعىتتاعى ينتەرۆال بۇرىنعى 50 مينۋتتان 12 مينۋتقا دەيىن قىسقارىپ، جولاۋشى لەگى بەس ەسە ارتادى دەپ كۇتىلۋدە.

«ءبىز ەكى جىلدان استام ۋاقىت بويى كەز كەلگەن مەگاپوليستە كۇردەلى بولىپ تابىلاتىن كولىك رەفورماسىن جۇرگىزۋدەمىز. بيۋدجەت قارجىسى ەسەبىنەن اۆتوبۋستاردى ساتىپ الۋدامىز، جەكە تاسىمالداۋشىلار دا قوزعالمالى سوستاۆتى جاڭارتۋدا. الايدا كەيبىرەۋلەر جەكە قارجىلارىن سالۋعا، نارىقتىق قاتىناستا جۇمىس ىستەۋگە دايىن ەمەس، مىسالى، №137 باعىتتاعى اۆتوبۋستار سوناۋ 2003 جىلى عانا جاڭارعان ەكەن. بۇگىنگى كۇنى اۆتوپاركتەرىن جاڭارتقان كومپانيالارعا سۋبسيديالار بولىنەدى بارلىق تاسىمالداۋشىلارعا جەڭىلدەتىلگەن جولاۋشىلار ءۇشىن تولەم بەرىلەدى. قازىرگى كەزدە الداعى بولاشاققا جۇمىس ىستەيتىن كومپانيالار ءۇشىن نارىق جاريالى، ءتيىمدى، بارلىق جاعدايلار جاسالعان»، -دەدى مەگاپوليس اكىمى.

باۋىرجان بايبەك الماتى قالاسى ءۇشىن تاسىمالداۋ قىزمەت كورسەتەتىن 1400 اۆتوبۋستىڭ ازدىق ەتەتىنىن، قالادا 2 ملن ادام تۇراتىنىن، سوندىقتان كولىكتى رەفورمالاۋ اياسىندا تۇراقتى جۇمىستاردىڭ جۇزەگە اسىپ جاتقانىن، گازبەن جۇمىس ىستەيتىن 200 اۆتوبۋسقا ەسەپتەلگەن اۆتوپاركتىڭ، ەلەكترواۆتوبۋس قۇراستىراتىن زاۋىتتىڭ، مەترو بەكەتتەرىنىڭ سالىنىپ جاتقانىن جانە جرك جوباسىنىڭ قولعا الىنعانىن ايتتى.

ەسكە سالساق، الماتىدا №131، 115، 127، 12، 22، 70، 86، 65، 103، 50، 126، 112،22، 70، 86، 65، 103، 50، 126، 112 باعىتتارى بويىنشا جاڭا اۆتوبۋستار جولعا شىعىپ، №77 باعىت قايتا جاڭارىپ، №1 باعىت پەن №201 ماگيسترالدى باعىتى اشىلعان ەدى. كورشى وبلىستان قالاعا قوسىلعان ەلدى مەكەندەردى كولىكپەن تولىق قامتۋ ءۇشىن 10 باعىت اشىلدى.