ق ر جازۋشىلار وداعىنىڭ ادەبيەتشىلەر ۇيىندە اقيىق اقىن م.ماقاتايەۆتىڭ تۋعان كۇنىنە ارنالعان "جىرلايدى جۇرەك" اتتى پوەزيا جانە ءان كەشى ءوتتى، - دەپ حابارلايدى Qamshy.kz پورتالى.

كەشتە قازاقستان ەسترادا جۇلدىزدارى مەن تەاتر مايتالماندارى ونەر كورسەتتى. قازاق پوەزياسىنىڭ اقتاڭگەرى، مۇزبالاق اقىن مۇقاعالي ماقاتايەۆتىڭ تۋعان كۇنىنە جازۋشىلار وداعى، ادەبيەتشىلەر ۇيىنە جينالعان حالىقتا قاراسى كوپ بولدى. ادەبيەتشىلەر ۇيىنە كورەرمەنگە لىق تولىپ، ورىن جەتپەي قالعان كورەرمەندەر ەكى ساعاتقا سوزىلعان كونسەرتتى تىكەسىنەن تىك تۇرىپ تاماشالادى.

پوەزيا مەن ءان كەشىنىڭ شىمىلدىعىن ق ر جازۋشىلار وداعى باسقارماسىنىڭ ءتوراعاسى، سەنات دەپۋتاتى نۇرلان ورازالين اشىپ، اقىننىڭ پوەزياسىنىڭ قاراپايىمدىلىعىن، قۇدىرەتتىلىگىن سونداي-اق، كوركەمدىگىن تالدادى. اقىننىڭ ءومىر جولى تۋرالى ەستەلىكتەرمەن ءبولىسىپ، شىعارماشىلىعى تۋرالى كوپتەگەن جاقسى سوزدەر ايتىلدى. كەشكە اقىننىڭ ۇلى جۇلدىز مۇقاعالي ۇلى، اقىن عالىم جايلىباي جانە كوپتەگەن قالامگەرلەر مەن ونەر جۇلدىزدارى قاتىستى. اقىننىڭ سوزىنە جازىلعان تاماشا اندەردى تاڭات مامىرحان ۇلى، سۇلۋشاش نۇرماعانبەتوۆا قاتارلى ەلگە تانىمال ونەرپازدار ناقىشىنا كەلتىرە ورىندادى. كەشتى اقىن باقىت بەدەلحان جۇرگىزىپ وتىردى. سونىمەن قاتار، اقىننىڭ ولەڭدەرىن مەكتەپ بۇلدىرشىندەرى مەن م.اۋەزوۆ اتىنداعى مەملەكەتتىك دراما تەاترىنىڭ اكتەرلەرى مانەرلەپ وقىدى.

بيىل قازاقتىڭ مۇقاعاليىنىڭ ورتامىزدان كەتكەتىنە 40 جىل تولادى ەكەن. وسى كەشتە اقىن ءابدىلدا تاجىبايەۆتىڭ: "ولەڭ ولمەيدى. ەندەشە ونى جازعان اقىن دا ولمەيدى. سول سەكىلدى ماقاتايەۆ تا كوز جۇمعان جوق. قاتارىمىزدا، كۇنبە كۇن قاسىمىزدا" دەگەن ءسوزىنىڭ راس ەكەنىنە كوزىمىز تاعى ءبىر مارتە جەتكەندەي بولدى. قازاق قارا ولەڭىنىڭ مۇزبالاعى ءوزىنىڭ ولەڭدەرىمەن ماڭگى جاساي بەرمەك. بۇگىن دە ول مۇزبالاق قىرانشا ءدۇر سىلكىنىپ، بۇكىل زالدى ءبىر ءوزى تولتىرىپ وتىرعانداي بولدى. كەشكە جينالعان جىر سۇيەر قاۋىم دا جازىق ماڭدايى جارقىراپ، جارقىلداپ جىر وقىپ تۇرعان اقىننىڭ پوەزياسىمەن، وزىمەن سىرلاسقانداي اسەرمەن تارقاستى.

نۇرگەلدى ءابدىعاني ۇلى