الماتى وبلىسىندا بىرىگىپ ۇيلەرىنەن قاشقان ۇل مەن قىز تابىلدى. 12 جاستاعى وقۋشىلاردى ەكى كۇن بويى ىزدەگەن، دەپ حابارلايدى Qamshy.kz اقپارات اگەنتتىگى قازاقپاراتقا سۇيەنىپ. 

وبلىستىق ءىىد باسپا ءسوز قىزمەتىنىڭ مالىمەتىنشە، 2006 جىلعى جاسوسپىرىمدەر ىلە اۋدانىندا تۇرادى. بايسەركە اۋىلى ماڭىنداعى ساياجايلاردىڭ بىرىندە تۇراتىن ولار 19 اقپان كۇنى ۇيلەرىنە ورالماعان. «ىزدەۋ جۇمىستارى الماتى قالاسىندا دا جۇرگىزىلدى.

مۇعالىمدەر مەن مەكتەپ ينسپەكتورلارى ەكى بالانى «ساياحات» اۋدانىنان تاپتى. ولار ەكى كۇن بويى وسى جەردە قاڭعىپ جۇرگەن جانە سول ماڭدا تۇنەگەن. ءقازىر وقۋشىلار اتا-اناسىنا تاپسىرىلدى. ايتا كەتۋ كەرەك، ەكى وقۋشى ءبىر مەكتەپتە وقىمايدى»، - دەدى وبلىستىق ءىىد باسپا ءسوز قىزمەتى. انىقتالعانداي، ەكى وقۋشىنىڭ  ۇيدەن قاشۋى العاشقى  جاعداي ەمەس ەكەن.

وسى جايتقا بايلانىستى ولاردىڭ اتا-اناسى اكىمشىلىك جاۋاپكەرشىلىككە تارتىلاتىن بولادى. سونداي-اق، جاۋاپتى ماماندار بارلىق قۇجاتتاردى  جيناپ، جاسوسپىرىمدەر ىسىمەن اينالىساتىن اكىمدىكتەگى كوميسسياعا تاپسىرعان. ەندى جاسوسپىرىمدەردىڭ اتا-اناسىن اتا-انالىق قۇقىعىنان ايىرۋ ماسەلەسىن قاراستىراتىن بولادى.