پحەنچحان وليمپياداسىنىڭ قولا جۇلدەگەرى يۋليا گالىشيەۆا وزىنە 2015 جىلى رەسەيدىڭ اتىنان ونەر كورسەتۋ تۋرالى ۇسىنىس تۇسكەنىن ايتتى، دەپ حابارلايدى Qamshy.kz اقپارات اگەنتتىگى قازاقپاراتقا سۇيەنىپ.
وسكەمەندىك جەرلەستەرىمەن اۋەجايدا قاۋىشپاس بۇرىن يۋليا گالىشيەۆا جۋرناليستەردىڭ ساۋالدارىنا جاۋاپ بەردى. «ماعان سوچي وليمپياداسىنا ءبىر اي قالعاندا كانادادان ۇسىنىس ءتۇستى. ءتىپتى سول ەلدىڭ ءتولقۇجاتىن دا بەرمەكشى بولعان.
ال 2015 جىلى رەسەيلىكتەر ازاماتتىق ۇسىندى. كورىپ تۇرعاندارىڭىزداي، مەن كەلىسپەدىم. مەن ءوزىمدى ءوسىرىپ، جەتكىزگەن قازاقستاننىڭ عانا اتىنان سىنعا تۇسەمىن. ويتكەنى وتانىم - قازاقستان»، - دەدى فريستايلشى. يۋليا ءۇشىن وليمپيادا اياقتالعانىمەن، ەڭبەك دەمالىسىن مامىر ايىنا قاراي الماق. «فريستايل سپورتىنىڭ ماۋسىمى تەڭ ورتاسىنا كەلدى.
سوندىقتان، ءالى 2 ايداي جارىستارعا قاتىسامىن. ازىرگە سپورتتان قول ءۇزىپ نەمەسە ءۇزىلىس جاريالايىن دەگەن جوسپارىم جوق»، - دەيدى يۋليا گالىشيەۆا. ول پەحنچحان تورىندە تورەشىلەردىڭ ءادىل قىزمەت ەتكەنىن دە اتاپ ءوتتى. «تورەشىلەرگە ايتار سىنىم جوق. ونەرىمە لايىق باعا بەردى دەپ ويلايمىن» - دەدى وليمپيادا جۇلدەگەرى.
