Facebook قولدانۋشىسى سەرىكجان مامبەتالين ءوزىنىڭ جەكە پاراقشاسىنا اتىراۋ وبلىسىنىڭ ەكس-اكىمى بەرگەي رىسقالييەۆتىڭ ۇلىبريتانيادا تۇرىپ جاتقانىن جازدى، دەپ حابارلايدى Qamshy.kz اقپارات اگەنتتىگى. ايتا كەتەيىك، جاقىندا سىبايلاس جەمقورلىققا قارسى ۇلتتىق بيۋرو رىسقالييەۆتى تەرگەۋگە شاقىرعان بولاتىن.

«مەن 90-شى جىلداردىڭ باسىندا، شاعىن بيزنەسپەن اينالىسقان كەزدە، باتىستىڭ ءبىر جىگىتىمەن تانىستىم. ەسىمى بەرگەي بولاتىن. سودان بەرى ءارقايسىمىز ءوز جولىن تاڭداپ جۇردىك، تەك جاقىندا لوندوندا كەزدەسىپ قالدىق. 

كەشەدەن بەرى جەمقورلىققا قارسى ءىس-قيمىل اگەنتتىگى بەرگەي رىسقالييەۆتى تەرگەۋ ماسەلەسىمەن استاناعا شاقىرىپ جاتىر. 

بەرگەي اكىم بولىپ تاعايىندالۋىنىڭ الدىندا سالىق دەكلاراسياسىن جاريالاپ، باي بيزنەسمەن بولعانىن دالەلدەدى. ول يەمدەنگەن زاۋىتتار، مۇناي كەن ورىندارى جانە دۇكەن جەلىلەرىنىڭ قۇنى – 150 ميلليون اقش دوللارىنا جۋىق. 

اتىراۋدا اكىم بولعان كەزىندە مەن لوندوندا ءومىر ءسۇردىم. ءبىراق، جەرگىلىكتى تۇرعىنداردىڭ ايتۋىنشا، ول كىسى جۇمىسىن ادال جانە ءتيىمدى اتقارعان.

ءوڭىردى گاز جانە سۋمەن قامتاماسىز ەتىپ، جاڭا كوپىرلەر سالعان، كالانىڭ جولدارى رەتتەلىپ، اۋداندارعا دەيىن جاڭا جولداردى سالدىرعان. بۇگىن دە اتىراۋلىقتار بەرگەي تۇرالى جاقسى جىلى پىكىردە.

بەرگەي رىسقالييەۆ پەن ونىڭ اعاسىنا قاتىستى سىبىس كوپ.  ونىڭ قازىرگى جاعدايى جاقسى، ول ۇلىبريتانيادا ساياسي بوسقىن مارتەبەسىن العان. اعىلشىن زاڭى بويىنشا، استاناعا كەلىپ جەمقورلىققا قارسى كۇرەس اگەنتتىگىنە جاۋاپ بەرە المايدى. ءبىراق، مەنىڭ ويىمشا، سكايپ ارقىلى تۇسىنىكتەمە بەرۋگە مۇمكىندىگى بار. ونىڭ كىنالى نەمەسە كىناسىز ەكەنىن تەك تاۋەلسىز سوت شەشە الادى. ونداي سوت قازاقستاندا ەشقاشان بولماعان. ال بەرگەي ساۋلەبايۇلىنا قويار سۇراقتارىڭىز بولسا، پىكىر قالدىرىڭىز، ول وقىپ جاۋاپ بەرەدى دەپ ۇمىتتەنەمىن»، — دەپ جازادى سەرىكجان مامبەتالين.