جىلداعى داستۇرىنەن جاڭىلماعان استانا قالاسىنداعى ساكەن سەيفۋللين مۋزەيى اقپان ايىنىڭ 25ء-ى كۇنى قازاق ەلىنىڭ اسىل پەرزەنتى، ادەبيەتىمىزدىڭ نەگىزىن قالاۋشىلاردىڭ ءبىرى، اقىن، جازۋشى، سازگەر، مەملەكەت جانە قوعام قايراتكەرى ساكەن سەيفۋلليننىڭ قازا بولعان كۇنىنە ارنالعان «ەر ەسىمى – ەل ەسىندە» اتتى ەسكە الۋ كەشىن وتكىزدى، دەپ حابارلايدى Qamshy.kz اقپارات اگەنتتىگى.
ءۇش عاسىردىڭ كۋاسى بولعان عيماراتتا ورنالاسقان س. سەيفۋللين مۋزەيى اقىن اتىن ارداقتاۋ جولىندا كوپتەگەن ءىس-شارالاردىڭ ۇيىتقىسى بولىپ ءجۇر.
جىل بويى بەلگىلەنگەن ۋاقىتتاردا قالا مەكتەپتەرى مەن وقۋ ورىندارىندا كەزدەسۋلەر مەن كەشتەر ۇيىمداستىرىلىپ، كورمەلەر وتكىزىلىپ تۇرادى.
«ەر ەسىمى – ەل ەسىندە» ەسكە الۋ جيىنى اقىن ەسكەرتكىشىنە گۇل شوعىن قويۋ راسىمىنەن باستالدى. ساكەن ەسكەرتكىشىنىڭ الدىندا العاشقى ءسوزدى مۋزەي ديرەكتورى نەسىپبەك ايت ۇلى باستاپ، اقىن رۋحىنا ارنالعان ولەڭدەر وقىدى. ەستەلىكتەر ايتتى. گۇل قويۋ راسىمىنەن كەيىن كوپشىلىك كەشتى مۋزەيدىڭ ءماجىلىس زالىندا جالعاستىردى.
زال ىشىندە ساكەن سەيفۋللين مۋزەيىنىڭ العاشقى ديرەكتورى روزا اسىلبەكوۆا، ساكەنتانۋشى عالىم امانتاي كاكەن، بەلگىلى عالىم سەرىك نەگيموۆ ءسوز الىپ، اقىن ءومىرى تۋرالى، مۋزەي تاريحى جايلى اڭگىمە ءوربىتتى. تۇلعا جايىندا وي تولعادى. ال بەلگىلى كۇيشى جانعالي ءجۇزباي ساكەننىڭ اكەسى سەيفۋللانىڭ كۇيى تۋرالى سىر شەرتتى. كوپتەگەن دەرەكتەر ايتىپ، اڭگىمە اۋانىن عىلىمي تالقىعا اينالدىردى.
استانا قالاسى 42 مەكتەپتىڭ وقۋشىلارى الدىڭعى بۋىن اعالاردىڭ ونەگەسىن تىڭداپ، ساكەن تۋرالى مالىمەتكە قانىقتى. سونىمەن بىرگە اتالمىش مەكتەپتىڭ 7-سىنىپ وقۋشى ديانا نۇريدين مەن ءابىلحايىر اقىن ولەڭدەرىن وقىپ بەردى.
كەش سوڭىندا مۋزەي قىزمەتكەرلەرى كەلگەن قوناقتارعا ەكسكۋرسيا جۇرگىزدى.
