ءمينيستردىڭ ايتۋىنشا، ەل اۋماعى بويىنشا بىلتىر 600 شاقىرىمنان استام رەسپۋبليكالىق ماڭىزى بار جول ىسكە قوسىلعان. ال بيىل 528 شاقىرىم جولدى پايدالانۋعا بەرۋ جوسپارلانىپ وتىر.

«جول بويىنشا جيىرمادان استام ءىرى جوبالارمەن جۇمىس ىستەپ جاتىرمىز. بۇل جوبالار قازاقستان وڭىرلەرىنىڭ بارلىعىن دەرلىك، شىعىستى، باتىستى، ورتالىقتى جانە باسقا دا ايماقتاردى قامتيتىن بولادى»، — دەدى ول. 

جالپى، الداعى 3-4 جىلدىڭ ىشىندە رەسپۋبليكالىق ماڭىزى بار جولداردىڭ 4 مىڭ شاقىرىمنان استامى جوندەلەتىن بولادى. ولاردا جىل سايىن 100 مىڭعا جۋىق جۇمىس ورىندارى اشىلماق.

«سوندىقتان وسى جوبالاردىڭ ءبىزدىڭ ەكونوميكامىزعا اسەرى زور، ماڭىزى جوعارى بولماق»، — دەدى ج. قاسىمبەك.

مينيستر الداعى ۋاقىتتا ەنگىزىلەتىن اقىلى جولدارعا دا توقتالدى.

«ءبىز استانا – تەمىرتاۋ، قاپشاعاي – الماتى جانە الماتى – قورعاس جولدارىن پيلوتتىق رەجيمدە اقىلى ەتپەك بولدىق، بۇل جۇمىستاردى ءبىرىنشى توقساندا باستاۋعا نيەتتى ەدىك. ءبىراق تەحنيكالىق ماسەلەلەر تۋىنداۋىنا بايلانىستى كەيىنگە قالدىردىق. ءبىرىنشى توقساندا قۇرىلىس-مونتاجداۋ جۇمىستارىن اياقتاپ، ەكىنشى توقساندا پيلوتتىق رەجيمدە جۇمىسىن باستايمىز»، — دەدى ج. قاسىمبەك. 

ينۆەستيسيالار جانە دامۋ مينيسترلىگى بۇل جولدار بيىلعى جىلدىڭ ماۋسىم ايىندا تولىق ستاسيونارلىق اقىلى رەجيمگە كوشەدى دەپ جوسپارلاپ وتىر. اتاپ ايتقاندا، وسى ءۇش جول ۋچاسكەسى — الماتى – قورعاس جولى، الماتى – قاپشاعاي جانە استانادان تەمىرتاۋعا دەيىنگى جول اقىلى بولماق.

«بۇگىنگى تاڭدا تەك ءبىر جول عانا اقىلى رەجيمدە جۇمىس ىستەپ تۇر، ول — استانا –ششۋچينسك جولى»، — دەدى سالا باسشىسى. 

جالپى، 2020 جىلعا دەيىن اقىلى جولداردى 6،5 مىڭ شاقىرىمعا دەيىن جەتكىزۋ جوسپارلانىپ وتىر. ول شامامەن جىلىنا 30 ملرد تەڭگە تابىس اكەلەدى. 

سونىمەن قاتار، 5،5 شاقىرىم جول ءۇشىن مەملەكەتتىك-جەكەشەلىك سەرىكتەستىك تەتىكتەرىن پايدالانۋ ارقىلى ىسكە اسىرۋ قاراستىرىلعان. بيىلعى جىلدىڭ ەكىنشى جارتىسىندا مەملەكەتتىك-جەكەشەلىك ارىپتەستىك كەلىسىمشارتى جاسالادى.

«ءتيىستى كونكۋرس وتكىزىلدى. اعىمداعى جىلدىڭ اياعىنا دەيىن، بالكىم، ءبىرىنشى جارتىجىلدىقتا ءمجا كەلىسىمشارتىنا قول قويامىز دەپ وتىرمىز»، — دەدى ج. قاسىمبەك.