قار ەرۋىنە بايلانىستى قازاقستاننىڭ بىرنەشە وڭىرىندە دابىلدى ەسكەرتۋ جاريالاندى، دەپ حابارلايدى "قازگيدرومەت" رمك. 

سينوپتيكتەردىڭ مالىمەتىنشە، 10-12 ناۋرىزدا اۋا تەمپەراتۋراسىنىڭ كۇندىز جىلىنۋىنا بايلانىستى جانە شىعىس قازاقستاننىڭ الاسا تاۋلى ايماقتارىندا جاۋىن-شاشىن تۇسۋىنە وراي اعىن سۋ پايدا بولۋى مۇمكىن.

«11-12 ناۋرىزدا وڭتۇستىك قازاقستان، جامبىل، الماتى وبلىستارى جانە الماتى قالاسىنىڭ الاسا تاۋلى ايماقتارىنداعى وزەندەردە جاڭبىر جاۋۋىنا بايلانىستى سۋ باسۋ ءقاۋپى تۋىنداپ، تاۋدان جانە جەرگىلىكتى وڭىردە اعىن سۋ جيناقتالۋى مۇمكىن»، — دەلىنگەن حابارلامادا.

سونىمەن قاتار 10-11 ناۋرىزدا جامبىل وبلىسىندا وڭتۇستىك-باتىس، باتىستان سوققان جەلدىڭ ەكپىنى كەي جەرلەردە 15-20-گە جەتىپ، ۇيىتقۋى 23-28 م/س بولادى. 10 ناۋرىزدا كۇندىز، 11 ناۋرىزدا كۇنى بويى وبلىستىڭ وڭتۇستىك-باتىسىندا جەلدىڭ ۇيىتقۋى 30 م/س-گە جەتەدى.  

داۋىل ىقتيمالدىعى 90%.