«ءدىندى ساۋداعا سالۋ ارقىلى ءبىزدىڭ سىرتىمىزدان حاليفالىق ەتۋدى ارماندايسىز»

تۇركيا پرەزيدەنتى ءارى اق پارتيا باسشىسى ر.ت. ەردوعاننىڭ الجيرگە جاسايتىن ءىسساپارى قارساڭىندا دۇنيەجۇزىنە تانىمال الجيرلىك ادەبيەتتانۋشى كامەل داۋد ەردوعانعا اشىق حات جولدادى. ەردوعاندى قاتال سىنعا العان «Huffington Post» باسىلىمىندا جارىق كورگەن جازبا الەۋمەتتىك جەلىدە كەڭىنەن تالقىعا ءتۇستى. نەگىزگى ماماندىعى جۋرناليست ك.داۋدتىڭ قالامىنان شىققان روماندارى الەمنىڭ 20 تىلىنە اۋدارىلعان جانە جازۋشى 2014 جىلى وتە بەدەلدى گۋنكۋروۆ ادەبي سىيلىعىن جەڭىپ العان. مىنە، سول داۋدتىڭ «Huffington Post»-تا جاريالاعان جازباسىنىڭ اۋدارماسى.   

ەردوعانعا اشىق حات

ەردوعان، ءسىزدىڭ كەسىرىڭىزدەن تەمىر تورعا توعىتىلعانداردىڭ، زورلىق-زومبىلىق كورگەندەردىڭ جانە اجالمەن قاۋىشقانداردىڭ اتىنان وزىڭىزگە ايتارىم — ەلىمىزگە قوش كەلمەدىڭىز! جو-جوق، ەردوعان، ءسىزدىڭ الجيرگە كەلگەنىڭىزدى ەشكىم قالامايدى...

ءبىز بۇدان بۇرىن دا ەلىمىزدە ءوز حاليفالىعىن ورناتقىسى كەلگەندەردىڭ كەسىرىنەن قان توگىپ، كوز جاسىمىزعا بۋلىقتىق. ءوز پىكىرلەرىن ءبىزدىڭ جانىمىزدان دا ارتىق كورگەن، بالالارىمىزدى قۇلدىققا العان، رۋحىمىز بەن بار ءۇمىتىمىزدى بىزدەن ۇرلاعاندارعا جەم بولدىق.

ءسىزدىڭ مىنا ومىردەگى تىرەگىڭىزگە اينالعان «يسلامشىلدىق» ءبىزدىڭ قايعىمىزعا اينالدى. ءسىز ءبىزدىڭ ەسىمىزگە سول كۇندەردى سالاسىز. ءسىز ءوزىڭىزدىڭ «ۇلى ۇكىمەتىڭىزدىڭ» الدىندا تىزە بۇگۋىمىزدى قالاعانداردى تەك قاناتتاندىرىپ قانا قويمايسىز. ءسىز  ۇلتىمىزدىڭ بارلىق قۇندىلىقتارىنىڭ، بارلىق كەرەعارلىعىنىڭ بولاشاقتاعى ۇلگىسىن سالۋداسىز. ازاتتىق دەگەن قاسيەتتى جەك كورەسىز. تاۋەلسىز پىكىردى جانىڭىز سۇيمەيدى. ميتينگتەر مەن ەرەۋىلدەردى جاقسى كورەسىز. ءدىندى ساۋداعا سالۋ ارقىلى ءبىزدىڭ سىرتىمىزدان وزىڭىزشە حاليفالىق ەتۋدى ارماندايسىز.

«مۇسىلمان باۋىرلار» بىلەتىن ادىستەرى

بۇگىن ەلىمىزدەگى يسلامشىل پارتيالارعا قولداۋ كورسەتە وتىرىپ، ولارعا قول استىڭىزداعى فيرمالاردىڭ ەسەبىنەن سىيلىقتار جاساپ، ۇيىمدار قۇرىپ، مەشىتتەرىمىزدى باقىلاۋعا الۋ ارقىلى وسى تىلەگىڭىزدى اقىرىنداپ جۇزەگە اسىرۋداسىز. ءبىر تۇستان ءبىزدىڭ كورىمىزدى قازىپ، ءبىر جاعىنان بىزگە ءجانناتتى كورسەتەتىن «مۇسىلمان باۋىرلار» ۇيىمىن قۇردىڭىز.

جو-جوق، اسا قۇرمەتتى ەردوعان، ءسىز كۇردتەر مەن قارسىلاستارىڭىزدى قۇردىمعا كەتىرەتىن ور قازۋ ۇستىندەسىز، ال ءبىز ءسىزدىڭ بىزگە كومەك قولىن سوزعىڭىز كەلمەيتىنىن، اۆتونوميالىق قۇقىعىمىزدىڭ باسىم بولۋىن قالامايتىنىڭىزدى جاقسى بىلەمىز.

تاياۋ شىعىستا جەندەتتەرىڭىزبەن نەبىر كەلىسىمشارتتارعا قول قويىپ ءجۇرسىز. ءبىزدىڭ ابىرويىمىزدى ەمەس، ءوزىڭىزدىڭ حاليفا مارتەبەسىن الۋ ارمانىڭىزدىڭ جۇزەگە اسۋىن عانا ويلايسىز. زۇلىمدىقتارىڭىزدى، جويىپ-جانىشتاۋ جوسپارلارىڭىزدى، كۇن وتكەن سايىن جازىقسىزدارمەن تولىعىپ جاتقان جان تۇرشىكتىرەرلىك تۇرمەلەرىڭىزدى، سارايىڭىزدىڭ قۇزىرىنداعى ۇكىمدەرىڭىزدى، ۇجدانسىزدىعىڭىزدى جانە ماقتانشاقتىعىڭىزدى ەستەن شىعارۋ مۇمكىن ەمەس.

وسمان ۇستەمدىگىنە دەگەن ەلىكتەۋشىلىك

ءسىز ادامگەرشىلىكتى ەمەس، وسمان يمپەرياسىنىڭ ەڭ ناشار ءارى قاندىقول مىسالىن جۇزەگە اسىرۋدى ارمانداۋداسىز. يسلام ءدىنى ءسىز ءۇشىن جاي عانا ءبىر ساتى. ءتاڭىر جولى ءسىز ءۇشىن ساۋدامەن تەڭ. زاماناۋيلىقتىڭ قاس دۇشپانىسىز. پالەستينا ءسىز ءۇشىن تەك قانا ءبىر زات. يسلامشىلار بولسا ءسىزدىڭ جاعىمپاز، جادىگويلەرىڭىز.

تاريح ءسىزدى بيلىكتى قولدان شىعارماۋ ءۇشىن جاساعان قياناتتارىڭىزبەن، كوزبوياۋشىلىق ارەكەتتەرىڭىزبەن، جاساندى ۇيىمدارىڭىزبەن، حالقىڭىزعا كورسەتكەن زۇلىمدىقتارىڭىزبەن، توككەن قاندارىڭىزبەن ەسكە الاتىن بولادى.

تاريح ءسىزدى جارىلىس زاتتارىڭىزبەن، سوعىستارىڭىزبەن، حالقىڭمەن ديالوگ جاساۋعا دەگەن قابىلەتسىزدىگىڭىزبەن، ءوزىڭىز بەن ءوزىڭىزدىڭ تۇلعالىعىڭىزدان وزگە ەشكىمنىڭ قۇقىعىن مويىنداماعانىڭىزبەن ەسكە الاتىن بولادى. بۇۇ-داعى يەرۋساليم ءىسىن ءوزىڭىزدىڭ ساۋدا ونىمدەرىڭىزگە اۋداردىڭىز. ال پالەستينا ءىسى ءسىز ءۇشىن ساۋداڭىزدى جاساۋ بارىسىنداعى كومەكشى ءبىر قۇرال. ءسىز جىعىلعانداردى جۇدىرىقتاۋدى وتە جاقسى مەڭگەرگەنسىز.

ءبىز، الجيردە ءوزىن ءتاڭىر ساناعان جانە قالاعان ادامدارىنا ءومىر ءسۇرۋ قۇقىعىن بەرىپ، قالاماعاندارىن سونداي قۇقىقتارىنان شەكتەگەندەرگەن كورەسىنى كورگەنبىز. مىنە، سولار عانا ءسىزدىڭ الجيرگە جاساعان ساپارىڭىزعا قول شاپالاقتاپ قۋانۋدا. ءبىز ولاي قۋانا المايمىز. ءسىز الجيرلىك يسلامشىلار مەن ارزان بەدەلگە قۇمارلاردىڭ يدالىسىز. ولار حاليفالىعىڭىزدى قۇپتاماستان بيلىك باسىنا كەلۋدىڭ مۇمكىن ەكەنىن بىلمەيتىندەر، ءتىپتى ونى ارمانداي المايتىندار.

ءبىز ەلىمىزدى ازات ەل رەتىندە كورگىمىز كەلەدى جانە سولاي ارماندايمىز. بۇگىنگە دەيىن سول ازاتتىعىمىزعا قول سۇعىلسا دا، مارتەبەلى ءبىر ەل بولۋدى ارماندايمىز. ءسىز بۇلاي ارماندامايسىز دا، ولارعا قۇندىلىق رەتىندە قارامايسىز.

«ءسىز تەك قانا ءبىر ەلەسسىز»

داڭقتى تۇركيانى ءوز جاقتاستارىڭىز، تۋىس-تۋمالارىڭىز جانە وتباسىڭىز ءۇشىن بازارلى ەلگە اينالدىرساڭىز، ال قارسىلاستارىڭىز ءۇشىن ناعىز اباقتى ەتتىڭىز. وسى ءبىر تۇرىك حالقى ءسىزدىڭ قولىڭىزدان ءباسىبۇتىن قۇتىلار دەگەن ۇمىتتەمىز. جازىقسىزدار، زورلىق-زومبىلىققا ۇشىراعاندار، جارىلىس زاتتارىنان كوز اشپاعان بالالار وسى ءبىر اۋىر كۇندەردى ءالى-اق ارتقا تاستار. ءسىز تەك ءبىر ەلەس قاناسىز. مۇنى ءوزىڭىز دە بىلەسىز. ءبىز دە بىلەمىز.

ءبىزدىڭ ءوزىمىزدى قور سەزىنۋىمىز ءۇشىن، ءبىز قۇرمەتتەيتىن قۇندىلىقتارىمىزدىڭ تاپتالۋى ءۇشىن، سەنىمدەرىمىزدىڭ ءسونۋى ءۇشىن كەرەعارلىق ءدانىن ەگۋدەسىز. مۇنىڭ ءبارى ءوزىڭىزدى ءبىر قۇتقارۋشى رەتىندە كورسەتۋ ءۇشىن كەرەك ەكەنى بەلگىلى. ايتپەسە، الدىمەن ءوز ەلىڭىز ءۇشىن، سودان كەيىن كورشى مەملەكەتتەر ءۇشىن ءسىز ناعىز ءبىر كور قازۋشى كاززاپسىز. تۇركيا ءسىز ءۇشىن ەشقانداي قايتارىمى جوق، توبەدەن تۇسكەندەي ءبىر ولجا، مۇعجيزا. الايدا تۇركيا وسى مۇعجيزا ءۇشىن وسى حالىقتىڭ قايتا جاندانۋىنا جول اشقان جانە بەدەلگە قول جەتكىزۋىنە سەبەپ بولعان ازات رۋحتى ايەلدەر مەن ەر-ازاماتتارعا قارىزدار. ماسەلەن، ءومىر بويىنا باس بوستاندىعىنان ايىرعان احمەت التان سياقتىلاردىڭ الدىندا بورىشتار.

وزگە دە يسلامشىلار سياقتى باسقالارىنىڭ جەتكەن جەڭىسىن وزىڭىزدىكى ەتىپ كورسەتۋگە قۇمارسىز. توڭكەرىستەردىڭ ودان سايىن جيىلەۋىن كۇتۋدەسىز جانە ۋاقىتى كەلگەندە ءوزىڭىز ءتاڭىردىڭ ماڭدايىنا جازىپ بەرگەن حاليفاسى بولىپ شىعا كەلگىڭىز كەلەدى. ءسىزدىڭ اتاققۇمارلىعىڭىز وسى ءبىر عاجايىپ ەلدىڭ كوپ نارسەدەن قول ۇزۋىنە كەسىرىن تيگىزەدى. سوندا ءسىزدىڭ ۋاعىزدارىڭىز جاساعان كۇنالارىڭىزدى جاسىرىپ-جابۋعا جەتپەس. ءبىزدىڭ يسلامشىلارىمىز بەن ارزان اتاققۇمارلارىمىز «اقشا-پىرلەرىنەن» ايىرىلعاننان كەيىن ءسىزدى اقشا تولى ءاميان، ياعني ءبىر باتپان قۇيرىق رەتىندە كورەتىن بولادى. الايدا، ولاردىڭ ءبىزدىڭ قاتارىمىزدان ەمەس ەكەندىگىن ۇمىتپاڭىز. ولار ءسىزدى وزدەرىنە يدەال تۇتاتىن توبىرلارىڭىزدىڭ اراسىنداعىلار.

«قولىن قانعا بىلعاعاندارعا ەمەس، ناعىز دوستارعا مۇقتاجبىز»

تاريح ءسىز سەبەپ بولعان اجال قۇشقان جاندار مەن جازىقسىزداردى، زۇلىمدىقتارىڭىزدى، جەمقورلىقتارىڭىزدى، سوعىس ۇشاقتارىڭىزدى، سارايىڭىزدىڭ قۇزىرىنداعى ادىلەت سارايلارىڭىزدى ۇمىتپاس. ءسىز تاريحتا وسمان يمپەرياسىنىڭ باتىر قولباسشىسى سياقتى، بارباروس سياقتى ەسكە الىنبايسىز.

ءبىز مىقتى، تاۋەلسىز جانە ار-وجدانىنىڭ الدىندا ءوزىن جاۋاپتى سەزىنەتىن ءبىر مەملەكەت بولۋدى ارماندايمىز. وزگەشەلىكتەردى قابىلدايتىن، ءتۇرلى ءدىن جانە سەنىمدەرگە قۇرمەتپەن قارايتىن، كوپشىل جانە بارلىق جاننىڭ باقىتتى بولۋ تالپىنىستارىنا قۇرمەت كورسەتەتىن ءالجيردى ارماندايمىز.

ءبىز ءسىز سەكىلدى قولىن قانعا بىلعاعان جاندارعا ەمەس، ناعىز دوستار مەن وداقتاستارعا مۇقتاجبىز. ءسىزدىڭ زۇلىمدىق ارەكەتتەرىڭىزگە بۇل جەردە ورىن جوق. ءبىزدىڭ ەلىمىزدەگى تىڭشىلارىڭىزدىڭ دا كەلەشەگى جوق، كۇندەرى ءبىر تۇتام. ءسىز بۇرىنعى وتارلاۋشىلار سەكىلدى تەك قانا جاۋلاپ الىپ جاتقانداي سەزىممەن ءومىر سۇرەتىن بولاسىز.

ءتارجىمالاعان ايدىن ماناپ