ماقتارال اۋدانىندا كوكتەمگى ەگىس جۇمىستارى قىزۋ قارقىنمەن جۇرگىزىلۋدە. قازىرگە دەيىن اۋدان بويىنشا 137959،6 گەكتار ەگىستىك القاپتىڭ 11425،0 گەكتارى تىرمالانىپ، 7327،0 گەكتارى چيزەلدەندى. ىلعال جابۋ جۇمىستارى تياناقتى اتقارىلىپ، قاجەتتى تەحنيكا، قۇرال-سايماندارمەن تولىق قامتاماسىز ەتىلگەن.

ديقاندار اۋا-رايىنىڭ ءاربىر قولايلى ءساتىن ءتيىمدى پايدالانا وتىرىپ 997،1 گەكتارعا جاڭا جوڭىشقا، 931 گەكتارعا ەرتە پىسەتىن كوكونىس، 855،5 گەكتارعا قىرىققابات داقىلىن ەكتى. كوكتەمگى ەگىسكە ەرتە باستان قامدانعان باقشا وسىرۋشىلەر 1723 گەكتارعا قاربىز، 3120 گەكتارعا قاۋىن تۇقىمىن ەگىپ ۇلگەردى. ءۇلبىر استىنا ەگىلگەن باقشا داقىلىن ەرتەرەك ءوسىرىپ، ودان مول ءونىم الۋدى ماقسات ەتكەن ديقاندار اگروتەحنيكا تالاپتارىن مۇقيات ساقتاۋعا كۇش سالۋدا.

ەگىستىك القاپتاردى تىرمالاۋ، چيزەلدەۋ جۇمىستارى ش.دىلدابەكوۆ، قىزىلقۇم اۋىلدىق وكرۋگتەرىندە جوعارى قارقىنمەن جۇرگىزىلۋدە. دوستىق، ش.دىلدابەكوۆ اۋىلدىق وكرۋگتەرىنىڭ ديقاندارى جاڭا جوڭىشقا، قاربىز ەگۋدە الدا كەلەدى. ەرتە كوكونىس وسىرۋدە، ونىڭ ىشىندە قىرىققابات ەگۋ بويىنشا اتامەكەن، ماقتاارال اۋىلدىق وكرۋگتەرىنىڭ ديقاندارى كوش باستاۋدا. ءاربىر اۋىل وكرۋگتەرىندە جۇمىسشى بريگادالارى قۇرىلىپ، ولار ديقاندارمەن كەلىسىپ، جالدامالى نەگىزدە جۇمىس ىستەپ كەلەدى. ەڭبەكاقىسى ءوزارا كەلىسىم بويىنشا، ناقتى قولما-قول تولەنۋدە.

وتكەن جىلدىڭ وسى مەرزىمىمەن سالىستىرعاندا جاڭا جوڭىشقا ەگىس كولەمى 140 گەكتارعا، قىرىققابات 131،8 گەكتارعا، قاربىز 1248 گەكتارعا، قاۋىن 1277 گەكتارعا ارتىپ وتىر. بۇل ديقانداردىڭ كوكونىس، باقشا، مال ازىقتاناتىن داقىلداردى كوبەيتۋگە ەرەكشە ىنتالى ەكەنىن بايقاتادى جانە ەكونوميكالىق تيىمدىلىگىنە بايلانىستى ەگىستىكتى ءارتاراپتاندىرۋدىڭ دا پايداسى وراسان زور.

كۇننىڭ كۇرت جىلۋىنا بايلانىستى سورى شايىلعان القاپتار دەگدىپ، تىرمالاۋ، ىلعال جابۋ جۇمىستارى ماقتالى ولكەدە وسىلايشا قىزۋ قارقىن الدى. نەگىزگى داقىلى "اق التىن" بولىپ سانالاتىن ماقتارالدىق شارۋالار جەرگە ماقتا ءشيتىن سەبۋگە دە دايىندىقتارىن جاساۋدا. تۇقىمدىق شيت جەتىسپەۋشىلىگى ماسەلەسىن بولدىرماۋ ماقساتىندا اۋدان اكىمدىگىنىڭ باستاماسىمەن قۇرىلعان جۇمىسشى توپ 3000 تونناعا جۋىق تۇقىمدىق ءشيتتى دايىنداعان جانە بۇل كوكتەمگى ەگىس ماۋسىمىن تولىقتاي قامتاماسىز ەتەدى دەپ كۇتىلۋدە.

اۋداندا سۋبسيديالاناتىن مينەرالدى تىڭايتقىشتاردى الۋ ءۇشىن وسى جىلعى 1 ناۋرىزدان باستاپ egov.kz پورتالى ارقىلى ديقانداردان ەلەكتروندىق سيفرلىق قولتاڭباسىمەن وتىنىمدەر قابىلدانىپ جاتىر. تىڭايتقىشتاردى سۋبسيديالاۋ ماسەلەسىنە اۋىل اكىمدەرى ۇلكەن جاۋاپكەرشىلىكپەن قاراپ، ءوتىنىم تاپسىرۋدى جەدەلدەتۋى ءتيىس.