قازاقستان بويىنشا كوكتەمگى اسكەر قاتارىنا شاقىرۋ جۇمىستارى قىزۋ جۇرگىزىلىپ جاتىر. الماتى وبلىسىنىڭ قورعانىس ىستەرى جونىندەگى دەپارتامەنتى دە اسكەرگە شاقىرۋ ناۋقانىنا بەلسەنە اتسالىسۋدا. ۇستىمىزدەگى جىلدىڭ كوكتەم ايىندا جەتىسۋ جەرىنەن 1991-2000 جىلى تۋىلعان 1800-دەن استام ازامات اسكەرگە قاتارىنا الىنادى.

بۇگىنگى كۇنى 300-گە جۋىق ازامات ق ر ۇقك شەكارا قىزمەتىنىڭ اسكەري بولىمدەرىنە اتتاندىرىلعان.

جەرگىلىكتى اسكەري باسقارۋ ورگاندارىنىڭ، دەنساۋلىق ساقتاۋ جانە قۇرىلىمدىق كۇشتەردىڭ وكىلدەرىنەن قۇرالعان شاقىرۋ جانە مەديسينالىق كوميسسياسى اسكەرگە قابىلدانۋشىلاردى تۇبەگەيلى تەكسەرۋدەن وتكىزۋدە. كوميسسيا مۇشەلەرى ءار ۇمىتكەردى دارا قاراستىرىپ، العان ءبىلىمىن، ماماندىعىن، وتباسى جاعدايىن، قىزىعۋشىلىقتارىن، سپورتتاعى جەتىستىكتەرىن نازارعا الا وتىرىپ، دەنساۋلىق جاعدايىنا قاراي مەرزىمدى اسكەر قاتارىنا قابىلداۋ تۋرالى شەشىم شىعارادى.

-جەتىسۋ جەرىنىڭ ازاماتتارى ق ر قارۋلى كۇشتەردە، ۇقق شەكارا قىزمەتىندە، پرەزيدەنتتىڭ مەملەكەتتىك كۇزەت قىزمەتى، سونداي-اق ق ر ءىىم ۇلتتىق ۇلاننىڭ قاتارىندا اسكەري بورىشتارىن وتەپ كەلەدى. اسكەري ءبولىم مەن مەكەمە باسشىلارى ءارقاشان الماتى وبلىسىنان قابىلدانعان ازاماتتاردىڭ ەرىك-جىگەرى مەن وتانعا دەگەن پاتريوتتىق سەزىمدەرىنىڭ جوعارى ەكەنىن ەرەكشە اتاپ وتىرادى، - دەدى قورعانىس ىستەرى جونىندەگى دەپارتامەنتى باستىعىنىڭ مىندەتىن ۋاقىتشا اتقارۋشى پودپولكوۆنيك تالعات داۋلەتحانوۆ.

كوكتەمگى اسكەرگە شاقىرۋ ناۋقانى ۇستىمىزدەگى جىلعى 10 ناۋرىزدا باستالىپ 30 ماۋسىمدا اياقتالادى. ادەتتەگىدەي اسكەردى جاساقتاۋ اۋماقتىق پرينسيپكە نەگىزدەلەدى، ياعني اسكەر قاتارىنا قابىلدانۋشى وزگە وبلىسقا اتتاندىرىلادى. ازاماتاردى قابىلداۋدا جانە ىرىكتەۋدە ولاردىڭ وسىعان دەيىن العان بىلىمدەرى ەسكەرىلەدى.

مالىمەت ءۇشىن: اسكەرگە شاقىرۋ «اسكەري قىزمەتتە بولۋدىڭ بەلگىلى مەرزىمىن وتەگەن اسكەري قىزمەتشىلەردى زاپاسقا شىعارۋ جانە ق ر ازاماتتارىن 2018 جىلعى ناۋرىز – ماۋسىم مەن قىركۇيەك – جەلتوقسان ايلارىندا كەزەكتى مەرزىمدى اسكەري قىزمەتكە شاقىرۋ تۋرالى» ق ر پرەزيدەنتىنىڭ 2018 جىلعى 28 اقپانداعى №644 جارلىعىنا سايكەس جۇرگىزىلەدى.

«اسكەري قىزمەت جانە اسكەري قىزمەتشىلەردىڭ مارتەبەسى تۋرالى» ق ر زاڭىنا سايكەس مەرزىمدى اسكەري قىزمەتكە 18 بەن 27 جاس ارالىعىنداعى، مەرزىمىن كەيىنگە قالدىرۋعا جانە اسكەردەن بوساتىلۋعا قۇقى جوق ازاماتتار قابىلدانادى.